“Patitara piua ra spirit pata ailal sakaia formato digital ra ba lika, sip apia baku kaikaia kan”. ¿Man sin baku lukisma ki? Naha bîla nani ba mani 2020 Tâ Bri Daknika wina diara raya #6 ra Geoffrey Jackson mita win. Baku sin win: “Sakuna nawas piua ra yawan tingki lukisa, kan coronavirus pâtka ba tilara JW Library ba kasak hilp tara kum sa. Jehova Gâd pas piua ba wina ridi wan sakisa”.

 ¿Jehova nahki wan smalki kan? ¿JW Library aplicaciónka paskaia dukiara dîa nani nit kan? ¿Bara dîa nit sa diara raya briaia dukiara?

 2013 mayo kati ra, Tâ Bri Daknika ba tasba aiska apiska tara MEPS programaciónka ra makaban Traducción del Nuevo Mundo Baibilka bri aplicaciónka kum paskbia. Naha apiska ra wark taki Paul Willies ba win: “Yawan aima kumi ra sin aplicación nani atki pliska ra aplicación kum mangkras kan. Paskaia dukiara, wark wala nani kum kum alki takaski, dakni kum ridi daukan, bara Betel ra apiska wala nani wal aikuki wark takan. Kasak wan pura sunan, bara Jehova hilpka kaikan: dis kati 5 ningkara, Tâ Bri Daknika mani bilara aidrubanka tara dauki ba ra aplicaciónka ba marikan”.

 Ningkara diara wala pura luaia kan: JW Library ra diara kau mangkaia kan, ulbanka nani kau ailal, bîla aisanka nani sât sât ra. 2015 enero kati ra, aplicaciónka ra Inglis bîla ra ulbanka nani aihkika ba pat dingkan, bara 6 kati ningkara, bîla aisanka handat handat ra ulbanka nani alahbaia sip kan.

 Muihni lakri nani wark sât sât daukan sa naha aplicaciónka kau pain kabia dukiara. Lilka nani dingkan bara aidrubanka nani ridi daukaia dukiara dîa nit ba sut bri pîska kum paskan. Baha purkara, Baibil tikska kum wina Baibil tânka plikaia hilpka ba sin kaikaia sip sa.[5]

 Kati bani 15 millones kau pura celular apia kaka tablet sâtka nani ra JW Library aplicaciónka ba yus munisa, naha nani wina 8 millones yu bani yus munisa. ¿Celular apia kaka tablet sâtka nani wal aplicaciónka na pain wark takbia dukiara dîa nit sa? Paul Willies naku wisa: “Naha warkka tnata âpu sa. Ban diara raya nani dingkisa, bara trai munisa upla nani mapara yus munaia kau isi kabia. Celular apia kaka tablet sâtka nani ba tnatka sât sât ra wark takisa bara tnatka raya nani piua bani brisa. Baha mita, aplicaciónka wal ban wark takisa. Bara, JW Library ra yu bani walaia dukia bara ulbanka nani dingki ba mita, wan computadora programka sinskira nani ba ban raya daukaia sa, bara main kaikaia sa. Naha piua ra, JW Library ra 200.000 ulbanka nani, 600.000 walaia dukia nani, baku sin lilka nani bîla aisanka sât sât ra brisa.

 Aplicación ra diara raya nani bri kaia dukiara, computadora nani wal baman wark takras. Computadora programka sinskira nani yus munaia raitka sât sât sin atkaia nit sa. Yus munaia raitka kumi baman dukiara, yawan aibapisa mani bani 1.500 dalas. Baha purkara, MEPS Programación Apiska ba computadora, tablet, bara celular sâtka raya nani atkaia dukiara, mani bani 10.000 dalas nani aibapisa, baku witin nani ba kaikisa aplicaciónka ba pain wark takbia sapa.[9]

