Nanara Jehova witniska nani ba Baibil wina ulbi sakanka bara lilka nani digital tnatka ra kau ailal brisa. Sakuna lalah trabilka tâwan, pliska ailal ra muihni lakri nani ba Internet yus munaia sip apia sa. Baku sin plis kum kum ra piua bani lait âpu sa, Internet ba tawa plapisa, apia kaka âpu sa.

 Sakuna nanara, ¡muihni lakri ailal Internet briras kabia kra sin, ulbi sakanka nani alahbi briaia sip sa! ¿Nahki tnatka ra?

 Kangrigisan nani Internet pain briras ba ra JW Box ba blikisa. Kampani kum wina atkan rúter kum, Betel Apiska Computadora nani Main Kaikaia Daknika mita paskan programa yuskira kum bara jw.org ra dîa bâra ba JW Box bilara asla brisa. JW Box kum ridi daukaia dukiara 75 dalas nit sa.

 Muihni lakri nani ba Asla Aidrubanka Watla ra wifi ku JW Box ra kanek munaia sip sa bara silp ai celularka apia kaka sâtka wala nani ra ulbi sakanka bara lilka nani alahbi briaia sip sa. Celular almuk apia kaka sipar dukia kabia kra sin sip sa yus munaia. Kangrigisan kum Internet briras sa kaka, ¿nahki tnatka ra ulbi sakanka raya nani briaia sip sa ki? Apis tara ba dîa dîa raya takan nani ba jw.org wina memoria USB nani ra dingki, piua bani kangrigisan nani ra blikisa. Kangrigisan nani ba baha memoria USB ba JW Box ra tâ mangki yus munaia sip sa. Memoria USB kum ba 4 dalas ra ridi daukaia sip sa.

 ¿JW Box ba nahki tnatka ra muihni lakri nani hilpka takisa ki? República Democrática del Congo kuntrika ra iwi aisa kum, nina Nathan Adruandra ba naku aisisa: “Aima ailal trai munri ‘Oh Jehová, en ti confío’ bara Acuérdense de la esposa de Lot Baibil pulanka lilkika nani alahbaia. Sakuna sip apia kapri. Uba sari daira walri. Sakuna, nanara baha lilkika nani celularki ra alahbi brisna. Baha nani ba luhpi nani ra kau pain smalkaia hilp ai munisa”.

 Nigeria kuntrika ra kristian waitna kum ba kangrigisan nani ra hilp munisa JW Box yus munaia dukiara. Witin naku wisa: “Muihni lakri nani ba lukisa JW Box ba Jehova wina prisant painkira kum. Smalkaia hilpka ulbi sakanka bara lilka nani tnatka isi ra alahbi briaia sip ba mita uba lilia banhwisa”.

 JW Box 1.700 kau pura ba Aprika, Oceanía bara Sudamérica kangrigisan nani ra blikan sa, bara kangrigisan kau ailal ra sin blikaia lukisa. ¿Baha dukiara lalah ba ani wina sakisa? Tasba aiska ra smalkaia warkka ra prisant yaban ba wina sakisa. Upla manis Internet donate.pr418.com bâk lalah prisant yabisa. Man nani kupiam pihni prisant yabi banhwisma ba mita yawan tingki lukisa.