PÎSKA 8
Wan pamalika ra sari tara kum takisa taim dîa daukaia sa
“Naha dukiara man nani lilia brisma, ban kra aitani kabia, piu wiria pan traika kaikanka ailal pâtka brima” (1 Pita 1:6).
Ban kra, man trai munisma maritkam lâka bara pamalikam ba lilia kabia, ban sakuna sam taim pât kum kum ban wina takaia sip sa, bara liliam lâka ba tiwbia (Smasmalkra 9:11). Sakuna Gâd ba hilp wankisa wan trabilka nani pura luaia dukiara. Baibil dîa smalki ba man alki daukma kaka, man bara pamalikam ba trabil kau saura brima sin, pura luaia sip kama.
1 JEHOVA RA KASAK LUKS
BAIBIL DÎA SMALKI BA: “Trabilkam taki lukisma ba sut, Gâd mihta ra swis, kan witin lika man nani sut main mai kaikisa” (1 Pita 5:7). Kupiam krauks, man trabil brisma ba Gâd wina apia sa (Jems 1:13 TNM). Gâd wal asla pali sma kaka, witin kasak hilp mai munbia (Aiseya 41:10). “Witin ra aisas puram sunra ni kupiam aiska luki kira” (Lawana Nani 62:8).
Baku sin, diara wala maisam nihkbia ba sika, yu bani Baibil aisi kaiki bara stadi takaia ba. Baku daukma kaka, man latan kaikma nahki Jehova mita “pât nani sut yawan wahwi ba tilara witin yawan wan maisa nihkisa” (2 Korint 1:3, 4; Roman 15:4). Gâd pramis munisa “ai kupia kumi lâka bara upla tânka briaia praiska sut pura lui ba, witin maikbia” (Pilipai 4:6, 7, 13).
DÎA DAUKAIA SIP SMA:
-
Jehova ra makas hilp mai munbia trabil mapara pain lukaia bara kupia kumi lâka maikbia sin makas
-
Trabilkam nahki wapni mangkaia tnatka nani bâra ba pain laki kaiks, bara baku kau klir kaikma nahki pali wapnika mangkma
2 MAN WÎNAM TARA BARA PAMALIKAM MAIN KAIKS
BAIBIL DÎA SMALKI BA: “Ya sinskira bara lal swapni ba lika walbia, bara diara kau lan takaia plikbia” (Sins Lâka 1:5). ¿Pamalikam uplika bani dîa pali nit sa ki? Witin nani dîa dîa nit, bara nahki ai dara wali ba tânka pliki kaiks. Witin nani wal aisas bara turi mai aisabia taim pain wals (Sins Lâka 20:5).
¿Bara uplikam latwankira kum prubia kaka? Nahki damra walisma ba wis bara swiram bripara. Kupiam krauks Jisas sin “mahka inan” ai pânika pruan taim (Jan 11:35; Smasmalkra 3:4). Diara tara sa ris aitani briaia bara pain yapaia sin (Mark 6:31). Baku daukma kaka, man mampara kau isi kabia trabilkam ba pura luaia.
DÎA DAUKAIA SIP SMA:
-
Pât tara kum kau takras kainara, trai muns pamalikam wal piu bani aisi kaia. Bara baku, trabil nani takbia taim, witin nani mapara isi kabia man wal aisaia
-
Sim trabilka brin uplika nani wal aisas
3 DÎA HILPKA NIT SMA BA PLIKS
BAIBIL DÎA SMALKI BA: “Wan uplika piu bani ra latwan wan kaiki ba, wan kupia wirha bri piua ra, wan muihni wal baku sa” (Sins Lâka 17:17). Pâmnika nani ba hilp mai munaia want kabia, sakuna sam taim witin nani nu âpu sa nahki hilp mai munaia. Baha mita witin nani ra wis nahki hilp mai munaia sip sa (Sins Lâka 12:25). Baku sin, Baibil tânka bri uplika nani wina spirit lâka hilpka ba pliks. Witin nani ba Baibil smalkanka nani maikbia, bara baha wal man tâmra wama (Jems 5:14).
Gâd ra kasak luki uplika nani ba wal piu bani asla takisma sma kaka, tâ baikanka nit sma ba sâkma, kan witin nani sin Gâd pramiska nani ba bîla kaiki banhwisa. Baku sin, sari uplika nani ra man hilp muni si maisa nihkanka brima. Man Jehova ra kasak lukisma ba dukiara aisas bara ai pramiska nani dukiara sin. Upla wala nani hilp nit nani ra sin piu bani tâ baiki bas, baku sin latwan mai kaiki bara mai luki uplika nani lamara bas (Sins Lâka 18:1; 1 Korint 15:58).
DÎA DAUKAIA SIP SMA:
-
Pâna pain kum wal aisas bara swis hilp mai munbia
-
Dîa pali nit sma ba wis bara pâtkam ba dukiara param aisas
