Yawan Jehova witniska nani ba, pana pana wan muihni lakri nani ra lukisa (1 Pita 2:17). Kenia ra kristian mairin kum nina Tannis, nahki ai dara wali ba baku yawan sin wan dara walisa. Witin naku wisa: “Tasba aiska ra wan muihni lakri nani ra dîa taki ba nu takaia want sna”. ¿Wan muihni lakri nani ra dîa taki ba ani wina nu takaia sip sa ki? 2013 manka wina, wan Internet pliska jw.org ra “Prensa” pîska wina nu takaia sip sa.

 Baha pîska ra maisa pakanka kunin luha nani bâra sa, diara paski bara mâki warkka, hilpka yabaia warkka bara Baibil raya sakan taim baku aidrubanka painkira nani dukiara. Ai kasakka lukan lâka tâwan, silak ra dingkan muihni lakri nani dukiara sin nu takaia sip sa. Baku sin smalkaia warkka tara nani, bara Jisas Pruan Kupia Kraukanka piua ra smalkaia warkka ra dîa takan ba dukiara wan muihni lakri nani ai sturka aisi ba sin kaikaia sip sa. ¿Sakuna maisa pakanka nani ba nahki ridi daukisa, bara ya nani wark takisa?

 Tasba Aiska Apiska Tara ra Maisa Pakanka Apiska ba “Prensa” pîska ba ridi daukisa. Tâ Bri Daknika ra Pura Kakaira nani Daknika ba baha apiska pura kaikisa. Muihni lakri nani 100 kau pura wark takisa, bara witin nani aihkika ba laih wina ai hilpka yabisa. Baha muihni lakri nani ba maisa pakanka nani ulbisa, laki kaikisa, bîla lakisa, bara lilka nani sin ridi daukisa. Baku sin gabamint uplika nani, tânka pliki kakaira nani, bara sturi wahbi uplika nani wal aisisa. Tasba aiska ra 80 Betel apiska tara nani ra Maisa Pakanka Apiska nani bâra ba naha warkka tâ baikisa.

 Maisa pakanka kum ridi daukaia dukiara Maisa Pakanka Apiska ba baha Maisa Pakanka Pîska nani wal asla wark takisa. Muihni lakri nani sturi kum maisa pakanka baku sakaia sip ba nu takisa taim, pain laki kaikisa bara asla daukisa. Nit sa kaka, uplika ra sturi walisa bara tânka pliki kakaira nani wal aisisa. Dahra nani nit ba sut brisa taim, ulbisa, dîa ulban ba laki kaikisa, bara wapnika mangkisa. Ningkara lilka nani aikuki Pura Kakaira nani Daknika ra blikisa, maisa pakanka baku sakaia adarka briaia dukiara.

 ¿Wan muihni lakri nani ba “Prensa” pîska dukiara dîa luki banhwisa? Filipinas ra iwi kristian mairin kum nina Cheryl ba naku wisa: “Titan ra pas ba wan asla takanka bara wan muihni lakri nani dukiara maisa pakanka nani aisi kaikaia laik sna”.

 Aisi kakaira nani manis bila jw.org maisa pakanka nani wihki sturi wahbi kampanika nani dîa saki ba wal sât wala sa. Kazajistán wina Tatiana ba wisa: “Jw.org maisa pakanka nani ba kasak lukaia sip sna ba mita tingki lukisna, diara kasak baman aisisa”. México wina kristian mairin kum Alma ba naku wisa: “Sturi wahbi kampanika nani dîa maisa paki ba walaia sari baman wan bukisa, kuna jw.org ra dîa maisa pakanka nani bri ba wan kupia bukisa”.

 “Prensa” pîska ra maisa pakanka nani bâra ba dis kunin luha baman apia, kau ni wan kasakka lukan lâka karna daukisa. Kenia wina Bernard ba naku wisa: “Naha maisa pakanka nani ra tingki, nanara tasba aiska ra muihni lakri nani ba pamaliki baku kaikisna, ai nina nani mâki ai trabilka nani dukiara Jehova ra puri sunaia sip sna”. Sim kuntrika ra kristian mairin kum nina Bybron sin naku wisa: “Bîla aisanka sât sât ra Baibil bîla laki sakan ba dukiara aisi kaikisna taim, ¡uba lilia daira walisna! Jehova yawan sut ra latwan kaiki ba kupi kraukaia sip sna”.

 Wan muihni lakri nani ra nina bliki rau sauhki ba dukiara aisi kaikaia ba, wan kasakka lukan lâka karna daukisa. Kenia wina kristian mairin wala Jackline ba naku wisa: “Muihni lakri nani ai kupia karna lâka mariki ba dukiara lukaia ba kasakki lukan lâka kau karna daukisa. Bapi buaia dukiara witin nani ra dîa hilp munan ba lan takaia trai munisna. Bara lan takri, pura sunaia, Baibil aisi kaikaia, apia kaka lawana aiwanaia baku diara ‘isi nani’ ba karnika wankaia sip sa”.

 Costa Rica wina kristian mairin kum nina Beatriz ba, tasba sauhkanka nani dukiara maisa pakanka nani wanki ba ra tingki lukisa. Witin naku wisa: “Diara painkira sa, wan asla takanka mita wan muihni lakri nani nitka bri ba ra isti pali hilpka yabi ba nu takaia. Tnatka painkira nani yus muni, latwan lâka wal daukisa. Âu, baha sika Jehova asla takanka ba”.

 Wan Internet pliska ra “Prensa” pîska bâk wan muihni lakri nani dukiara maisa pakanka raya nani briaia sip ba mita, yawan tingki lukisa. Prisantkam nani yabi banhwisma ba mita maisa pakanka nani ridi daukaia sip sa. Tasba aiska smalkaia warkka ra donate.pr418.com bâk prisantkam nani yabaia sip sma. Kupiam pihni mariki banhwisma ba mita, tingki mai wisa.