Mani 2020 aidrubanka kau tara ba mani wala nani ba wal sât wala kan. Pas trip, programka sut ba lilka alki, tasba aiska ra Internet bâk marikaia sip kan. Ban sakuna, Malaui bara Mozambique wan muihni lakri nani ba Internet yus munras kira, naha aidrubanka kau tara ba kaiki banhwan. ¿Baha nahki sip kan?

 Tâ Bri Daknika ra Tâ Brabrira nani Daknika bara Smalkanka Pura Kaiki Daknika ba Malaui bara Mozambique ra baman, aidrubanka kau tara ba radiu bara tilivisan ku bribia sanska yaban. ¿Dîa muni baku daukaia nit kan? Malaui ba tasba aiska ra Internet kau mana pliska kum sa. Baha mita, Jehova witniska nani wiria baman Internet ra dimaia sip sa. Malaui Sucursal Pura Kaiki Daknika wina, William Chumbi aisan: “Radiu bara tilivisan ku baman, muihni lakri nani ra spirit pata laki yabaia sip sa”. Malaui Sucursal Pura Kaiki Daknika wina wala, Luka Sibeko naku win: “Radiu bara tilivisan âpu kan kata, muihni lakri nani aihkika ba aidrubanka kau tara briras kaia kan”. Mozambique ra sim dukia takan. Muihni lakri nani wiria baman, celular nani atki briaia sip sa, bara Internet ra dimaia kau karna munisa.

 COVID-19 sikniska tâka mita, wik bilara wan aidrubanka nani ba radiu bara tilivisan ku yabi kan. a Kristian waitna nani ba awar kau makabi banhwan, aidrubanka kau tara ba radiu ku yabaia sip kabia sapa.

 Malaui ra wan muihni lakri nani ba trabil wala wal prawi banhwan. Radiu bara tilivisan aihkika nani ra sanska yabisa awar kumi baman programka mangki kaia. Kan programka uba yari nani kaka, wali nani ba tayat takisa. Ban sakuna, witin nani ra param win, wan warkka ba tawan uplika nani yamnika dukiara sa. Wibia kaka, sikniska saura tâka, upla ai watla ra takaskan nani ba ra Baibil sturka nani walaia sanska yabisa. Baha ba witin nani ra hilp munaia sip sa, upla kau pain nani takaia, bara pamali lilia kum bri banhwaia. Baha tânka wali banhwan ba ra, kau awar ailal program mangkbia swin.

 Malaui ra, radiu kum bara tilivisan kum bâk aidrubanka kau tara ba mangkan, wâlsut ba kuntri aiska ra upla milian nani wali kaikaia sip ba. Mozambique ra, radiu nani 85 bara tilivisan kum ra aidrubanka kau tara ba mangkan.

 Tilivisan ra mangkaia dukiara 28.227 dalas nani, b bara radiu ra mangkaia dukiara 20.000 dalas prais kuntrika wâl ra tikan. Aidrubanka kau tara radiu ra mangkaia praiska nani ba, radiuka kum kum ra 15 dalas, bara kau laihura walaia radiuka nani ra 2.777 dalas nani kan.

 Muihni nani ba aman laki kaiki banhwan prisantka nani ba yus munaia dukiara. Wibia kaka, Malaui ra radiu kau sipar nani ba plikan. Aima kum ra, 30 % kau sipar daukan. Baku, 1.711 dalas nani apahkaia sip kan. Mozambique ra radiu kum kum ra praiska ba kau sipar kulkan, kan Jehova witniska nani ba ai tânka pain bara wapni, ai piua kat aibapi kan ba mita.

 Aidrubanka kau tara ba baku tnatka ra briaia sip kan ba mita, muihni lakri nani ba uba tingki luki kan. Malaui wina kangrigisan almukka kum, nina Patrick wi ba win: “Tâ Bri Daknika ra yang nani tingki luki banhwisna, naha sikniska piua ra yang nani ra baman baku daukan ba mita”. Malaui ra kristian waitna wala kum, nina Isaac bila: “Yang nani tnatka wala âpu, baha mita uba tingki luki banhwisna, aidrubanka kau tara ba radiu bâk walaia. Jehova asla takanka wina prisantka tara kum kan. Ba mita tingki, yang pamaliki aiska ba aidrubanka kau tara yamnika brin. Namhpa âpu sa, Jehova ai tawanka ra latwan kaiki ba”.

 Mozambique ra smalki tataukra kum ba, pas trip aidrubanka kau tara 2020 ra diman. Witin bila: “Aidrubanka kau tara ba tilivisan bâk kaikaia ba, kupi krawan Jehova karnika sut bri ba. Sikniska saura ba mita sip alki takaskras kan, Jehova spirit pata ba waitla kat kahbi aikai kan ba. Param kaikri Jehova napakanka nani ba latwankira sa, bara kasak lukisna naha ba rilidian rait aihwa kum ba”.

 Kangrigisan almukka kum, nina Wyson bila: “Alba kasak sinskira ra tingki wiaia want sna, naha sikniska piua ra yang nani duki ra luki ba mita. Yang nani diara wiria brisna, tasba aiska ra pliska kau umpira kum ra iwi banhwisna. Kuna tingki, aidrubanka kau tara ba radiu bara tilivisan bâk bri banhri, bara yamnika ailal saki banhri”.

 Tâ Brabrira nani Daknika bara Smalkanka Pura Kaiki Daknika ba mani 2021 aidrubanka kau tara sin, plis kum kum ra radiu bara tilivisan ku mangkaia adar yaban. ¿Baha daukaia dukiara lalah ani wina sakan? donate.pr418.com ra mariki tnatka sât sât bâk prisantka nani yabi ba wal daukisa. Kupiam pihni lâka ba dukiara tingki mai wi banhwisna.