Baibil ba prapit aisan, wan piua nani ra war, tasba nikbanka, siknis sât sât, bara “diara sibrinkira nani” takbia (Luk 21:10, 11). 2022 smalkaia warkka manka ra, a naha prapit dahra aisanka nani aimaki auya ba, yawan param kaikan. Tânka kum baku, Ucrania kuntrika war aiklabanka ba kau danh takras sa, bara upla milian nani rayaka ra ambuk munisa. Tasba aiska ra COVID-19 sikniska ba ban bâra sa. Baku sin, upla manis ba tasba sauhkanka nani tâka panis wahwan sa, Haiti kuntrika ra tasba nikbanka takan, bara Centro America, Pilipinas, bara sudeste Afrika ra pâsa tara nani mita sauhkan. ¿Naha tawanka nani uplika ra Jehova witniska nani ba nahki hilp munan sa ki?

 2022 smalkaia warkka manka ra, wan asla takanka ba 200 tasba sauhkanka nani takan ba ra, hilp munaia warkka daukan. Bara baha dukiara, 12 milian dalas ba yus munan. b Tasba sauhkanka wala nani tâka panis wahwi nani ra hilp munaia dukiara, prisant nani nahki yus munan ba kaisa kaikaia.

 Agosto kati yua 14, 2021 ra, Haiti kuntrika waupasa tani ra tasba nikbanka tara kum, karnika (magnitud) 7,2 bri ba takan. Sari sa kuna, kristian mairin wâl bara kristian waitna kum pruan. Naha tasba nikbanka wina swakwi takan uplika nani ra, ai wîna tara lainka ra bara nahki ai dahra wali ba ra, kasak ambuk munan sa. Jehova witniska kum, nina Stephane ba naku wisa: “Tawan ra upla manis pruan ba mita, kati wâl bilkara wik bani upla ra biki kan”. Jehova witniska wala, nina Éliézer wi ba sin naku wisa: “Jehova witniska nani manis ba utla, kwala, sus, bara ai nitka wala nani âpu takaskan. Baha purkara, tadi tasba nikbi kan ba mita, upla manis ba kati ailal sibrin lâka ra iwi kan.”

 Wan asla takanka ba mahka hilp munaia tâ krikan. Haiti Betel Apiska ba tint watla, plastik, matras, telepon dukiara batri nani, bara plun 53 ton nani kau pura yuan. Baku sin, utla handat kau pura ba kli paskan, apia kaka kli mâki banhwan. Baha hilp munaia warkka dukiara, 1 milian dalas kau pura yus munan.

 Wan muihni lakri nani ba kasak tingki luki banhwisa. Lorette ba naku aisan: “Tasba nikbanka ba waitla bara warkki bri kapri ba sauhki tikan. Plun piaia kat sin âpu banhwi kapri. Sakuna Jehova asla takanka ba wan lama kat kan, bara dîa nit kan ba sut wankan”. Micheline sin naku aisan: “Yang bara luhpi wâl ba utla sirpi bara almuk kum ra iwi banhwi kapri. Baha mita tasba nikban taim, waitla lupia ra kasak sauhkan. Yang puri sunaia baman sip kapri, bara Jehova ai asla takanka bâk ansa ai munan. Muihni lakri nani hilpka ra tingki, nanara utla painkira kum bri banhwisna. Jehova yang dukira diara ailal daukan, baha mita witin ra tingki lukisna ba yu bani marikaia want sna”.

 Wan hilp munaia warkka ba, tawanka tâ bri uplika nani sin kaikan. L’Asile tawanka wihtka kum ba naku win: “Man nani hilp munaia dukiara isti pali bali banhwram ba mita, tingki mai wiaia want sna. Baha purkara, wihta nani ra rispik lâka mariki banhwisma. Man nani ba upla ra hilp munisma taim, lalah an tikbia dukiara lukras sma, kau ni, upla nani ra latwan kaikisma ba mita daukisma ba param sa. Baha kaikaia laik pali sna”.

 Enero kati yua 24, 2022 ra, prari tara Ana Mozambique kuntrika ra diman, bara baha ningkara Malawi kuntrika ra wan. Baha tâka lisamra tara takan, bara pâsa karna ba awar kum ra 100 kilómetros (62 millas) krawi kan. Lait âpu takaskan, briks nani sauhkan, bara lisamra tara nani dingkan.

