Smalkaia warkka manka 2021 a bilkara, tasba aiska ra COVID-19 tâka mita upla sut ba wari taki kan. “Tasba aiska ra sikniska saura piua ra hilpka” ulbanka ra tânka marikan baku, naha sikniska mapara buaia dukiara yawan dalas milian milian nani b yus munan. Baku sin hilp munaia daknika nani 950 kau pura asla daukan.

 Naha sikniska tasba aiska ra saura muni kan piua ra, tasba sauhkanka wala nani, bara upla mita buki trabilka nani tâka muihni lakri nani sin wari taki kan. Tâ Bri Daknika ra Pura Kakaira nani Daknika ba wahbi saki adarka yaban, naha sikniska dukiara lalahka bri kan ba purkara 8 milian dalas ba yus munaisa 200 tasba sauhkanka nani mapara buaia dukiara. Kaisa kaikaia nahki prisantkam nani yabisma ba tasba sauhkanka wâl ra yus munan.

 Mani 2021 mayo kati 22 ra Congo kuntrika ra Nyiragongo ilka ba baiwan. Slaubla lapta ba utla manis, skul watla nani bara lî suni pliska bri kan nani sauhki tikan. Ilka ba de kum kum Goma tawanka ra tasba yuya saura nani lulki kan, bara tasba nikbanka manis taki kan. Baha pliska uplika nani aihkika ba plis wala ra blikan. Upla milian nani ba plapan, kum kum nani ba Rwanda kuntrika kat wan.

 Plis wala ra brih wan uplika tilara Jehova witniska nani 5.000 kau pura bâra kan. Kum kum nani ba ilka baiwan tâka ai watla nani tikan, bara wala nani ba plis wala ra brih wan taim upla saura nani ai watla ra dimi ai dukia nani implikan. Rwanda kuntrika bara Congo kuntrika hilp yabaia daknika nani ba hilp yabaia dukiara asla takan. Congo apiska tara ba hilp yabaia daknika kum dukiara naku wisa: “Kuntrika uplika nani sut wari taki kan, bara kuntrika ra upla ra sakaia adarka kau yabras kan taim, hilp yabaia daknika ba plun, lî, kwala, blanhkit nani muihni lakri nani ra yabaia tâ krikan”. Tawan kum ra muihni lakri nani 2.000 kau pura bâra kan, hilp yabaia daknika kum ba tint watla nani mangkan, bara mascarilla nani yabi banhwan, baku sin COVID-19 sikniska bara cólera sikniska wina ai kaina kahbaia dukiara tânka nani marikan.

 Kati yumhpa ra wan muihni lakri nani yaban rais 6 toneladas kau purara, aya plawarka 6 toneladas, lât 8.000 litros bara lî 8.000 litros nani. Lalah uya tikaia apia dukiara, apiska tara ba kuntri wala wina atkaia watlika ra sim kuntri bilara plun atki pliska nani wina wans taim ra plun ailal bara sipar atkan.

 Kristian mairin kum ba naku aisan: “Uba pât wahwi banhwi kapri”. Ilka ba ai watla sauhki tikan kan, kuna ningkara witin bara ai pamalika ba lalah bara spirit lainka ra hilpka nit kan ba brin. Witin nanara wisa: “Jehova ra tingki, yawan dîa nit ba brisa, yawan kaikisa nahki Jehova wan karbanka nani brih wi ba, bara baku trabilka nani mapara buaia ba kau isi sa”.

 Venezuela kuntrika ba lalah trabilka wal pat mani ailal brisa. Plun ba uya âpu sa, bara upla ra saura muni uplika kau ailal takisa. Wan muihni lakri nani mapara diara karna sa, kuna Jehova asla takanka ba witin nani ra yakan swiras.

 Smalkanka manka las ra, plun bara sup atki, pamali nit nani ra brih waia dukiara dalas milian kum bara bakriki kau pura yus munan. Venezuela apiska tara ba naku wisa: “Isi apia sa, kati bani plun 130 tolenadas naha kuntrika pliska sât sât ra muihni lakri nani nitka bri ba ra brih waia ba”. Plun aisawbia apia dukiara, muihni lakri nani ba plun piua wihka briaia sip ba brih wisa. Apiska tara ba naku sin aisan: “Plis nani plun sipar mangki yua nani ra plun ailal atkisa. Bara brih wi yabaia dukiara tnatka kau sipar nani ba yus munisa”.

 Leonel ba Venezuela hilp yabaia daknika kum ra sa, bara ai warkka ba laik sa. Witin naku wisa: “Hilp yabaia warkka tâ baikaia ba yang maipara diara tara sa. Maî COVID-19 tâka pruan wina naha warkka ba hilp ai munan pain daira walaia. Baku sin taimki nani ba yus munisna muihni lakri nani nitka bri ba ra hilp munaia dukiara. Yang naikra pali wal kaikisna, Jehova ai uplika nani ra yakan swibia apia pramiska nahki aimaki ba”.

 Hilp yabaia daknika kum ra wark taki kan kristian waitna kum dîa wi ba kaiks: “Nanara hilp nit kan ba yang kapri. Lalah lainka ra baman hilp wan munras kan, muihni lakri nani ba yang bara maî ba âuyapah bribia maisa nihki, main wan kaikan bara wan kupia bukan”.

 Tasba sauhkanka kum kum nani ba ban wina takisa. Kuna baku kabia sin wan asla takanka ba sip sa dîa nit ba isti pali pliki yabaia, tasba aiska ra man nani prisantkam yabi banhwisma ba mita. Donate.pr418.com ra prisant nani yabaia tnatka sât sât kaikaia sip sma. Kupia pihni marikisma ba mita tingki mai wisa.