2022 manka marzo kati pas wikka ra, Internet pliska jw.org ra naha maisa pakanka yaban: “Uba lilia sa maisam pakaia, Tâ Bri Daknika ba wahbi sakan sa, gabamint nani COVID-19 sikniska dukiara wan alki takaski lâka kum mangkras kaka, abril kati pas wikka wina kangrigisan nani sut ba Asla Aidrubanka Watla kat asla takaia sip kabia”. ¡Tasba aiska ra Jehova witniska nani sut ba naha maisa pakanka aisi kaikan taim, lilia pali takan! Kuna COVID-19 sikniska ba kau danh takras kan. a Baha mita, asla aidrubi uplika nani ra kaina kahbaia dukiara, diara kum kum atkaia nit kan. Baku sin, Asla Aidrubanka Watla nani ra chens kum kum daukan. Mani wâl Asla Aidrubanka Watla nani ba yus munras kan, ¿kuna naha ba nahki daukan ki?

 Kangrigisan nani kristian waitnika nani ba wan Asla Aidrubanka Watla nani ra kli asla aidrubaia dukiara, kaina manis wina ridi taki kan.

 2020 manka ra Asla Aidrubanka Watla nani ra aidrubia apia wahbi sakan ba wina dis kati kum baman ningkara, Warwick (Nueva York) ra Tasba Aiska ra Diara Paski bara Mâki Daknika ba diara wâl laki kaikan. Pas ba, COVID-19 sikniska tâka, wan Asla Aidrubanka Watla nani yus munbia apia piua ra, nahki ambuk munbia ba. Bara kli asla aidrubia taim dîa daukaia nit kabia ba sin.

 Tasba aiska ra pliska bani dîa nit ba sât wala kan. Tasba Aiska ra Diara Paski bara Mâki Daknika ra wark taki Matthew De Sanctis ba win: “Plis kum kum ra wan mihta sikbaia pliska nani pliki sakaia karna sa. Asla Aidrubanka Watla kum ra lî waras kaka, laya ba atkisa, apia kaka tingni bara lî unta kum wina brih wisa”. Plis wala nani ra gabamint ba, lâ raya nani mangkan. Baha nani tilara kan, upla aidrubi pliska nani ra pâsa klin plapi kabia dukiara, masin nani mangkaia, bara sikniska wina wan wîna tara kaina kahbaia dukiara dîa daukaia nit ba, kutbanka nani ra ulbi mangkaia ba sin.

 ¿Kangrigisan nani ba naha lâka alki daukaia dukiara dîa daukan? Matthew ba wisa, Asla Aidrubanka Watla manis ba “tnatka pain kum pliki sakan, bara naha ba isi bara sipar kan”. Tânka kum baku, Papúa Nueva Guinea kuntrika ra, wan mihta sikbaia dukiara tnatka isi kum pliki sakan: 20 litros (5,3 gialan nani) bri plastik tankka ra paik kum mangki yus munan. Baha daukaia dukiara, Asla Aidrubanka Watla kumi bani 40 dalas baman tikan. Baku sin, Asia wina mihta sikbaia pliska nani tnatka isi ra paskan ba 6.000 kau pura atkan, bara Aprika kuntrika nani ra Asla Aidrubanka Watla nani ra blikan.

 Asla Aidrubanka Watla wala nani ra pâsa klin ban plapi kabia dukiara, masin raya nani mangkan, apia kaka pat bri kan masinka nani ra chens kum kum daukan. Kangrigisan ailal ra, micrófono kangbia apia dukiara dus yari nani atkan. Baku sin, sikniska yula upla wala ra laki yabaia apia dukiara, tadi pliska nani ba klin munaia bara mihta sikbaia trai muni kan. Baku sin tailit nani ra upla nani ai mihta sikbia taim, paik kangbraskira lî takbia dukiara masin kum mangkan. Chile kuntrika ra naha sât masinka mangkaia dukiara, Asla Aidrubanka Watla kumi bani 1.400 dalas baku tikan.

 Asla Aidrubanka Watla nani ra sikniska yula laki yabia apia dukiara dîa daukaia nit ba pas tâura mangkan, kuna sim piua ra lalah prisantka nani pain yus munaia trai munan. Tânka kum baku, kuntri kum kum ra gabamint hilpka yus muni, wan mihta sikbaia pliska bara micrófono dukiara dus yari nani ba atkan. Baku sin, Betel Apiska Tara nani ba lalah uya tikaia apia dukiara, dîa nit ba asla taki, aikuki atki banhwan. Betel Apiska Tara nani bara Tasba Aiska ra Diara Atki Apiska ba, dairik kampani nani wina diara nani atkan ba mita, lalah uya tikras kan bara kau isti briaia sip kan.

 COVID-19 sikniska wina wan kaina kahbaia dukiara kangrigisan nani dîa daukanka bara tingki, muihni lakri nani ba ai âuyapah, aidrubanka nani ra dimaia sip kan. Peru kuntrika wina kristian mairin kum, nina Dulcine ba Asla Aidrubanka Watla ra kli aidrubia walan taim, wira si bri kan. Witin naku wisa: “COVID-19 sikniska tâ krikanka ra, sikniska ba ai alkan. Baha mita, Asla Aidrubanka Watla ra kli waia dukiara namhpa namhpa luki kapri, kan kli sikniska ai alkaia sip sa lukri. Kuna Asla Aidrubanka Watla ra dimri taim, kangrigisan almukka nani wan kaina kahbaia dukiara, diara manis daukan ba kaikri. Wan mihta klin bri kaia dukiara alcohol batilka nani bâra bri kan, bara micrófono nani wan mihta ni alkbia apia dukiara dus yari nani yus muni kan. Baku sin, aidrubanka tâ krikras kainara, bara ningkara sin, diara sut klin muni kan. Kangrigisan dîa daukan bara tingki, sibrin âpu aidrubaia sip kapri”. b

 Zambia kuntrika wina kristian mairin kum nina, Sara ba trabil wala mapara buaia kan. Witin naku wisa: “kati kum kum luan ra mayi waitna ba COVID-19 sikniska tâka pruan. Baha mita, pas trip yakan Asla Aidrubanka Watla ra wamna taim, nahki daira walamna sapa uba luki kapri”. Nanara witin kli Asla Aidrubanka Watla ra wan ba wina, ¿nahki ai dara walisa ki? Witin naku win: “Asla Aidrubanka Watla ra aidrubanka nani brisna taim, ai marikisa naha las tnata yua nani ra Jehova yawan wal sa. Aidrubanka nani ra tingki, kangrigisan almukka nani bara muihni lakri wala nani wina lilia lâka, latwan lâka bara hilp nit sna ba briaia sip sna”.

 Asla Aidrubanka Watla nani ra kli aidrubaia sip ba mita, tasba aiska ra muihni lakri nani ba uba lilia ai dara wali banhwisa. Internet pliska donate.pr418.com bâk prisant yabi banhwisma ba mita, tingki mai wisa. Naha prisantka nani ra tingki, Asla Aidrubanka Watla nani ridi daukaia sip kan.