Mani bani upla manis tahbi daukan lâka bri ba mita, Jehova ra mayunaia watla nani kau nit sa. Diara Paski bara Mâki Daknika nani tasba aiska ra bâra ba, mani 2020 smalkaia warkka ra Jehova ra mayunaia watla nani 2.700 kau pura mâkan apia kaka kli paskan. a

 Sakuna COVID-19 pandemika ba tâ krikan. Muihni lakri nani rayaka ba kaina kahbi, sim piua ra gabamint dîa wi ba bîla wali daukaia dukiara, Tâ Bri Daknika ra Ulbi Sakanka Pura Kaiki Daknika ba wahbi sakan sa utla mâkaia warkka aihkika ba piua kum alki takaskaia. Sakuna mani 2020 smalkaia warkka ra pandemika kau tâ krikras kainara 1.700 kau pura mayunaia pliska mâkaia apia kaka kli paskaia warkka tnata aimakaia sip kan. Baha purkara apis tara nani dukiara daukaia kan wark tara 100 kau pura sin tnata aimakaia sip kan. Tila wina wâl ba kaisa kaikaia bara muihni lakri nani dîa yamnika sakan ba sin kaikaia.

 Camerún apiska tara. Duala tawanka ra kan apiska tara ba uba sirpi kan bara kli paskaia nit kan. Ulbi Sakanka Pura Kaiki Daknika ba kli paskaia dukiara laki kaikan. Sakuna kli paskbia kaka, baha optis watla mana praiska kau purkara lalah tikaia sip kan. Luki banhwan pliska wala ra apiska tara raya mâkaia, apia kaka optis watla kum atki kli pakaia. Sakuna wâl sut ba aitani apia kan.

 Baha piua ra muihni nani ba nu takan, Duala tawanka yahbra tani ra Asla Aidrubanka Tara Watla un kat yabal kum paskaisa. Baha yabalka mangkbia kaka, bahara waia kau isi kabia, baku sin lî bara lait trabilka nani âpu kabia. Apiska tara dîa nit kan ba kat kan. Baha mita Tâ Bri Daknika ba aitani lukan sa Asla Aidrubanka Tara Watla sim tasbaya ra apiska tara watla raya mâkaia.

 Jehova witniska nani wihki kampani uplika nani wal asla wark takan. Baha ba hilp munan sa warkka kau isti danh daukaia bara lalah kau wiria yus munaia. Las kat pas taim luki kan ba wal 2 millones dalas sipar takan. COVID-19 pandemika kau tâ krikras kainara Betel pamalika ba apis tara raya ra tawaia sip kan.

 Camerún kuntrika Betel uplika nani ba pliska painkira ra wark taki iwaia sip sa. Witin nani ba lukisa apiska tara watla raya ba Jehova wina prisant painkira kum. Marit kum ba naku aisisa, “Yang nani nâra karna wark taki, tingki lukisna ba mariki kaia want sna”.

 Laih wina Tojolabal Bîla Lakaia Apiska (México). Mani ailal, Tojolabal bîla lakaia daknika ba Ciudad de México tawanka lama kat Centroamérica apiska tara ra wark taki kan. Sakuna Tojolabal bîla kau aisi tawanka nani Altamirano bara Las Margaritas ba apiska tara wina 1.000 kilumita nani (620 millas) baku laihura sa. Baha mita bîla lalakra nani ba Tojolabal uplika nani nahki aisi ba walaia sanska uya briras kan. Bîla lakaia apia kaka grabar munaia dukiara, apiska tara kirka ra Tojolabal bîla aisi muihni lakri nani hilpka plikaia uba karna kan.

 Tâ Bri Daknika ra Ulbi Sakanka Paskaia Pura Kaiki Daknika ba want kan bîla lakaia daknika ba Tojolabal bîla aisi pliska kat mangkaia. Baha dukiara apiska tara ba wahbi sakan sa optis watla kum atki kli paskaia. Kan baku tnatka ra kau sipar takisa utla raya kum mâkaia apia kaka lin takaia ba wal.

 Bîla lalakra kum ba yamnika dukiara naku aisisa: “Apis tara ra bîla lalakra baku wark taki kapri 10 mani bilkara, Tojolabal bîla aisi pamalika kumi sin kaikras kapri. Sakuna nanara Tojolabal bîla aisi tawanka kat bîla laki banhwisna. Baha mita yu bani Tojolabal bîla aihwa walaia sip banhwisna. Bîla nani kau ailal lan takri, bara hilp ai munan kau pain bîla lakaia”.

 Mani 2021 smalkaia warkka ra, sip sa kaka, laih wina bîla lakaia apiska nani 75 bara Spirit Lainka ra Skulka daukaia watla nani mâkaia apia kaka kli paskaia lukisa. Apis tara nani 8 ra dîa paski kan ba kli tâ krikaia lukisa. Baha tilara sa Nueva York, Rámapo tawanka ra Tasba Aiska Apiska Kau Tara dîa paski ba, Argentina bara Italia apiska tara nani ba pliska wala ra lakaia warkka ba sin. Baha purkara Asla Aidrubanka Watla 1.000 kau pura raya mâkaia nit sa. Aidrubaia pliska 6.000 kau pura ba plis kau pain ra lakaia nit sa. Bara Asla Aidrubanka Watla 4.000 nani ba kli paskaia nit sa.

 ¿Baha sât utla mâkaia apia kaka kli paskaia dukiara lalah ani wina sakisa? Centroamérica Apiska Tara Pura Kaiki Daknika ra wark taki Lázaro González ba Laih wina Tojolabal Bîla Lakaia Apiska mâkaia warkka dukiara aisan taim naku win: “Centroamérica apiska tara mita pura kaiki kuntrika nani ba lalah uya briras sa. Tasba aiska muihni lakri nani hilpka âpu kan kaka, laih wina bîla lakaia apiska nani ba sip mâkras kan. Lalah tâ baiki ba mita, ani bîla laki bîla aisanka aisi pliska kat bîla lalakra nani ba wark takaia sip sa. Tingki wiaia want banhwisna tasba aiska muihni lakri nani kupia pihnikira yang nani ra tâi baiki ba mita”. Naha sât utla nani mâkaia warkka ba, tasba aiska smalkaia warkka ra lalah prisant yabi banhwisma ba ra tingki, daukaia sip sa. Internet donate.pr418.com wina lalah prisant blikaia sip sa.