Mani 2021 enero kati ra, Tâ Bri Daknika ba maisa pakan Baibil stadi takaia hilpka raya kum, ¡Man lilia bas ban kaia ra! bukka ba sâkbia. a ¿Naha maisa pakan taim nahki damra walram ki? Canada kuntrika wina Matthew, nahki ai dara walan ba dukiara wan aisisa: “¡Kasak lukaia sip apia kapri! Dîa muni naha bukka ba ridi daukan ba, bara nahki yus muni kaikan ba aisanka nani bara lilkika nani wal tânka wan marikan taim, kau lilia daira walri. ¡Mahka yus munaia want kapri!”.

 Naha bukka ba Baibil stadika nani yabaia dukiara tnatka raya kum yus munisa, sakuna baha baman apia sa. Naha bukka na mihtam ra pat briram kaka, ban kra kaikram diara kum sât wala sa. ¿Dîa ba? Naha bukka ¡Man lilia bas ban kaia ra! nahki paskan tnatka ba.

 Wahia sâtka ba. ¡Man lilia bas ban kaia ra! bukka paskaia dukiara wahia twakni nit kan. ¿Dîa muni? Naha bukka ba kalat ailal wal lilka nani 600 kau pura brisa, Smalkisa bukka ba wal kau aima 10 prais. Baku sin wahia nani ra pîs ailal imhti sa, ulbanka bara lilka nani âpu. Baku ba mita trabil kum takisa. Wahia ba uba tanhta sa taim, wahia wala lilkika nani wirâ kaikisa. Baku takbia apia dukiara, Nueva York tawanka ra, Wallkill tasbaya ra, Prin Muni Tasba Aiska Daknika ba wahia sâtka walhwal yus muni prin munaia wan masinka nani wal prin muni kaikan. Tâ Bri Daknika ra Ulbi Sakanka Paskaia Pura Kaiki Daknika ba dîa prin munan ba laki kaiki ani wahia kau twakni kan ba wahbi sakan. Naha wahia ba 16% kau mana sa yawan wahia nani yus muni ba wal. Ban sakuna, stadi tatakra nani Man lilia bas bukka yus munisa taim ai sinska mangkaia hilp munisa, kan wahia wala lilkika nani sip kaikras.

 Bukka taya ba. Man lilia bas bukka taya ba buk wala taya nani wal sât wala sa, kan diara wala kum kau pain wal paskan sa. Buk taya wala nani ba diara lipi wal paskan sa, kuna naha bukka taya ba lipras ba mita mawan lilkika ba kau klir kaikisa. Baku sin, naha sât pura prakaika ba buk isti aisawbia apia dukiara hilp munisa. Nawas pura prakaika lipras ba aima 5 prais kau mana kaia sip sa pura prakaika lipi nani ba wal. Baha mita apis tara sât sât asla wark takan, pura prakaika lipras kum kau sipar sakaia dukiara.

 ¿Dîa muni dukia mana nani yus munisa ki? Prin Muni Tasba Aiska Daknika ra wark taki witnis waitnika kum naku aisisa: “Naha bukka pat pat yus munai ba mita, piua wihka wabia dukiara luki paskan sa”. Brasil Apiska Tara Prin Munaia Daknika ra wark taki Eduardo bila wisa: “Jehova asla takanka ba naha sât dukia pain nani wal bukka paskan ba mita uba lilia wan dara walisa. Baku sip kabia piua wihka naha bukka yus munaia, bara prisant nani ba sin tnatka pain kum ra yus muni kaia”.

 Man lilia bas bukka ba 2021 marzo kati ra prin munaia tâ krikan. COVID-19 sikniska tâka kaina prakanka raya nani sât sât bâra kan. Naha sikniska tâka Betel apiska nani sut prakan, baha mita lata wina prin muni masinka nani wal wark taki uplika nani ba sip ai hilpka yabras, baku sin Betel uplika nani raya sip paiwras kan. Baha piua ra sam taim upla aitani âpu kan, bara prin muni pliska nani ba gabamint lâka nani mangkan ba mita piua kum ra ai warkka takaskan.

 ¿Naha kaina prakanka nani nahki pura luan? Prin munaia mahka kli tâ krikan taim, Betel bilara apis wala nani ra wark taki uplika nani kum kum ra makaban prin munaia warkka ba tâ baikbia. Prin Munaia Tasba Aiska Daknika ra wark taki Joel ba naku wisa: “Witin nani kupia pihni bara diara raya lan takaia wilin kan ba mita wan warkka sut danh munaia sip kan”.

 Kaina prakanka ailal bâra kan, kuna Man lilia bas bukka ba milian milian pat prin munan sa, baha dukiara paskaia dukia nani ailal nit kan. Baha tilara prin munaia ayanka, taya prakaika, wahia, ink bara wahia prakaia dukia. Prin munaia tâ krikan ba wina pas 5 kati nani ra, naha dukia nani ridi daukaia dukiara 2,3 millones dalas kau purara tikan sa. Lalah pain yus munaia dukiara, kangrigisan nani buk an nit nani baman prin munaia trai munisa.

 ¿Baibil stadika yabi nani bara stadi taki nani ba naha bukka raya wal nahki ai dara wali banhwisa ki? Australia wina Jehova witniska kum nina Paul ba naku wisa: “Naha bukka yus muni Baibil klaska nani yabaia uba laik sna. Wan sinska mangkaia bara pana pana aisaia isi sa bara diara manis asla mangkan sa, smalkanka nani, tihu laki kaiki makabi walanka nani, lilka nani bara stadi tatakra nani dîa daukaia nit ba sin marikisa. Paskanka painkira kum sa; naha bukka wal smasmalkra kau pain kum kaia want sna”.

 Stech kuntrika wina Baibil stadi tatakra kum naku wisa: “Naha bukka raya uba laik kaikisna. Lilka nani ba tâ lukanka tânka briaia dukiara hilp ai munisa bara video nani ba kupi bukisa dîa lan takisna ba alki daukaia”. Naha stadi tatakrika ba kangrigisan aidrubanka nani ra sut wisa, bara wik bilara aima wâl stadi takisa.

 Kau naha bukka ba bîla aisanka manis ra milian milian paski sakaia nit sa. Naiwa kat Tâ Bri Daknika ba adar yaban sa 710 bîla aisanka nani ra naha bukka paski sâkbia, Smalkisa bukka ba wal bîla aisanka 340 kau ailal brisa.

 ¿Naha warkka sut daukaia dukiara ani wina lalah sakisa ki? Tasba aiska warkka tâ baikaia dukiara prisantka nani ba wina sakisa. Naha prisantka nani aihkika ba donate.pr418.com bâk daukisa. Yawan kupia pihni lâka marikisma ba manakira kulkisa. Prisantkam nani ra tingki, upla nani Jehova ra kakaira takbia bara ban kaia ra iwaia sip kabia dukiara Baibil stadi takaia hilpka nani sakaia sip sa (Lawana Nani 22:26).