 JW Library ra tingki, ulbi sakanka nani print munaia, bara blikaia dukiara lalah uya yus munaia nit apia sa. Examinando las escrituras diariamente wauhkataya dukiara wirâ luks. 2013 mânka ra 12 millones print muni paskan, 2020 mânka ra smalki tataukra raya nani 700.000 kau pura takan, kuna baha mânka ra naha wauhkataya ba dis 5 millones baman paskan. ¿Dîa muni? Wel, nanara muihni lakri nani manis ba JW Library ra yu bani tikska ba aisi kaikisa bamna.[10] a

 JW Library ba tnatka sât sât wal hilp mai munaia sip sa. Canadá ra iwi Geneviève ba lukisa, kau pain stadi munaia dukiara naha aplicaciónka ba witin ra hilp munan. Naku wisa: “Baibil stadi takaia dukiara, buk nani ailal sakaia sna kaka, raitka pali ba yu bani daukamna apia. Sakuna aplicaciónka wal dis tabletki angkaia baman, bara diara sut mihti ra brisna. Piua bani stadi takaia ba hilp ai munan, kasak lukan lâka kau karna kum briaia, bara kau Jehova lamara sna daira walaia dukiara”.[13]

 Kau ni, COVID-19 sikniska piua ra naha aplicaciónka ba uba yuskira sa. Estados Unidos kuntrika wina Charlyn ba naku wisa: “COVID-19 takan wina ulbi sakanka kumi sin aikras pat mani kum brisna. Sakuna JW Library ra spirit lainka ra dîa nani nit ba pliki sakaia sip sna. Jehova ra tingki yabisna naha prisantka painkira ba mita”.[14]

 Upla manis Filipina ra iwi Faye baku lukisa. Witin naku wisa: “Naha aplicaciónka na salit sa. Jehova lamara kaia dukiara dîa nit ba sut brisa. Titan aisi kaikaia, diara daukisna taim kupi buki dukia nani walaia, aidrubanka nani ridi daukaia bara Baibil stadi takaia dukiara yus munisna. Sans brisna taim, lilka nani sin kaikisna. Bara diara atkaia bîla kaikisna taim, Baibil bara wan ulbi sakanka nani aisi kaikaia dukiara sin yus munisna. ¡Naha aplicaciónka na pranakira sa!”.[15]

 Baku sin, smalkaia dukiara naha aplicaciónka ba diara painkira kum sa. Camerún kuntrika ra kristian mairin kum ba smalki tauki kan taim Baibil tikska painkira kum walan bara laik takan. Wik nani luan taim, witin tikska ba yus munaia want kan, kuna ani kan sapa ai kupia kraukras kan. Witin bîla: “Baha tikska wina pîska kum kupi krauki kan ba mita aplicaciónka ra wari, Baibil ra dimi pîska ba plikri. Aplicaciónka ra tingki, tikska nani âiya tiwan ba sakaia sip sna”.[16]

 Donate.pr418.com ra taki tnatka sât sât bâk man nani prisant yabi banhwisma ba ra tingki, JW Library aplicaciónka paskaia bara diara raya nani mangkaia sip sa. Baku tasba aiska muihni lakri nani ba yamnika briaia sip sa. Kupiam pihni wal prisant nani yabi banhwisma ba mita, tingki mai wisa.

1. 2013 Octubre kati: La revisión de la Traducción del Nuevo Mundo Inglis dukia ba aplicación aikuki takan.

2. 2015 Enero kati: Inglis bîla ra ulbi sakanka nani kau dingkan, bara ningkara bîla aisanka wala handat handat ra sin.

3. 2015 Noviembre kati: Tikska mark munaia dukia kum mangkan.

4. 2016 Mayo kati: “Reuniones” pîska ba mangkan.

5. 2017 Mayo kati: Ulbanka sirpi nani paskaia dukia kum mangkan.

6. 2017 Diciembre kati: Biblia de estudio vercionka ba Inglis bîla ra mangkan.

7. 2019 Marzo kati: Walaia dukia nani alahbaia, Internet ku lilka nani kaikaia bara Baibil tânka plikaia hilpka kaikaia dukia nani mangkan.

8. 2021 Enero kati: Man lilia bas wauhkataya wina Baibil stadika yabaia dukiara hilpka raya nani mangkan.[17]