“¡19 mani ban bîla kaiki kapri!”. ¿Diaura bîla kaiki kan? Traducción del Nuevo Mundo de las Escrituras Griegas Cristianas Bengalí bîla ra. Upla manis sim sât aisisa ai yapti bîla kat Traducción del Nuevo Mundo Baibilka sakisa taim. Sakuna ¿baha Baibilka nani ba nahki bîla laki paskisa?

 Pas ba, Tâ Bri Daknika ra Ulbi Sakanka Paskaia Pura Kaiki Daknika mita bîla lakaia daknika kum mangkisa. ¿Baibil bîla lakaia dukiara piua an nit sa? Warwick (Nueva York) ra Bîla Lakaia Warkka Tâ Baiki Daknika ra wark taki Nicholas Ahladis ba naku aisisa: “Diara sât sât ra lukaia sa. Bîla lalakra an bâra sa baha warkka tâ baikaia sip ba, bîla aisanka ba ani pitka kat karna sa, aisi kaikbia nani ba Baibil piua dukiara ani pitka kat kakaira sa sapa. Baku sin lukaia sa, sim bîla aisanka sa kuna pliska bani sât wala aisisa sapa. Baha mita wiaia sip sa, Grik bîla ni ulban pîska baman bîla lakaia dukiara mani kum, apia kaka mani yumhpa nit sa. Baibil aiska bîla lakaia dukiara mani 4 apia kaka kau piua wihka nit sa. Sain bîla sa kaka, kau piua yari nit sa”.

 Baibil bîla lakaia warkka ra bîla lakaia daknika baman wark takras, pliska sât sât wina upla manis mana luha tâ baikisa. Kum kum ba ani bîla lakan ba aisi kaiki, nahki kaikan ba daknika ra aisisa. Baha ba bîla lalakra nani ra hilp munisa Baibil kau kasak, kler bara tânka briaia isi ba paskaia. Sudáfrica kuntrika ra Baibil bîla lalakra nani ra lan dauki kristian waitna kum ba naku aisisa: “Bîla lalakra nani ba nu sa naha warkka ba Jehova bara aisi kaikbia nani mapara pain pali daukaia sa”.

 Bîla lakaia danh takan ningkara, Baibil ba print muni paskisa. Baha dukiara kau wiria kabia kra sin dukia 10 nit sa: wauhkataya, ink, buk taya paskaia dukia nani, pegamento, buk taya pura prakaia dukia nani, wahia nani un ra kalat silbar mangkaia dukia ba, ani kat aisi kaikan ba mark munaia kwala lupia ba, cabezadas, buk nina prakaia dukiara carton ba, bara bukka wahia nani ba taibi prakaia dukia ba. Mani 2019 ra, baha dukia nani ridi daukaia dukiara 20 millones dalas kau pura nit kan. Sim manka ra Baibil print muni plis sât sât ra blikaia dukiara muihni lakri nani ba 300.000 awar kau pura wark taki banhwan.

 ¿Baibil paskaia dukiara dîa muni awar bara lalah ailal yus munisa? Tasba Aiska Print Munaia Warkka Pura Kaiki Apiska ra wark taki Joel Blue ba naku aisisa: “Ulbi sakanka nani paski ba tila wina Baibil ba kau tânka tara brisa. Baha mita yawan Baibil ba pain pali paski, wan Gâdka bara sturka yamni yawan smalki ba ra prana yabaia want sa”.

 Traducción del Nuevo Mundo Baibilka ba, aisi kaiki uplika nani nitka kat sâtka wala nani sin paskisa. Tila wina kum, bîla aisanka 10 ra Traducción del Nuevo Mundo Baibilka ba braille ra bâra sa. Baibil aiska braille tnatka ra paskaia dukiara 8 awar nit sa. Kumi bani ba twakni taki ba mita sut ra kulkisa taim, yarika ba 2,3 mita (7,5 pies) takisa. Baku sin buk taya ba wauhtaya wal paskan sâtka sin bâra sa. Kan silak watla kum kum ra baha sât bukka nani baman bilara brih waia sip sa.

 Traducción del Nuevo Mundo Baibilka ba upla nani kupia nikbisa. Kaisa sturka kum kaikaia. República Democrática del Congo kuntrika Tombe tawanka ra Kiluba bîla aisi kangrigisan kum bâra sa. Tombe tawanka kat kapital wina 1.700 kilumita (1.000 millas) kau pura brisa. Baha kangrigisan ba Baibil kumi baman bri kan, bara baha Baibil ra Kiluba bîla yus muni ba uba almuk kan. Aidrubanka nani ra aisanka ridi daukaia dukiara, Baibil kumi baman bri kan ba mita muihni kum yus munan ningkara wala ra laki yabaia kan, bara ningkara naha sin sim sât daukaia kan, baku sut yus munaia sip kan. Sakuna mani 2018, agosto kati ra Traducción del Nuevo Mundo Baibil aiska pali ba Kiluba bîla ra sakan, baku kangrigisan muihni lakri nani sut ba kumi bani ai Baibilka brin.

 Kristian mairin kum Alemán bîla aisi ba Traducción del Nuevo Mundo revisada ai bîla kat takan ba dukiara naku aisisa: “Pas taim yang wi kapri Baibil aisi kaikaia sna. Kuna nanara baku wiras, kau ni lukisna, ‘Ahkia kau aisi kaikaia sanska brimna ki?’”. Silak watla wina upla kum naku ulban: “Traducción del Nuevo Mundo Baibilka kum aikan, bara baha ba rayaki chens munisa. Aima kumi ra sin Gâd Bîla ba pain pali tânka briras kapri, kuna nanara lika. Jehova witniska nani dukiara kau nu takaia want sna. Baku sin nu takaia want sna Jehova witniska takaia dukiara dîa daukaia sna ba”.

 Ya ya Traducción del Nuevo Mundo Baibilka aisi kaiki nani ba lalah prisant yabi ba ra tingki luki banhwisa, kan baha wal Baibil paskaia sip sa. Tasba aiska smalkaia warkka ra nahki lalah prisant yabaia ba Internet donate.pr418.com ra tânka marikisa. Man nani kupia pihni lâka marikisma ba mita yawan tingki lukisa.