Jisas ai disaipilka nani ra win: “yang dukira witnis nani kama [...] wan tasba wala ra kau laihura ba kat sin” (Apastil Nani Sturka 1:8). Naha adarka bîla walaia dukiara Jehova witniska nani ba liliakira kasak wark takisa. Sakuna, tasba ra plis kum kum ra sturi yamni nani ba kau smalkras, tânka kum baku, upla ailal iwi tawanka tara nani ra. Baku sin kuntri kum kum ra Jehova witniska nani uya âpu sa (Matiu 9:37, 38). ¿Upla kau ailal ra smalkaia dukiara dîa daukisa?

 Naha Jisas adarka bîla walaia dukiara, Jehova witniska nani Tâ Bri Daknika ra Smalkaia Warkka Pura Kaiki Daknika ba nitka tara bri pliska nani ra misan nani blikisa. Tasba aiska ra naha piua ra 3.090 misan nani smalki tauki banhwisa. a Aihkika ba King lâka Sturka Smalki nani Skulka baku, Baibil skulka nani ra lan dauki ridi munan sa. Witin nani wilinkira ai watla ba swi si kuntri wala ra impakisa. Witin nani ba spirit lainka ra pâwan, bara dîa lan takan ba wal sturi yamni nani karna pali smalki taukisa, bara disaipil raya nani ra daukanka pain kum marikisa.

 Apiska tara bani, Smalkaia Warkka Pura Kaiki Daknika ra Misan nani Tâ Baiki Apiska ba, Sucursal Pura Kaiki Daknika wal misan nitka nani dukiara wark takisa. Yapaia pliska kum yabisa, ai wîna tara main kaikbia hilpka yabisa, bara ai nitka nani dukiara lalah lainka ra hilp sirpi kum yabisa. Smalkaia warkka mânka 2020 ra, Jehova witniska nani ba 27 millones dalas baku misan nani dukiara yus munan. Naha hilpka ra tingki, misan nani ba ai sinska bara karnika sut smalkaia warkka ra mangkaia sip sa, bara tâ baiki pliska kangrigisanka nani ra kupia bukaia sip sa.

 ¿Misan nani ba smalkaia warkka nahki tâ baikisa? Malaui Apiska Tara Pura Kaiki Daknika Frank Madsen naku wisa: “Witin nani ba kupia karna bara lankira banhwisa. Baku plis kau karna nani, upla uya walras bara bîla aisanka wala aisi pliska nani ra smalkaia kangrigisan nani ra hilp munan sa. Baha purkara, iwanka tnatka bara bîla aisanka lan takaia dukiara wala nani ra daukanka pain kum marikisa. Baku sin, wahma tiara nani ai kupia bukisa piua aiska smalki tataukra kabia. Jehova ra tingki manis yabaia sa misan nani bri ba mita”.

 Kuntri wala Apiska Tara Pura Kaiki Daknika naku wisa: “Misan nani ba param marikisa Jehova witniska nani ba tasba aiska ra sa, plis sât sât wina kabia sin kumi baku sa. Jehova witniska apia nani sin kaikisa ani wina kabia sin yawan asla sa. Baibil wina dîa lan taki ba hilp wan munisa pamali baku kumi kaia”.

 ¿Misan nani ba ai kangrigisanka muihni lakri nani ra nahki hilp munisa? Timor Oriental kuntrika, nina Paulo wisa ai kangrigisanka ra wark taki misanka nani ra tingki lukisa. Witin naku wisa: “Bitni pliska kum ra yawan iwisa. Bara misan nani ba plis kau kauhla kum wina balan. Kuna bitni daukbia sin ban smalki taukisa. Titan bani smalki taki wisa, aidrubanka nani kumi sin tiwras sa, bara dinar pîska ra bitni kau daukisa taim kat sin witin nani ba kli wih kaikanka nani daukisa. Tutni ra sin smalki taukisa. Upla manis ra tânka kasak kakaira takaia hilp munan sa, yang sin baha tilara sna. Liliakira Jehova warkka daukaia dukiara ai rayaka yus munisa, bara baha ba kangrigisan sut ra kupia bukisa kau wilinkira Gâd warkka daukaia”.

 Malaui kuntrika ra tâura smasmalkra kum, nina Ketti ba misan marit kum ai pamalika ra nahki hilp munan ba dukiara naku aisisa: “Wan kangrigisanka ra blikan taim, pamaliki wina yang baman Jehova witniska kapri. Witin nani ba kasak hilp ai munan, baku sin pamaliki wal pâna pain nani takan. Luhpi nani ba witin nani wina lan takan Jehova warkka daukaia ba lilia wan daukisa. Ai daukanka painkira ra tingki, luhpi mairin nani yumhpa ba tâura smasmalkra sa bara maî waitna ba aidrubanka nani ra waia tâ krikan”.

 ¿Misan nani hilp munaia dukiara lalah ani wina sakisa ki? Tasba aiska smalkaia warkka ra prisant nani yaban ba wina sakisa. Aihkika ba donate.pr418.com bâk yabisa. Kupiam pihni marikisma ba mita tingki mai wisa.