Latinoamérica ra upla milian milian nani iwisa, tilara milian milian nani Indian tawanka nani ra iwi banhwisa, ai bîla aisanka bara ai iwanka tnatka nani silp bri banhwisa. Wan muihni lakri nani manis baha tawanka nani ra iwisa. Indian uplika nani Baibil wal kakaira takbia hilp munaia dukiara, yawan Jehova witniska nani ba Latinoamérica kuntrika nani ra, ulbi sakanka nani 130 bîla purkara bîla laki yakabi banhwisa. a Sakuna muihni lakri nani ailal ba witin nani ai tnatka nani ba tara kulki ba tilara trabil tara nani wal prawan sa. Jehova warkka daukaia trai muni banhwan ba mita, bara iwanka tnatka Baibil lâka mapara nani ba tilara dimras tâka mita. ¿Witin nani ra hilp munaia dukiara prisant nani ba nahki yus munisa?

 Mexico, Jalisco untika bilara Huichol tawanka kum ra muihni lakri nani ba rilidian daukanka nani tilara dimaia apia win, baha ba Baibil aisi ba mapara bamna. b Baha mita, tawanka lalka nani ba ai kupia baikan. 2017 tris kati (diciembre) 4 ra, upla daknika kum ai kupia baiki witnis nani kum kum ra alki banhwan. Bara baha tawanka wina kangbi saki banhwan, ai dukia sut sauhkan, bara sirang iki win kli nâra bali banhbia kaka sut iki banhbia.

 Tawanka wala nani ra witnis nani bâra kan ba, witin nani dîa nit ba sut yaban. ¿Sakuna kli ai watla nani ra waia dukiara dîa daukaia kan? Wan muihni nani tila wina kum nina Agustín naku wisa: “Yang nani lalah âpu kapri layar kum yus munaia, bara ani ra lâ plikaia sin nu âpu kapri”.

 Wan muihni lakri rilidian prika lâka ra saura munan ba mita, Centroamérica Apiska Tara ba mahka hilp munan. Pas ba tawanka sirpi nani tâ bri nani ba ra makaban dîa takan ba laki kaikbia. Ningkara, Jehova witniska nani Tâ Bri Daknika ra Tâ Brabrira nani Daknika ba blikan Apiska Tara ba Tasba Aiska Apiska Kau Tara Lâ Tânka Daknika wal asla taki, muihni lakri Huichol nani tâwan lâ dingkaia. Bara las kat Mexico lâka watla kau tara ba kat dimi wan.

 Tasba aiska layar nani dakni kum aisanka kum ra param pali win, upla wala nani sin Indian tawanka nani tnatka ba kulki kaia sa, tawanka nani ba ai uplika nani sut prika lâka ba kaina kahban kaia sa. Anira kabia sin upla raitka nani ba kulkaia sa.

 2020 pastara kati (julio) 8 ra, baha kuntrika lâ watla kau tara ba asla taki Jehova witniska nani hilpka ra taki banhwan, bara adar yabi banhwan, muihni lakri nani ai tawanka wina sakan kan ba kli ai watla ra wabia. Baha sim Agustínka, tâura aisi kata ba wâl sut nina ra naku win: “Yang nani uba lilia bara tingki sin luki banhwisna, muihni nani yang nani dukira daukan ba”. Witin nani hilp ai muni banhras kan kata, nu âpu nahki banhwi kaia kapri ba”.

 Sim baku talia takan muihni lakri nani Ecuador, San Juan de Ilumán ra. Otavalo ilka bilara indian nani ailal iwi banhwisa. 2014 mânka ra, Asla Aidrubanka Watla mâkaia adarka nani ba bri banhwan ningkara, pasin kum handat nani aikuki taibi munan muihni lakri nani mâkaia warkka ba alki takaskbia dukiara. Baku sin tawan uplika nani ba Jehova witniska nani ra adar yaban ai aidrubanka nani ba bribia apia.

 Ecuador Apiska Tara bara Tasba Aiska Apiska Kau Tara ba wal asla wark taki banhwan, naha kangrigisanka prika lâka ba kaina kahbaia dukiara. Kuntrika lâka watla kau tara ba ra brih wan. Bara bahara win tawanka uplika nani ba muihni lakri nani ra pri swibia. Muihni lakri nani ra chanska yabia kli asla aidrubaia bara Aidrubanka Watla ba sin mâki banhbia. Sakuna muihni lakri nani raitka ra ban kaina kahbaia dukiara, wan layarka nani ba kuntri lâka watla tara nani ra makaban, diara kum param saki swibia: ¿Indian tawanka nani ba tasba aiska ra upla raitka nani ba kulki banhwi kaia sa ki?

 2020 pastara kati (julio) 16 ra kuntri Lâka Watla Kau Tara ba, naha makabanka ba laki kaikan. Kangrigisan tâwan aisi kan nani ba Ecuador kristian waitna nani, witin nani ba layar nani banhwisa. Bara tasba aiska ra kristian waitna nani layar lankira 4 sin tâ baikan. Sikniska saura tâka mita, witin nani ba kuntri sât sât wina videoconferencia bâk asla takan. Baha tnatka ra pas trip daukan Jehova witniska nani layar daknika ba lâ watla tara ra tâwan aisaia. c Layar nani daknika ba aisan tasba aiska ra upla raitka nani kulkaia lâ daukan ba dukiara, bara win Indian tawanka kum wina uplika ra sin, tasba aiska ra kulki ba baku, sim raitka kulkaia sa.

 Nawas Otavalo ilka bilara iwi muihni lakri nani ba bîla kaikisa, Lâ Watla Tara dîa wibia, bara hilpka nani brin ba dukiara tingki luki banhwisa. Ilumán Quichua kangrigisan almukka, nina César naku wisa: “Ai asla takanka bâk upla wiria dukiara Jehova diara manis daukisa”.

 Wan muihni lakri nani tâwan aisan layar nani sut ba Jehova witniska nani sa, bara mana luha wark taki banhwan. Ban sakuna, lâ dingkaia, ridi munaia bara lâ watla ra aisaia dukiara taim bara lalah ailal nit kan. México ra lâ dingkan taim aisanka nani ridi daukaia dukiara 380 awar nani, bara wauhkataya nani bîla lakaia dukiara 240 awar nani yus munan. Bara Ecuador ra lâ dingkan taim, tasba aiska ra 40 layar nani ba ai awarka handat handat yus munan. ¿Wan muihni lakri nani raitka kaina kahbaia dukiara lalah nit nani ba ani wina sakisa ki? Man nani donate.pr418.com ra mariki tnatka sât sât nani bâk prisant yabisma ba wina sakisa. Kupiam pihni marikisma ba mita tingki mai wisa.