Jehova want sa upla sut dîa sât trabil bri kabia sin, witin bara ai Kingka lâka dukiara lan takbia (1 Timoti 2:3, 4). Baha mita, Jehova witniska nani ba Baibil bara hilpka wala nani sin paskisa upla sut dukiara, bara kiama prawan nani sin baha tilara sa. Baku, wan asla takanka ba sain bîla nani 100 kau purara lilka tausin nani paskan sa. a ¿Naha ba nahki dauki bara upla nani ra yabisa ki? ¿Nahki kau pain dauki balan sa piua luan tilara?

 Tasba aiska ra sain bîla aisi daknika sât ailal bâra sa. Ulbi sakanka kum lakaisa taim, daknika bani ba aman pali laki kaikisa. Ningkara ai sain bîla kat tânka laki yabaia dukiara ani tnatka kau pain ba wahbi sakisa. Las ra ulbi sakanka ba lilka ra grabar munisa. Na minit kat 60 daknika nani piua kat bîla lakisa Baibil stadi takaia hilpka nani ba. Wala 40 nani ba sam taim laki banhwisa.

 Piua luan ra, sain bîla ra lilka nani lakaia ba uba mana kan. Lilka alkaika bara masin nitka nani ba kau mana kan naiwa piua wal kaka. Baha purkara, lilka alkaika pliska kum ra grabar muni kan. Sam taim baha pliska ba raya mâkaia kan, aima wala nani ra utla kum ra ridi daukaia kan. Asla sut 30.000 dalas nani tiki kan sain bîla lakaia daknika kum ridi daukaia dukiara. b

 Prisantka nani ba pain yus munaia dukiara, wan asla takanka ba trai munan sa bîla lakaia tnatka ba kau pain bara kau isi daukaia. Baha mita, masin nani kau pain kuna kau sipar nani ba yus munisa. Wibia kaka, lilka alkaia pliska nani danh nit apia sa. Bîla laki daknika ba ai apiska ra lilka alkaia sip sa ai ninara kwala sangni tara kum mangki. Video kum ra muihni lakri nani ailal takisa kaka, kumi bani ba ai apiska wina apia kaka ai watla wina grabar munaia sip sa.

 Baku sin lilka nani paski daknika nani ra hilp munaia dukiara computadora programka sinskira nani paskan sa. Tingki baha mita, sain bîla lilkika kumi bani paskaia dukiara tâura wan taimka nahki tiki kan ba wina nanara bakriki baman yus munisa. Muihni lakri nani ba uba tingki lukisa naha kau pain paski ba mita. Jehova witniska kum nina Alexander wi ba naku aisisa: “Uya âuyapah daira walisna kan nanara lilka nani kau ailal saki ba mita. Yu bani lilka kum kaikisna”.

 Naiwa, bîla lakaia daknika kum ridi daukaia dukiara lalah 5,000 dalaska wiria nit sa. Baha mita sain bîla kau ailal ra lilka nani paskaia sip sa.

 Lilka kum grabar munan ningkara, ya nitka bri nani ra blikaia sa. Mani ailal luan ra, lilka nani ba kampani kum ra bliki kan kaset tara bara DVD ra laki kau ailal sâkbia dukiara, baha ningkara kangrigisan nani ra bliki kan. Kuna baha dukiara, taim, karnika bara lalah ailal nit kan. 2013 manka ra baman 2.000.000 dalas nani ba tikan sa sain bîla ra DVD nani paskaia dukiara.

 Kiama prawan nani ba uba lilia banhwisa naha lilkika nani ba wal, kuna rait ba sika naha nani yus munaia ba piu bani isi apia kan, kau pali ba kasetka tara bara DVD nani kau ailal sakan piua ra. Tânka kum baku, Baibil bukka kumi baman ba DVD ailal yus muni kan. Brasil wina Jehova witniska kum nina Gilnei ai kupia kraukisa: “Tiks kum aisi kaikaia want kan piua ra kasetka tara ba plikaia kan, bara bahara borska ba plikaia kan. Baku daukaia ba isi apia kan”. Witnis mairin kum nina Rafayane, sain bîla DVDka nani yus muni kan, bara witin wisa: “Yakan Baibil stadika takaia ba uba swapan daira walri kapri. Tikska nani pliki, taim ailal tiki kapri”. Bara muihni lakri nani ba upla ra smalkaia dukiara DVD bara kaset tara nani brih taukaia kan, upla tilivisanka ra marikaia dukiara. Kum kum ba DVD mangkaia ai masinka lupia brih tauki kan. Kuna piu wiria ningkara, DVD mangkaia masinka lupia lilka marikaia sip ba takan, bara baha yus munaia kau isi kan. Bobby, Miriki kuntrika ra iwi ba naku wisa: “Tiks kum mangki ningkara wala marikaia want sna kaka, aima ailal ra DVD ba chens munaia kapri. Baha ba taim tiwi kan ba mita, aisisa piua ra Baibil yus munaia ba isi apia kan”.

 2013 manka ra, Jehova asla takanka ba JW Library Sign Language aplikacionka ba sakan. Baha wal muihni lakri nani ba sain bîla lilkika nani ba ai celularka apia kaka tabletka ra alahbi briaia bara kaikaia sip sa. Pas taim Miriki nani sainka bîla ra baman bâra kan, sain bîla sut ra yus munaia dukiara raya paskan. Muihni lakri nani uba lilia taki banhwan. Jehova witniska kum Brasil wina Juscelino ba naku aisisa: “Yang sip kasak lukras kapri. Ban luki kapri Tâ Bri Daknika ba kiama prawan nani ra uba latwan kaiki ba, bara want sa kasak tânka ra yawan nani sin pain pâwi kabia kiama pain wali nani aikuki sim baku. Baha aplikacionka takan taim, uba kupi bukan bara kau Baibil stadi takaia brinka briri”.

 Naiwa, sain bîla ra lilka nani paski ba sut wan Internet pliska bara JW Library Sign Language aplikacionka ra sunisa. Tingki baha mita, sain bîla ra lilka nani bîla lakaia, grabar munaia bara upla ra yabaia ba uba taim yus munras, nanara de kum kum ra isti danh daukisa. Baha mita, lilka nani ba bîla aisanka wala nani wal sim piua ra sakaia sip sa.

 Muihni lakri kiama prawan nani aisi ba wals. Witnis mairin kum nina Klízia bila wisa: “¿Ani asla takanka bâra sa upla kiama prawan nani ra spirit pata yabaia dukiara lukisa? Naha tasba ra wala âpu sa Jehova asla takanka yawan dukiara dauki ba baku”. Bara Vladimir wisa: “Lilka nani ba ai marikisa Jehova kiama prawan nani ra latwan kaikisa sim upla wala nani ba baku”.

 Sain bîla ra wan lilkika nani ailal ra naha bîla nani ba takisa: “Naha lilkika na upla mihta ra swisa tasba aiska ra Baibil smalkaia warkka kum baku, upla nani prisantka wal tâ baikisa”. Wan kupia wina naha prisantka nani dukiara tingki wisa, aima ailal ra Internet pliska donate.pr418.com bâk yabi ba. Naha prisantka nani ba wal kiama prawan nani bara upla sut dukiara sin, Baibil bara stadi takaia dukiara buk wala nani paskaia sanska wankisa.