Mani 2020, julio kati bara agosto kati ra pas trip tasba aiska ra muihni lakri nani ba sim piua ra sim aidrubanka kau tara programka ba kaikbia. Kan tasba aiska ra coronavirus pandemika taki ba mita, plis kum ra upla manis sim piua ra aidrubaia sip apia sa. Baha mita aisanka nani ba bîla aisanka 500 kau pura ra bîla laki grabar munaia kan. Raitka pali ba bahamuna warkka daukaia dukiara mani kum apia kaka kau pura nit sa. Sakuna mani 2020 Aidrubanka Kau Tara “¡Piua bani lilia bas!” ba dis kati 4 bilkara bîla laki grabar munaia danh daukaia kan.

 Tasba Aiska Apiska Kau Tara ra wark taki Tasba Aiska ra Diara Atki Apiska bara Bîla Lakaia Tâ Baiki Apiska ba baha warkka tara pali ba tâ baikan. Bîla Lakaia Tâ Baiki Apiska ba kaikan bîla lakaia daknika nani ailal ba kau tuls nani nit sa. Kau pali micrófono kau pain ba nit kan. Tasba Aiska ra Diara Atki Apiska ba micrófono 1,000 atkan, bara pliska 200 ra blikaia ridi munan.

 Lalah uya tikaia apia dukiara, aima kum ra micrófono ailal atkan. Pas ba plis kum ra bliki, baha wina tasba aiska ra bîla lakaia daknika nani ra blikan. Micrófono kum ba 170 dalas kan, blikaia mana sin baha tilara sa. Aima kum ra wans atkan ba mita 20 % kau sipar atkaia sip kan.

 Abril kati bara mayo kati ra Tasba Aiska ra Diara Atki Apiska ba micrófono nani atki blikan. Baha piua ra pandemika tâka mita kampani ailal ba uya wark takras kan. Ban sakuna apis tara apia kaka laih wina bîla lakaia apiska nani ra wark taki bîla lakaia daknika aihkika ba mayo kati las deka nani ra masin dîa nit kan nani ba pat brin kan.

 Tasba Aiska ra Diara Atki Apiska pura kakaira Jay Swinney ba naku wisa: “Betel apiska nani bara kampani nani ba asla wark taki banhwan. Jehova spiritka holikira hilpka ba wal baman, lalah uya tikras kira isti pali naha warkka tara daukaia sip kan”.

 Bîla Lakaia Tâ Baiki Apiska Nicholas Ahladis ba naku aisisa: “Naha pandemika tâka mita bîla lalakra nani ba lata ra sip takras. Masin nani blikan ba witin nani kupia bukan. Plis sât sât ra wark taki kan kuna asla wark taki, aisanka, lilka bara lawana nani ba bîla aisanka 500 kau pura ra bîla laki grabar munaia sip kan”.

 Mani 2020 Aidrubanka Kau Tara “¡Piua bani lilia bas!” wina tasba aiska ra muihni lakri nani yamnika sakaia sip kabia dukiara, wark wala nani sin ailal daukan. Internet donate.pr418.com bara tnatka wala nani bâk man nani prisant wilinkira ni yabram ba mita dîa nit kan ba ridi munaia sip kan.