Mani bani, tasba aiska ra piua aiska smalki tataukra manis ra paiwisa Nueva York, Patterson Lan Daukaia Pliska Watchtower ra dauki Galaad Skulka ra lan takaia. a Baha skulka ra lan daukisa Jehova asla takanka ra wark sât sât kau pain daukaia dukiara. Baha ra lan takan nani ba tasba aiska ra kangrigisan bara apis tara nani spirit lainka ra kau karna kaia hilp munisa.

 Muihni lakri nani kuntri sât sât wina Galaad Skulka ra dimisa. Mani 2019, aima 147 ra daukan klaska ra kuntri 29 wina muihni lakri nani 56 diman. Galaad Skulka ra paiwisa piua aiska Jehova warkka dauki nani tila wina. Betel uplika nani, impaki pura kakaira nani, misan uplika nani apia kaka piua aiska smalki tataukra nani baku.

 Pas deka tâ krikras kainara, piua wihka wina skulka ba ridi daukisa. Tasba Aiska Apiska Kau Tara ra Impakaia Tâ Baiki Apiska ba, skul ra dimbia nani dukiara plen pasiska aibapisa. Aima 147 ra daukan klaska ra, kumi bani dukiara 1.075 dalas baku aibapan, ai kuntrika wina Patterson kat impaki kli tawaia dukiara. Isla Salomón wina paiwan nani ba waia dukiara aima 4, bara kli tawaia dukiara aima 3 plen ra aimakaia kan. ¡Las kat 35.400 kilumita nani (22.000 millas) impakan! Witin nani kumi bani dukiara pasis 2.300 dalas baku aibapan. Lalah uya tikaia apia dukiara, Tasba Aiska Apiska Kau Tara ra Impakaia Tâ Baiki Apiska ba computadora programka yuskira kum yus muni pasis kau sipar ba plikisa. Pasiska aibapan ningkara sin, baha programka yuskira wal wik ailal, sam taim kati ailal ban wachka takisa kau pasis sipar takisa sapa. Plen pasiska aibapaia dukiara lalah watlika ra muihni lakri nani punto apahki prisant yaban ba sin yus munisa.

 Skul ra wabia nani aihkika ba Estados Unidos kuntrika ra dimaia dukiara visa kum briaia nit sa. Tasba Aiska Apiska Kau Tara Lâ Tânka Daknika ba baha tâ baikisa. Visa briaia dukiara upla kumi bani 510 dalas baku nit sa.

 ¿Witin nani skul ra dîa lan takan ba nahki tnatka ra wan yamnika takisa? Asia waupasa lalma tani ra kangrigisan almukka baku warkka dauki Hendra Gunawan kangrigisanka ra marit kum bâra sa Galaad Skulka ra lan takan ba. Witin naku aisisa: “Yang nani kangrigisanki ra tâura smasmalkra kumi sin âpu kan. Sakuna baha maritka balan taim, muihni lakri kum kum ba ai kupia bukan tâura smasmalkra takaia. Kan baha maritka wilinkira karna wark taki ba kaikan. ¡Ningkara lakri kum ba King Lâka Sturka Smalki nani Skulka ra waia sip kan!”.

 Sergio Panjaitan ba Galaad Skulka ra lan takan nani wal wark takisa Asia waupasa lalma tani apiska tara kum ra. Bara witin nani dukiara naku aisisa: “Witin nani dîa lan takan ba ai yamnika baman takras, yawan sut yamnika takisa. Diara manis lan takan kaia sa kuna baha tâwan tara pulras, dîa lan takan ba yawan wal sher munisa. Yawan sin witin nani wina dîa lan takan ba yus muni upla wala kupia bukaia sip sa”.

 ¿Baha skulka ra lalah nit taki ba ani wina sakisa? Tasba aiska smalkaia warkka ra lalah prisant yaban ba wina sakisa. Upla manis Internet donate.pr418.com bâk prisant yabisa. Man nani wilinkira ni prisant yabi banhwisma ba mita, muihni lakri nani ba tasba aiska plis sât sât wina baha skulka ra wih lan takaia sip sa.