Miusik ba Jehova wina prisant pranakira kum sa. Lukanka yamni nani bri kaia hilp wan munisa, bara pain wan dara wali kaia wan kupia bukisa. Kasak pali baku wan takisa, wan lawanka nani walisa piua ra, JW Broadcasting® lawanka nani baku. Kau pali ba naha lawanka nani ba Jehova lamara wan brih wisa.

 2014 manka wina, 70 lawana nani pura paskan sa, ¡bara kum kum nani ba 500 bîla nani purara wali kaia sip sa! Ban kra man makabi walma: “¿Naha lawanka nani ba nahki paskisa? ¿Bara ya paskisa?”.

 Tâ Bri Daknika ra Smalkanka Pura Kaiki Daknika mita naha warkka pura kaikisa, Audio bara Video wal Miusik Paski Daknika ba lawana nani paskisa, JW Broadcasting lawanka bara wala nani sin. Miusik Paski Daknika ba muihni lakri 13 banhwisa. Witin nani ba naha paskaia ridi daukisa: miusik ulbaia, tiunka nani ba laki kaikaia, bara baku warkka wala nit nani ba sin daukaia. Tâ Bri Daknika ba yamni kaikisa hilp mamunra nani laih wina tasba aiska ra tâ baikaia. Baha tila nani wina bâra sa, lawana letrika nani ulbi ba, miusik âiulbra nani, miusik papulra nani bara aiwawanra nani sin. Naha muihni lakri nani ba bawan lâka ra dîa nu ba yus muni banhwisa, witin nani upla nani mita mayunbia bîla kaikras banhwisa.

 ¿Lawanka nani ba nahki paski banhwisa? Naha lawanka nani paskaia dukiara, pas ba Smalkanka Pura Kaiki Daknika mita wahbi sakisa, lawanka nani ani Baibil tikska ra bapanka bribia sapa, bara dîa lukanka ba marikaia want sa sapa. Ningkara, Miusik Papaskra Daknika mita wahbi sakisa, ya tiunka paskbia ba, bara ya letrika ulbuya ba. Smalkanka Pura Kaiki Daknika ba grabación kum tâura dauki ba laki kaikisa. Ningkara, Miusik Papaskra Daknika ba las grabación daukan pîska nani ba laki kaikisa, dîa wapnika mangkaia nit sa sapa. Naha lawana nani ba plis sât sât ra grabar munisa, wibia kaka, Betel apiska nani apia kaka utla wala nani ra.

 Wan lawanka nani paskaia bara grabar munaia dukiara, wan muihni lakri nani ba wark daukaia masinka nani yus munisa. Programa kum bâra sa miusik nani ulbaia dukiara, bara bîla grabar munan ba daukaia dukiara. Baku sin miusik paskaia tulska nani nit sa, miusik pulaia tulska nani, tiunka nani asla daukaia masinka, amplificadores (binka kau tara daukaia masinka), altavoces (binka kau karna walbia dukiara yus munisa), bara micrófonos (kau binka tara walbia dukiara yus munisa) baku. Micrófono bani ba ai mana ba 100 apia kaka 1.000 dalas, apia kaka kau kaia sip sa. 2020 manka ra, 116,000 dalas (Estados Unidos dalaska) nani tikan grabar munaia tulska nani atkaia dukiara.

 ¿Dîa daukisa lalah apahkaia dukiara? Betel apiska Miusik Papaskra Daknika ra muihni lakri nani ailal bri kaia watlika ra, plis laih wina muihni lakri wilinkira nani ra hilp makabisa. Baha purkara, plis kumi ra miusik kangbi nani asla daukaia watlika ra, muihni lakri nani ba miusik tiunka nani paskaia dukiara computadora programka nani yus munisa.

 ¡Muihni lakri nani ba wan lawanka nani walaia laik banhwisa! Wibia sa kaka, Alemania wina kristian mairin kum nina Tara wi ba naku wisa: “Piu bani ra sari daira walisna ba piua ra naha lawana nani ba âuyapah lâka aikisa. Yang silp yapti bîla ra walisna taim, sim Jehova kiaubi ai alki baku daira walisna”. Dimitri, witin Kazajistán ra iwisa, bara naku wisa: “Lawanka nani ba walaia laiksna, ulbanka dukiara wari takaia nit apia sna. Kan nu sna ulbanka ba Baibil wina sakan sa. Naha lawanka nani ba hilp ai munisa spirit dukia nani ra sinski mangki kaia”.

 Delia, Sudáfrica wina ba naku klir wan munisa, naha lawana nani walisa taim nahki ai dara walisa: “Baha ba rayaka swaki sasakra kum sa yang maipara. Sari sna piua ra, apia kaka trabil brisna taim, piua bani lawana kum bâra sa âuyapah aiki ba. Piua kum kum ra naha tiunka nani waluna taim, ¡kau pain daira walisna!”

 Lerato, Sudáfrica wina sin naku wisa: “Lawana nani Piua ba baila pali sa bara Rait aihwa rayaka ba, baha nani ba yaptiki kli bubia taim kat ai brih wisa. Waluna bani, yang naikra ni kaikisna witin yang ra ai mihta kwâki plapi aula sa, yang ra kiaubi alkaia dukiara”.

 Sri Lanka ra tiara kum ra lawana kum uba pali hilp munan. Witin aisisa: “Skul watla ra maestruki ba upla nani mawan ra uba saura ai win, Jehova witniska sna ba mita. Uba sirang iwri ba mita, pana diara wiaia âpu kapri. Waitla ra wari, mamiki ai win baha lawanka Fuerte tú serás ba walamna. Baha lawanka hilp ai munan tânka pliki kaikaia, bara ridi taki tânka kum klir saki maestruki ra wiaia. Yu wala ra maestruki wal aisari, witin ai walan, bara yang ra ai win, nanara tânka kau pain brin yang dîa kasak lukisna ba. Jehova asla takanka ra tingki pali wisna, kupia buki lawanka nani paski ba mita”.

 ¿Naha lawanka nani ba dîa lalahka wal paskisa ki? Man nani prisantkam nani tasba aiska smalkaia warkka dukiara donate.pr418.com ra mariki tnatka sât sât bâk yabisma ba wal daukisa. Uba kupiam pihni banhwi ba mita tingki pali.