Marit uplika nani ba pas trip luhpa kum brisa taim lilia takisa, sakuna sim taimka ra wari takaia sip sa. Ban kra witin nani tâ iwisa, kan ai bibika ra piua bani main kaikaia sa bara witin nani swapisa. Witin nani ba ris briaia sip apia munisa, bara praut, sari bara kupia kriwan baku ai dara walaia sip sa, baha sut ba marit lâka ra trabil munaia sip sa. Baku ba ra, witin nani ba laki kaikaia sa nahki ai bibika ra main kaikbia bara sim taimka ra, ai maritka lâka ba main kaikaia sin. ¿Baibil kupia kraukanka wanki ba, aisa bara yapti nani ra nahki sip sa hilp munaia naha sât trabilka na pura luaia dukiara?

BAIBIL DÎA SMALKI BA: Latwan lâka bri uplika ba pât wahwi “upla yamnikira sa, ... ai dukia sin plikras; ai kupia baikras sa” (1 Korint 13:4, 5). Aimahsi bibi kum baikram ba mita bibikam wal baman kaia want sma, bara witin ra main kaiki kaia. Ban kra mayam ba lukbia witin ra lulki swiram ba, baha mita âmya tikpara mayam wal sin taim luaia sma. Wihka bîla kaikan lâka bara yamni lâka ba man mayam ra mariks, bara baku mayam kaikbia man mita witin ra kulkisma, baku sin mayam ra tingki wis, kan witin sin bibika ba main kaikisa.

“Man nani, maya waitna nani sin, mayam mairin nani wal diara tânka briaia kat iwi bas” (1 Pita 3:7). Man ba aisa kum pas trip takram ba mita, tânkam bris nanara mayam ba bibi main kaiki awar ailal lubia, baha mita witin ba kupia turban kabia, swapan kabia, apia kaka sari ai dara wali kabia, kan witin mapara tuktan main kaiki wark raya kum daukisa. Ban kra, witin sam taim mampara bûi ai kupia sauhkbia, sakuna man kupiam alki takaskaia sma, kan “kau yamni sa kupia swapni kaia wihki kupia karna kaia ba wal” (Sins Lâka 16:32). Witin nahki ai dara wali ba tânka pliki kaiks, bara witin dîa nit ba yas (Sins Lâka 14:29).

DÎA DAUKAIA SIP SMA:

• Aisa nani: Mayam mairin ra hilp muns bibi ra main kaikaia, tihmia kat sin. Diara wala daukaia brisma kaka, uya daukpara, kan baku sip kama mayam bara luhpiam wal kau taim luaia

• Yapti nani: Mayam waitna ba bibi ra main kaikaia want sa mai wibia taim, apia wipara. Witin uya pain daukras kabia sin witin dahra sâkpara, kupia pain wal witin ra smalks nahki bibi ra main kaikaia

BAIBIL DÎA SMALKI BA: “Witin nani wal ai tânka brih, wal ai wîna kumi takbia” (Blasi Sturka 2:24). Pamalikam bilara upla raya balan, baha sika luhpiam, ban sakuna âmya tikpara man wihki mayam wal “wîna kumi” sma. Karna trai muns maritkam lâka ba swapni takaia apia.

Man, maya mairin sma ba mayam waitna hilpka maiki ba dukiara tingki wis. Tingki bîla nani ba “hilp wankisa” (Sins Lâka 12:18). Man, maya waitna sma ba mayam mairin ra wis nahki witin ra latwan kaiki bara kulkisma ba, bara witin ba pamalikam dukiara diara dauki ba man pain kaikisma ba wis (Sins Lâka 31:10, 28).

“Upla bani ai hilpka plikaia apia sa, sakuna upla wala nani hilpka lika” (1 Korint 10:24). Dîa dîa daukisma ba, man mayam painka dukiara piu bani dauks, bara witin sin dîa warkka karna dauki ba pain kaiks. Taimkam sâks, pana pana mayam wal aisi bara walaia dukiara. Mayam wal brih prawaia ba tânka ra, man wînam kat baman lukpara. Mayam ba man wina dîa nit ba ra luks. Baibil ba wisa: “Pana pana wal prawaia apia wipara”, piua kum kum ra baman prawaia apia wâl aisi lâ daukram kaka lika (1 Korint 7:3-5). Baha dukiara param aisas. Bîla kaikanka brih bara pana pana tânkam brisma ba mita, mayam wal kau asla kama.

DÎA DAUKAIA SIP SMA:

• Kupiam krauks man nani wâl yakan taim luaia sma ba

• Diara sirpi wal maritkam ra latwan kaikisma ba mariks, wauhtaya sirpi kum ra diara painkira ulbi yabaia, apia kaka prisant lupia kum yabi ba wal pana pana lamtwanka lâka ba mariks

BAIBIL DÎA SMALKI BA: “Kan tuktan lupia piua wina man ba Ulbanka holikira nani kakaira sma, bara baha nani mita sins maikaia sip sa ... swaki mai sakaia sip sa” (2 Timoti 3:15). Luhpiam ra nahki smalkma ba luks. Kupiam krauks, witin ba diara ailal bara isti lan takaia sip sa, ai yapti playa ra ba wina sin. Naha tânka ra luki kaiks, bibi nani ba ai yapti playa ra sa taim bîlam baikra ba pat kakaira sa, bara man lilia, apia kaka sari sma taim witin sim sât ai dara walisa. Witin aisubi takbia piua ba wina mahka wauhtaya aisi kaiki yas, witin ai tânka briras kabia sin, kan pâwi auya ba ra, ban kra aisi kaikaia laik kabia.

Bibikam ra Gâd dukiara aisi bas, witin uba sirpi sa lukpara. Man Jehova ra puram sunma piua ra, yas witin mai walbia (Kli Smalkanka 11:19). Witin wal pulisma taim, Gâd dîa dukia nani paskan ba dukiara aisas (Lawana Nani 78:3, 4). Witin tawa tawa pâwbia ba ra, nu takbia man ba nahki Jehova ra latwan tara kaikisma ba, bara witin sin Jehova ra latwan kaikaia lan takbia.

DÎA DAUKAIA SIP SMA:

• Gâd ra sins lâka makas nahki pali luhpiam ra smalki pakaia dukiara

• Ani lukanka tara bara ani bîla yamni nani luhpiam lan takbia want sma ba, kli kli aisas bara baku witin isti lan takbia