 Malawi bara Mozambique kuntrika nani ra naha prarika tara takan ba mita, 30,000 Jehova witniska nani panis wahwan. Hilp munaia warkka tâ baikan kristian waitna, nina Charles ba naku win: “Muihni lakri nani diara sut lus tiwi, nahki panis wahwi ba kaikri taim, kupi kriwan. Bara kasak sari daira walri”. Baku sin, plun suni bri kan pliska ba, bara insla nani ra sin sauhkan. Ai watla lus tiwan nani sin ailal bâra kan. Sari sa, Jehova witniska kum ba ai maya mairin, bara ai luhpia mairin wâl lus tiwan; witin nani ra swaki sakan taim, durika ba abakwan, bara pruri banhwan.

 Naha prarika ba aihka pali kan. Malawi kuntrika Nchalo tawanka ra pamali Sengeredo ba, 1:00 aklak titan ra bin aihka kum walan: kaikan taim lisamra tara ba ai watla purara aula kan. ¡Lî uba auhan ba mita, awala wâl ba banhwan kan! Witin nani utla wina mahka takaia wahbi sakan. Baku daukan ba pain kan, kan ai watla wina takan ningkara, lisamra ba ai watla sauhkan bara dîa bri kan ba sut awala mita brih wan. Pamali Sengeredo ba 2 awar baku Asla Aidrubanka Watla kat wapan. Lisamra takras kainara, witin nani 30 minit baman wapi kan. Witin nani buswan bara swapan kan, kuna ai rayaka kaina kahbaia sip kan.

 Malawi bara Mozambique Betel Apiska nani ba, hilp munaia warkka mahka asla daukan. Impaki pura kakaira nani bara kangrigisan almukka nani ra makaban, naha tasba sauhkanka tâwan panis wahwi muihni lakri nani nitka ba laki kaikbia, baku sin ai wîna tara bara spirit lainka ra tâ baikanka yabia sin. Hilp Munaia Daknika manis asla daukan, naha warkka pura kaikaia dukiara. Witin nani ra tingki, isti pali muihni lakri nani ra plun nani, bara ai nitka dukiara diara wala nani yuaia sip kan. Naha hilpka yabaia dukiara 33,000 dalas yus munan, bara utla nani mâkaia dukiara 300,000 dalas kau pura yus munan.

 Hilp Munaia Daknika nani ba lalah prisantka nani tânkira yus munan, bara naha ba tânka tara bri kan. Kan diara nani praiska ba ulan kan. Tânka kum baku, Malawi kuntrika ra upla nani kau pi ba sika aya plawarka. Naha warkka tâ krikan ba wina kati 7 nani ra, naha mana ba 70 % baku ulan. Baku sin, gias mana ba ulan. Hilp Munaia Daknika ba, plun atki pliska tara nani wina wans ailal atki kan, baku lalah uya tikras kan. Bara baku dauki kan ba mita, naha pliska nani ba plun ba kau sipar atki kan, bara lalah takaskan ba wal naha dukia nani plis sât sât ra blikaia sip kan.

 Naha warkka ba Jehova napakanka nani sut ra kupia nikbisa. Mozambique kuntrika wina kristian waitna kum, nina Felisberto naku win: “Rayaki aiska ra asla takanka kum, naku kupia pihni lâka mariki ba kaikras kapri: wamtla kli mâkaia dukiara dîa nit sma ba maikisa, ai uplika nani hilp mai munisa, plun maikisa, bara diara sut ba latwan lâka wal tâ brisa. Naha asla takanka ba, Jisas Jan 13:34, 35 ra smalkan latwanka lâka mariki ba klir sa”. Malawi kuntrika wina kristian mairin kum, nina Ester ba piarka sa, bara tasba sauhkanka tâwan ai watla lus tiwan. Witin naku aisan: “¡Uba wari taki kapri! Utla wala mâkaia dukiara lalah âpu kapri. Muihni lakri nani utla wala mâki aikan taim, paradais ra kapri baku daira walri”.

 Tasba raya kau balras ba ra, tasba sauhkanka nani ba ban ailal taki kabia (Matiu 24:7, 8). Kuna, kupia pihni wal lalah prisantka yabi banhwisma ba ra tingki, kasak luki banhwisna Jehova uplika nani ba hilpka lâka nit ba ban bri kabia. Lalah prisantka nahki yabaia sip ba kaikaia dukiara, Internet pliska donate.pr418.com ra dimi kaikaia sip sma. ¡Kupia pihni lâka mariki banhwisma ba mita yawan tingki lukisa!