Muihni lakri latwankira nani:

Yawan Gâd bara upla nani ra latwan kaiki ba mita, naha bîla nani alki daukaia wan kupia bukisa: “Man nani nisan sut uplika nani ra was, bara yang disaipilki nani dauki banhs; tahbi dauki banhs” (Mt. 28:19, 20; Mk. 12:28-31). Latwan lâka aihwa ba karnika tara brisa. Baha mita yawan naha sât latwanka lâka marikisa kaka, “raya ban kaia lâka briaia” dukiara Gâd sturka yamni walaia wilin nani kupia alkaia sip sa (Ap.St. 13:48).

Piua luan ra yawan smalkaia warkka ra trai muni kan, upla nani ra wan sinska wina Baibil tânka nani marikaia, bara ulbi sakanka nani yabaia. Kuna nanara, yawan upla wal aisisa taim kau lankira kaia nit sa. Upla nani kau dîa luki ba dukiara yawan aisisa taim, latwan lâka marikisa. Upla kumi bani sât wala ba mita, sim lukanka bara sim trabilka nani briras sa. Baha mita yawan tânkira kaia sa, bara upla wal aisisa taim, kumi bani nitka ra luki, smalkaia tnatka chens munaia wilin kaia sa. Bara naha wauhkataya ba, ¡baku daukaia hilp wan munbia dukiara ridi daukan sa!

Naha wauhkataya ba sapta 12 brisa, bara daukanka painkira nani 12 dukiara aisisa. Naha daukanka nani kumi bani ba upla nani ra latwan lâka mariki, disaipil nani daukaia dukiara hilp wan munbia. Smalkaia warkka ra daukanka painkira nani marikaia dukiara, sapta bani ra Jisas apia kaka pas kristianka sturka kum wina smalkanka kum saki, nahki alki daukaia sip ba lan wan daukisa. Nanara, wan sinska wina Baibil tânka upla ra smalkaia watlika ra, wan latwanka lâka marikaia tnatka nani plikisa. Naha wauhkataya ra daukanka painkira nani smalki ba sut yawan pakaia nit sa, kuna tila wina kum kum ba smalkaia warkka ra upla wal aisaia tâ krikaia, kli wih kaikanka nani daukaia, bara Baibil stadika yabaia dukiara tânka tara brisa.

Saptika bani stadi takma taim, luki kaiks, upla ra smalkisma piua ra naha daukanka nani nahki alki daukaia sip sma ba. Smalkaia tnatka nani sut purkara, Jehova bara upla nani ra latwan kaikaia ba kau tânka tara brisa. Baha mita naha latwanka lâka paki karna bri kaia dukiara, dîa sip sma ba sut daukaia trai muns. Kan baku daukma kaka, sip kama disaipil nani daukaia.

Man nani wal kumi baku wark takaia ba kulkanka tara kum sa (Sof. 3:9). Upla ra latwan kaiki, disaipil nani daukaia warkka tâ baikaia dukiara dîa dauki banhwisma ba sut, ¡Jehova ai kupia pihnika lâka wal blisin mai muni banhwi kabia!