Marit lâka kum ba pamali kum sa. Yaptikam bara aisikam ra ban rispik muni latwan kaiki kama, sakuna marit takram taim, man mayam ra kau kulkanka lâka marikaia sma. Ban kra baha kulkanka lâka ba man tamya nani, apia kaka mayam taya nani ba pain kaikras. Sakuna Baibil smalkanka nani ba hilp mai munaia sip sa witin nani wal kupia kumi lâka briaia, bara sim taimka ra mayam wal kau asla kaia.

BAIBIL DÎA SMALKI BA: “Aisikam bara yaptikam ba kulki bas” (Epesus 6:2). Man ba tiara, wahma, apia kaka almuk kama sin, aisikam bara yaptikam ra ban rispik munaia sma. Sakuna kupiam krauks, man mayam ba sin nit sa ai aisika bara ai yaptika wal taim luaia. Latwan lâka ba “tatumra lika apia” sa, bamna kupiam sauhkpara mayam ba ai taya nani wal asla takisa piua ra (1 Korint 13:4; Galesha 5:26).

DÎA DAUKAIA SIP SMA:

• Man pura praki aisapara, naha bîla baku: “Pamalikam piu bani daihra sakisa”, apia kaka “Yaptikam ba piu bani maipa buisa”

• Marit uplika nani ba trai kaikaia sa tânka briaia ai maya mita ai aisika nani ra dîa muni uba main kaikisa

BAIBIL DÎA SMALKI BA: “Waitna ba ai aisika bara ai yaptika sin swibia, bara ai mairka ra asla prawbia, bara witin nani wal ai tânka brih, wal ai wîna kumi takbia” (Blasi Sturka 2:24). Man marit takram ningkara, ban kra aisikam bara yaptikam ba lukbia man ra kau main mai kaikaia nit sa, bara maritkam lâka bisniska ra uba dimaia want kabia.

Man nani ba laki kaikaia sma dîa pitka kat want sma aisikam nani ba maritkam lâka bisniska ra dimbia. Sip sa trabilka ba dukiara klir aisaia, kuna kupiam baiki aisaia nit âpu sa (Sins Lâka 15:1). Bawan lâka, praut âpu lâka bara wihka bîla kaikanka lâka ba hilp mai munbia tamya nani bara mayam taya nani wal asla kaia, bara baku “pana pana walkam ra latwan lâka ba mariki kama” (Epesus 4:2).

DÎA DAUKAIA SIP SMA:

• Man tamya nani, apia kaka mayam taya nani ba maritkam lâka ra uba dimi ba mita wari takisma kaka, mayam wal aisas sakuna man nani pain damra walma taim

• Man nani kupia kumi taki aisas, naha sât trabilka nani ba nahki wapni daukaia ba