UPLA WAL AISAIA TÂ KRIKS
SAPTA 3
Kupia yamni lâka mariks
Baibil wina smalkanka ba: “Latwan lâka bri uplika ba […] upla yamnikira sa” (1 Ko. 13:4).
Jisas dîa daukan ba
1. LILKA ba kaiks, apia kaka Jan 9:1-7 aisi kaiki, naha makabi walanka nani laki kaiks:
-
¿Jisas ba pas dîa daukan: waitnika blain ra rakan, apia kaka Gâd sturka yamni nani dukiara pas aisan ki? (Jan 9:35-38 kaiks).
¿Jisas dîa daukan ba wina yawan dîa lan takaia sip sa ki?
2. Yawan uplika ra luki ba marikisa kaka, witin wan walaia kau wilin kabia.
Jisas daukan baku dauks
3. Uplika ra lukisma ba mariks. Nahki ai dara wali ba ra lukaia trai muns.
-
Naha makabi walanka nani ra wirâ luks: “¿Witin dîa dukiara uba lukisa kaia sa? ¿Dîa dukiara aisamna kaka, kau nu takan daukbia bara witin ra hilp munbia?”. Naha makabi walanka nani ba hilp mai munbia kupia yamni lâka marikaia dukiara.
-
Uplika dîa mai aisi ba aman wals, baku witin ra lukisma ba marikaia sip sma. Witin ai trabilka, apia kaka nahki ai dara wali ba dukiara mai aisisa kaka, diara wala dukiara aisaia trai munpara.
4. Kupia yamni lâka bara rispik lâka wal aisas. Yawan upla kum ra rait lukisa taim, witin ra hilp munaia want sa, bara baha ba nahki aisi ba wal latan marikisa. Baha mita dîa aisaisma ba, bara nahki wiaisma tnatka ba aman laki kaikaia sma. Dîa uplika kupia sauhkaia sip ba dukiara aisapara.
5. Hilpkam yas. Sanska bâra sa kaka, uplika ra hilp muns. Kupia yamni marikisma kaka, uplika ra Baibil wina aisaia sanska brima.
