Yawan sut lalah nit sa wan pamalika ra diara nani nit ba yabaia dukiara (Sins Lâka 30:8). Kan lalah ba wan kaina kahbisa (Smasmalkra 7:12). Sam taim, lalah ba nahki pain yus munaia dukiara aisaia ba karna sa, ban sakuna baha dukiara maritkam lâka bilara yarka trabil mai munbiara (Epesus 4:32). Man nani pana pana kunin âpu kaia sma bara lalah ba nahki yus munbia ba dukiara asla aisaia sma.

BAIBIL DÎA SMALKI BA: “Man nani tilam wina upla kum tawer kum paskaia lukbia kaka, witin iwi dîa lalah tikaia ba pas kulki kaikuya, ai mihta ra dîa bri ba wal aitani takbia sapa” (Luk 14:28). Man nani nahki lalah yus munma ba dukiara sim lukanka briaia sma, kan baku daukaia ba lika diara tara sa (Emus 3:3). Man nani laki kaiks dîa atkaia nit sma bara lalah an tikaia sip sma ba sin (Sins Lâka 31:16). Lalah ailal bri kama sin, tânka apia sa mahka diara kum atkaia sma ba. Tras dimpara, lalah brisma ba kat diara atki bris (Sins Lâka 21:5; 22:7).

DÎA DAUKAIA SIP SMA:

• Kati las yua ra lalah tâka brisma kaka, mayam wal aisas nahki yus munaia sip sa

• Lalah aibapaia brisma kaka, mayam wal aisas diara ailal atki briaia apia dukiara. Ban kra naku daukma, plis wala ra wih plun atki piaia watlika ra, utla kat silp plun piaki piaia sip sma

BAIBIL DÎA SMALKI BA: Man kasak kaia sma, Jehova “mawanra baman apia, sakuna upla nani mawanra sin” (2 Korint 8:21). Mayam ra wis rait pali warkkam ra lalah an mai aibapisa bara lalah an tikisma ba sin.

Lalah ailal kau tikras kainara, piu bani mayam wal aisas (Sins Lâka 13:10). Baha dukiara klir aisisma kaka, hilp mai munbia maritkam lâka ba kupia kumi lâka briaia. Wark takram mana mai aibapi ba pamalikam lalahka baku kaiks, man silp lalahkam baku kaikpara (1 Timoti 5:8).

DÎA DAUKAIA SIP SMA:

• Mayam wal aisas kumi bani lalah an silp tikaia sip sa, baku lika nit âpu kabia pana pana wiaia dîa atki ba

• Lalah trabilka kum brima piua ba kat baman lalah dukiara aisapara