Jan Patmos kîka ra silak ra kan taim, Jisas naika takaia lilkika, apia kaka, nakra marikanka 16 yan kaikan. Baha marikanka nani ra, Jehova nina holikira kulkaia, ai Kingka Lâka balaia ba, ai kupia lâka tasba ra nahki daukan kabia heven ra dauki ba baku Jan kaikan.

Marikanka kum ra, Jehova heven ra ai king iwaika pranakira ra ba Jan kaikisa. King iwaika tnaya kir ra almuk nani 24 bâra sa. Kwala pihni dimi bara gul kraunka bapisa. King iwaika wina imyula ingnika bara alwani binka nani baku takisa. Almuk nani 24 ba Jehova mawanra bawi, mayunisa. Marikanka wala ra, Jan upla dakni tara kum kaikisa, nisan nani, tawan bara bîla aisanka nani sut wina Jehova ra mayunisa. Jisas, Sîp luhpia ba, sepadka sa bara rayaka laya karma ra tâ brisa. Ningkara, marikanka wala ra, Jisas bara almuk nani 24 wal heven ra king aimakisa. Marikanka wala ra, Jisas dragun wal aiklabi ba Jan kaikisa, baha sika Sitan, bara ai insalka saurakira nani. Jisas heven wina kangbi saki bara tasba ra lulkisa.

 Ba wina, Jan marikanka pranakira kum ra Sîp luhpia bara upla 144.000 Saion ilka ra bui ba kaikisa. Baku sin insal kum tasba aiska purak pâli aisi auya ba kaikisa: “Man nani Gâd ra kulks bara mayunra yas”.

Marikanka wala ra, Armagedan warka ba kaikisa. Baha warka ra, Jisas, ai suldiarka nani Sitan bara ai tasbaya saurakira ra pura luisa. Marikanka las ra, heven bara tasba ra kupia kumi lâka aihwa ba Jan kaikisa, sut asla bara lamni lâka ra iwisa. Sitan bara ai uplika nani ra sauhki ba sin kaikisa. Heven bara tasba ra, Jehova nina ba upla sut holi baku kulkisa bara witin ra baman mayunisa.