Jehova mita pamali ba paskan piua ra, aisa bara yapti nani ra luhpa main kaikaia warkka ba yaban (Kolosi 3:20). Man aisa sma ba, tuktikam nani ra smalki pakaia warkka ba man mihtam ra sa, man hilpkam wal witin nani ba Jehova ra latwan kaikbia, upla pain bara wapni takbia (2 Timoti 1:5; 3:15). Baku sin, witin nani ai kupia ra dîa bri ba man nu kaia sma. Naha latan sa, man dîa dîa daukisma ba witin nani mai kaiki lan takbia. Gâd bîla ba luhpiam nani ra smalkaia tnatka kau pain ba sika: man pas tâura Gâd bîla ba kupiam ra bri kaia (Lawana Nani 40:8).

BAIBIL DÎA SMALKI BA: “Man nani kumi bani walaia dukiara ridi kaia sma, sakuna damra wali kaia sma, aisaia bara praut takaia mapara” (Jems 1:19). Man aihka want sma luhpiam nani ba ai swira âpu mai aisabia. Sakuna witin nani ai swira âpu mai aisabia dukiara, man wilin kaia sma witin nani ra walaia. Yas man nani tilamra laman lâka bâra kabia, kan baku tnatka ra luhpiam nani ba mai aisaia lilia kabia (Jems 3:18). Man lâ karna mangki bara dahra saki aisama kaka, luhpiam nani ba baha nu takbia bara man wal aisaia want apia kabia. Wihka bîla kaiki bas, bara piu bani wis nahki witin nani ra latwan kaikisma ba (Matiu 3:17; 1 Korint 8:1).

DÎA DAUKAIA SIP SMA:

• Luhpiam nani ba aisaia nit piua ra man wilinkira wals

• Luhpiam nani wal piu bani aisas, trabil bribia piua ra baman lika apia

BAIBIL DÎA SMALKI BA: “Ya tânka bri nani ba sins tânka ra diara daukisa” (Sins Lâka 13:16). Sam taim, luhpiam nani dîa mai aisi ba walaia baman apia sa, nahki pali ai dara wali banhwi ba man tânkam briaia sma. Wahma bara tiara nani ba aima manis pura praki aisisa, apia kaka pain lukras ban aisisa. Ani uplika diara kum pain walras sakuna ban pana aisisa kaka, baha lika taniskira sa, ai swira tara sin bribia (Sins Lâka 18:13). Baha mita isti pali kupiam sauhkpara (Sins Lâka 19:11).

DÎA DAUKAIA SIP SMA:

• Luhpiam ba dîa dîa mai aisabia sin, witin bîla dakpara bara praut takpara

• Kupiam krauks man nahki kapram luhpiam manka bri kapram taim, bara dîa dukia nani kau kulki kapram

BAIBIL DÎA SMALKI BA: “Luhpi waitna, aisikam mai smalki ba wals, bara sin yaptikam mai smalki ba, bahki kulkpara” (Sins Lâka 1:8). Jehova mita aisa bara yapti nani ra ai luhpia nani tâ briaia raitka ba yaban sa. Aisa bara yapti ba tuktika nani ra smalkaia sa, rispik lâka marikaia bara bîla wawalra sin kaia (Epesus 6:1-3). Luhpiam nani ba nu sa man nani ba sim dukia lukras sma taim (1 Korint 1:10). Baha mita, man nani lukankam ra kupia kumi âpu sma kaka, luhpiam nani mawanra blahwaia apia sma, kan blahwisma kaka ban kra witin nani rispik mai munbia apia.

DÎA DAUKAIA SIP SMA:

• Luhpiam mistikka nani nahki wapni mangkaia ba dukiara mayam wal aisas

• Tuktikam nani ra nahki smalki pakaia tnatka ba dukiara, mayam wal sim lukanka briras sma kaka, trai muns mayam lukanka ba tânkam briaia

BAIBIL DÎA SMALKI BA: “Tuktan ba ai rayaka yabalka lâka ba, pain smalki paki bas naiwa piua ra” (Sins Lâka 22:6). Luhpiam nani kasak pain pakaia want sma kaka, diara nani witin nit ba silp bribia lukpara. Man luki kaikaia sma nahki ridi takma witin nani ra smalkaia, bara wapni mangki briaia dukiara (Lawana Nani 127:4; Sins Lâka 29:17). Luhpiam nani ra wapni mangkaia ba klala yabaia baman tânka apia sa, kau ni witin nani tânka briaia sa dîa muni man nani bui lâ mangkisma ba (Sins Lâka 28:7). Baku sin, luhpiam nani ra lan dauks Gâd Bîla ba silp tânka briaia, bara Baibil smalkanka nani ba silp tânka pliki praptis munbia (Lawana Nani 1:2). Baku lika ai kupia dara walanka ba sunu pâwbia (Hibru Nani 5:14).

DÎA DAUKAIA SIP SMA:

• Yarka luhpiam nani ba Gâd ra ai pânika pali baku kaikbia, bara witin ra kasak lukaia

• Luhpiam nani ra hilp muns klir kaikbia anira rug lâka pâtka bâra sa, bara nahki baha pâtka wina plapaia, Internet ra rug lâka sâtka nani saki ba baku, apia kaka Internet ra pâna briaia plikisa taim. Baku sin, tuktan alki rug lâka dauki uplika nani ba wina nahki ai kaina kahbaia sin lan dauks