Pal smalki impakanka yumhpa ba Jerusalem ra danh takan. Bahara alkan. Tihmia kum silak watla ra kan taim, Jisas nakra marikanka kum ra win: “Rom ra wama bara baha tawanka ra smalkma”. Baku ba ra, Pal ra Jerusalem wina Sesaria ra brih wan. Bahara mani wâl silak ra kan. Yu kum, lâ daukaika pliska ba ra Festo mawan ra kan taim Pal makaban: “César, Rom ra, lâika daukbia want sna”. Festo pana win: “César ba lâmka daukbia want sma kaka, César ra wama”. Baku Pal ba but kum Rom ra auya kan ba ra mangkan. Muihni kristian wâl ai yula kahban: Luk bara Aristarco.

Kabu ra kan taim, yu ailal pâsa tara karna kum tilara kan. Sut prui banhbia lukan. Kuna Pal witin nani ra win: “Waitna nani, insal kum yapri sauhkan ra ai win: ‘Si bripara. Rom ra wama, bara but ra upla nani sut ba swakbia’. Baku bamna ¡kupiam karna bris! Yawan prubia apia”.

Yu 14 bilara pâsa tara mapara aiklaban ningkara, las kat tasba kaikan. Malta kî dakura kan. Butka ba walpa nani ra pruki pîs pîs ra baiwan, kuna impapakra 276 ba un ra wih swakwan. Kum kum nani yawi, wala nani but pîska nani alki awi un ra ulan. Malta uplika nani main kaiki bara pauta kum mukan lapta takbia dukiara.

Kati yumhpa luan ningkara, suldiar nani ba Pal ra but wala ra mangki Rom ra brih wan. Witin balan taim, muihni nani wan yamni briaia dukiara. Witin nani ra kaikan taim, Pal Gâd ra tingki win bara lilia takan. Pal silak uplika kan sakuna, mana aibapi watla kum ra swin diman, suldiar kum main kaiki kan. Bahara mani wâl takaskan. Upla nani witin ra wih kaiki kan nani ra King Lâka sturka smalki kan bara Jisas dukiara sin lan dauki kan. Pal Asia Menor bara Judia kangrigisanka nani ra wauhtaya sin ulban. Param sa, Jehova Pal ra yus munan kuntri nani ra Gâd sturka yamni nani ba brih wabia dukiara.