Nahara luki kaiks: Brayan ba sibrin lukisa skul wahmika wâl ba witin lamara aula sa taim. Naha wikka ra pat aima wâl sigarit dibia taibi munan sa. Nanara, kli witin nani ba traika kaikisa.

Wahmika kum bila:

Witin ai pakitka wina diara kum saki, bara Brayan ra yabisa.

Brayan ba ai pânika mihta ba ra sigarit kum kaiki, kau sibrin daukisa.

Man Brayan katma kaka, ¿dîa daukaia kapram?

¿Skul wahmika nani ba dîa dauki ba nu sa lukisma? ¿Witin nani silp luki daukan? Apia kaia sa. Ban kra, ai pânika wala nani mita dîa dauki ba nina blikisa. Witin nani brin daukisa upla wala nani pain kaikbia, baha mita ai bîla walisa.

Brayan ra munan baku upla taibi mai munisa kaka, ¿diara wala daukaia sip sma ki, bara taibi mai muni ba mapara buaia?

1. RIDI TAKS

   Baibil ba wisa: “Aman kaiki uplika ba, diara saura kaiki taim yukuwisa; sakuna dahra yamni walras nani ba, ban ai tâura auya bara pât ra dimisa” (Sins Lâka 22:3 TNM).

   Aima manis pât bâra sa taim, yawan laih wina kaikaia sip sa. Luki kaiks, man wapi auma bara kaikisma wahma daknika kum sigarit di banhwisa. Trabilka ba mapara buaia lukisma kaka, man ridi kama pura luaia.

2. LUKS

   Baibil ba wisa: “Kupiam dara walra nani ba klir bri bas” (1 Pita 3:16).

   Wînam kat mamkabi wals: “¿Upla wala nani dîa dauki ba nina blikisna kaka nahki daira walamna ki?”. Ban kra skul wahmika bara tiarika nani ba piu kunhku ra yamni mai kaikbia. Sakuna baha wina, ¿nahki damra walma ki? ¿Dîa sât uplika sma ba chens munaia want sma ki, witin nani pain mai kaikbia dukiara? (Impakan Sturka 23:2).

3. LUKI DAUKS

   Baibil ba wisa: “Upla sinskira lika saurka ra sibrin lukisa, bara saura ba wina mahka taki auya” (Sins Lâka 14:16).

   Yawan sut ba piu bani diara luki daukisa, bara nu kaia sa dîa dauki ba wina diara pain, apia kaka diara saura takaia sip sa. Baibil ba waitna kum kum diara yamni luki daukan ba dukiara aisisa: Josep, Job bara Jisas, ban sakuna Baibil ba waitna kum kum diara saura luki daukan ba dukiara sin aisisa: Ken, Isau bara Judas. ¿Man dîa daukma ki?

Baibil ba wisa, yawan ba piua bani diara nani ba kasak kat daukaia sa (Lawana Nani 37:3). Man diara kum nahki daukma bara nahki takbia pat lukram kaka, kau isi sa baha kat wiaia taibi mai muni uplika nani ra. Bara baku daukaia kau pain sa.

Taibi mai muni uplika nani ra diara sut lukisma ba wiaia nit âpu sma, ba mita uba lukpara. Apia wima kaka aitani kabia. Baku sin, klir pali wiaia sma dîa lukisma ba chens munma apia, naku wiaia sip sma:

• “Baha ba yang wal waras”.

• “Yang baha daukras”.

• “Pat nu sma yang dîa lukisna ba”.

Man dîa wima ba param bara istikira aisas. Baku daukma kaka, klir kaikma nahki skul wahmika bara tiarika nani ba danh taibi mai munbia apia.

Ban kra, wahma bara tiara nani ba lamwaska kiki mai wibia: “¿Dîa mai takisa? ¡Man si brisma!”. Upla taibi wan muni ba, wan sarka paskaia wisi baku wan aisisa. ¿Man dîa daukaia sip sma? Diara wâl ba daukaia sip sma:

• Witin nani dîa aisi ba kat wiaia sip sma. Ban kra naku: “Âu, rait sa, yang si brisna”. Baha wina bîla kunhku ra aisas, dîa muni baha daukras sma ba.

• Witin nani dîa mai wi ba mapara bus. Tânka mariks dîa muni baha man daukras, baha wina naku sip sma wiaia: “Yang lukri man ba upla sinskira, kan upla sinskira nani ba nu sa sigarit ba saura, ¿dîa muni sigarit disma?”.

Witin nani ban taibi mai munisa kaka, baha wina taki was. Kupiam krauks: bâra takaskma kaka, kau karna taibi mai munbia. Sakuna, baha wina taki wama kaka, upla dîa mai wi ba kat man daukras marikma.

Raitka ba, upla nani ba piua bani taibi wan muni kabia, bara yawan alki takaskaia sip apia sa. Sakuna, dîa daukaia ba lika man lukaia sip sma, nahki lukisma ba klir wiaia, bara dîa taki ba man baman tâ briaia. Baku ba ra, dîa daukaia ba lika man mihtam ra sa (Jasua 24:15).