Nahara luki kaiks: Karen ba liliaka kum ra wan, bara 10 minit ningkara, ban wina ai ninara upla kakaira kum witin ra wisa:

Witin tawi kaikisa taim, ai pânika Jessica ba rum batil wâl ai mihta ra brih aula. Rum yabi bara witin ra wisa: “Man tuktan apia sma. Sip sma lilia takaia ¿rait apia?”.

Karen ba rum diaia want apia, kuna Jessica ai pânika sa. Bara Karen want apia sa Jessica lukbia witin sibrin brisa. Baku sin, Jessica ba pâna pain sa, witin rum dîsa kaka, uya saura apia sa. Karen lukisa: “Rum baman sa, droga aubaia lika kau saura”.

Man Karen katma kaka, ¿dîa daukaia kapram?

Man diara kum pain luki daukma dukiara, dîa sât uplika sma ba nu kaia nit sma. Man dîa sât uplika sma ba nu sma taim, baha hilp mai munaisa tânkam briaia dîa lâka pain brisma bara dîa tara kulkisma. Baha kainam kahbia bara karnika maikbia man silp rayakam ba alki briaia, upla wala taibi mai munaia watlika ra (1 Korint 9:26, 27).

¿Baha karnika ba nahki briaia sip sma? Pas tâura naha makabi walanka nani laki kaikbia.

Daukankam pain nani ba nu sma kaka, man diara daukma ba namhpa namhpa lukma apia.

BAIBIL STURKA KUM. Apastil Pal ba naku ulban: “Bamna yang na aisaia mapara bîlas kum baku sna kuna, yang sinski tânka ba lika baku apia sa” (2 Korint 11:6). Witin Baibil ulbanka nani pain kakaira kan ba mita, kasak bapi buan upla nani witin mapara saura aisan taim. Witin swiras kan baha aisanka saura nani ba tâwan mâyara ai dara walbia (2 Korint 10:10; 11:5).

WÎNAM KAT LAKI KAIKS Diara pain daukaia lan sma ba uls.

Nanara ulbi swis daukanka kum kau pain brisma ba (naha baku, kupiam yamni, kupiam pihnikira, upla kasak baku mai kulkisa, apia kaka piua kat diara daukisma ba).

Chên pîska kum uba swapni ba mita dakwaia sip ba baku, man daukankam pain nani ba isti lus tikaia sip sma, wibia kaka man lâ pain brisma ba lulki swima, baha mita yarka swapnikam nani ba tâm bribiara.

BAIBIL STURKA KUM. Pal ba ai swapnika nani nu kan. Ba mita naku ulban: “Kupi munhtara lika, Gâd lâka ba yamni kaikisna, kuna yang wîni tara ra diara aihka kum kupi brinka ba mapara aiklabi kan kaikisna; baha sika saurka lâka yang wîni ra bâra ba mita silak ra ai mangki ai bri ba” (Roman 7:22, 23).

WÎNAM KAT LAKI KAIKS ¿Dîa swapnika alki takaskaia nit sma?

¿Man truk kum ra aimaki, truk waki uplika ra wima ki sim pliska ra aima ailal lubia gias ba danh takbia ba kat? Baha sins âpu kabia ¿rait apia?, bara lalah manis sin tikma.

¿Dîa lan takaia sip sma? Man dîa daukaia nu sma kaka diara nani sins âpu ba daukma apia, nu kama dîa daukaia bara nahki daukaia want sma ba.

BAIBIL STURKA KUM. Pal ba naku ulban: “Yang pali lika blain baku plapras” (1 Korint 9:26). Pal ba trai munan ai rayaka ra dîa lukan ba kat alki daukaia, witin nu kan diara nani ba ban wina takras (Pilipai 3:12-14).

WÎNAM KAT LAKI KAIKS Nanara diara yumhpa naha manka ra daukaia want sma ba uls.

Man dîa pali daukaia nu âpu sma kaka, namhpa namhpa lukma. Bara baku wala nani dîa saura dauki ba, man sin daukma. Baku daukma kaka, dîa sât uplika sma ba klir apia kabia.

Sakuna, lukankam ba kat diara pain daukma kaka, upla wala dîa daukbia kra sin, man klir marikma dîa sât uplika sma.

BAIBIL STURKA KUM. Ban kra Daniel ba wahma pali kan ai pamalika wina dakbi sakan taim. Ban sakuna, ai kupia ra luki brin Gâd lâka nani ba bîla walaia (Daniel 1:8). Witin ba ai lâka pain nani ba lus tikaia want apia kan, bara witin dîa luki kan ba kat daukan.

WÎNAM KAT LAKI KAIKS ¿Dîa kasak lukisma? Ban kra: ¿Gâd ra kasak lukisma? ¿Dîa muni? ¿Dîa muni kasak lukisma Gâd bâra ba?

¿Gâd lâka nani ba yamni mai munisa lukisma? ¿Dîa muni?

Bamna, ¿man nahki kaia want sma ki: dus wahia kum pâsa mita brih pâli ba baku, apia kaka dus kum pâsa tara mita sip batakras baku? Baha dusa baku kaia want sma kaka, trai muns man dîa sât uplika sma lâka ba karna bapi briaia. Bara wînam kat mamkabi wals: ¿Yang dîa sât uplika sna ki?