Ana ba tiara kum sa, bara witin ai dara walras si, waitna saura kum witin ra tasba ra batakan. Ana bila: “Upla ra wini hilp makabaia want kapri, kuna sip kisbras ai munan. Waitnika ra yang tukbi mini bara mihti wal prukri, bara aismala wal kurbi latwan yabri... kuna witin kiru ni ai saban. Baha minitka ra, yang diara sip daukras kapri, kli witin mapara aiklabras kapri”.

Ana ra takan baku, man ra sim sât mai daukbia kaka, ¿dîa daukma ki?

Piu bani aman kaikma kra sin, diara saura mai takaia sip sa, tihmia ra yabal ra taukaia baku. Baibil ba wisa, plaplapra nani ba sika plapi pura luras ba, bara diara tânka brabrira nani ra sin yamni briras sa, kan piua bara diara bîla kaikras ba kumi bani ra takisa (Smasmalkra 9:11).

Ana ra takan baku, kakaira apia waitnika kum saura munan. Sakuna, upla wala nani ra kakaira pali uplika kum mita saura munisa, apia kaka ai taya uplika kum. Noelia ba 10 mani bri kan taim, ai watla lamara iwi wahmika kum witin ra alki rug lâka daukan. Noelia bila: “Yang ba sirang iwri bara swiri ai daukan, baha mita alki saura ai munan taim, upla wala ra wiras kapri”.

Ana ba sari taki, diara takan ba ai pâtka sa lukisa. Witin bila: “Baha tihmika ra saura ai munan ba kli kli sinski ra balisa, yang lukisna baha piua ra kau aiklabaia kapri. Waitnika ba kiru ni ai saban taim yang diara sip daukras kapri, sakuna yang lukisna tnatka wala ra aiklabaia kapri ba”.

Noelia sin, sari luki bara dîa takan ba ai pâtka sa wisa. Witin bila: “Aisiki bara yaptiki bîla walras kapri, kan witin nani ba latara pulaia chanska aiki kan yang muihki ba yuli kahbi kan kaka, sakuna yakan latara takri. Baha mita, waitla lamara iwi wahmika ba mapara isi takan ai alki rug lâka ai munaia, yang pâtki ba mita daukan lukisna. Baha trabilka tâka ba mita yang pamaliki ba pât ailal wahwan, witin nani kupia kriwan ba yang pâtki sa lukisna. Baha ba sarki ai paskisa”.

Man ba Ana bara Noelia baku damra walisma kaka, nu bas, upla kum wala ra alki muni rug lâka daukisa taim, taiban lâka kat daukisa. Upla kum kum bila baha uplika ra alki muni rug lâka daukan ba silp chanska ba yaban sa, witin silp trabilka ra diman wisa. Sakuna baku apia sa, upla kumi sin naha trabilka tara mita pât wahwaia apia sa. Upla kum mai alki saura muni rug lâka daukan sa kaka, man pâtkam mita takras kan.

Baha ba isi pali apia sa. Upla kum kum ra baku takan ba wala nani ra wiras, kau ni sari taki bara ai swira brisa. Sakuna, ¿sâp takaskma kaka, trabilka ba wapni takbia ki?, ¿ya lika pain kabia, man, apia kaka saura mai munan uplika ba? Kau pain sa hilp plikaia, ¿rait apia?

Baibil ba tânka marikisa, waitna kasakkira kum nina Job ba, latwan ailal wahwi kan piua ra naku win: “Kupi tahplika wal param aisisni” (Job 10:1). Ban kra, baha pâtka ba upla kum pain kulkisma ba ra wima kaka, kau yamni damra walma. Baha hilp mai munbia tânka briaia dîa takan ba, bara kupiam sarka brisma ba wina rawma.

Ana ba baku daukan bara kau pain ai dara walan. Witin bila: “Pâinika mairin kum wal aisari, bara ai win kangrigisan almukka nani wâl pan ra wimna. Baku daukri ba mita pain daira walisna. Witin nani ba aima ailal yang laimara bal ai wi kan: saura mai munan ba man pâtkam mita takras kan”.

Noelia ba ai aisika bara ai yaptika ra diara takan ba win. Witin bila: “Witin nani hilp ai munan. Bara kupi bukan saura ai munan ba dukiara aisaia, bara baha ba hilp ai munan kupi baiwanka bara sari lâka bri kapri ba pura luaia”.

Baku sin witin ba ai pura suni kan bara maisa nihkanka brin. Witin bila: “Gâd ra puri sunri ba mita kasak hilp ai munan upla wal aisaia dukiara. Yang puri sunisna taim, Gâd ra wiaia sip sna nahki daira walisna ba, bara baku laman lâka brisna”.

Man dukiamra “rakaia piua sin bâra” sa (Smasmalkra 3:3). Wînam tara yamnika bara nahki damra walisma ba main kaiks, baku sin aitani kat ris bris. Sakuna kau pali ba sika: Jehova wal asla taks, kan witin ba “wan maisa nanihkra Gâdka sa” (2 Korint 1:3, 4).

Kut takisma wahmika ba rug lâka daukaia taibi mai munbia kaka, witin ra naku karna wis: “¡Baha daukpara!”, apia kaka, “¡Ai kangpara!”. Witin ba tiara wala plikbia sîa brima sin sâp takaskpara. Tiara wala plikbia kaka, witin upla pain apia ba marikisa. Kau pain sa, upla kum man wînam tara bara lâmka nani ba rispik munbia.

“Yang ba 13 mani, apia kaka 14 mani bri kapri taim, skul ra wahma nani ba yang nini tani wina badiki ba (slip badi ba) ai alki drabi kan, bara bîla tâski ai aisi kan: ‘Yang wal bri prawma kaka laik takma’” (Cora).

Man nahki lukisma, ¿wahmika nani na...

1. puli aisi kan?

2. tiarika wal triswi kan?

3. tiarika ra rug lâka tânka ra nais muni kan ki?

“Bos ra impaki kapri taim, wahma kum ai kangbi bîla tâski ai aisi kan. Yang witin ra prukri, bara wîri yang wina sait ra tawbia. Sakuna witin yang ba grisi baku ai kaikan” (Candida).

Man nahki lukisma, ¿wahmika na...

1. puli aisi kan?

2. tiarika wal triswi kan?

3. tiarika ra rug lâka tânka ra nais muni kan ki?

“Wahma kum ba, mani kum bilara sut ba yang laik taki kan ai wi kan, bara yang wal kut takaia want kan. Sakuna yang ba piua bani apia wîri. Piu kum kum ra, klaihkla ba kangbi kan, yang ba wi kapri ai kangbiara, sakuna witin ban dauki kan. Yu kum, yang sûski kiwka wilki kapri taim witin naita ba kangban (Bety).

Man dîa lukisma, ¿wahmika na...

1. puli aisi kan?

2. tiarika wal triswi kan?

3. tiarika ra rug lâka tânka ra nais muni kan ki?

Tiarika yumhpa sut ra letra C aisi ba baku takan.

Upla kum piu bani rug lâka tânka ra nais muni ba, ¿nahki sât wala sa ki upla kum wal triswaia bara puli aisaia ba wal?

Rug lâka tânka ra upla kum ra nais munisa taim, baha uplika ba pât wahwisa. Bara witin apia wibia sin, saura muni uplika ba ban trabil munisa.

Upla kum piu bani rug lâka tânka ra nais munisa kaka, trabil tara kum sa, kan las kat ai walka ra alki saura muni rug lâka daukaia sip sa.