Mani 2020 ra, tasba aiska ra tasba sauhkanka nani ailal bara COVID-19 pandemika takan. ¿Jehova witniska nani ba baha nani tâwan pât wahwi muihni lakri nani ra nahki hilp munan?

 Mani 2020 smalkaia warkka ra, a Tâ Bri Daknika ra Tâ Brabrira nani Daknika ba âu takan sa muihni lakri nani ra hilp munaia dukiara 28 millones dalas yus munaia. COVID-19 pandemika, prari tara nani, Aprika kuntrika nani ra lisamra tara nani, Venezuela kuntrika ra plun wahwanka, Zimbabue kuntrika ra lî auhras ba baku, pât wahwanka 200 kau pura nani hilp munan sa. Lalah prisant yaban ba yus munan sa plun, lî, kwala, sîka bara utla nani baku, pât wahwi nani dîa nit ba ridi munaia dukiara. Kaisa sturi kum kum kaikaia nahki hilp munan ba.

 COVID-19. Tasba aiska ra pandemika taki ba tâwan muihni lakri nani ba wîna tara lainka ra bara lalah lainka ra trabil brin. Baku sin ai kupia turbi banhwan. Muihni lakri nani ra hilp munaia dukiara, Hilp Munaia Daknika ba 800 kau pura mangkan. Hilp Munaia Daknika nani ba muihni lakri nani dîa nit ba laki kaiki, Tâ Brabrira nani Daknika ra mahka maisa pakisa. Bara Tâ Brabrira nani Daknika ba dîa hilp nit ba blikisa.

 Mani aiska ra, Hilp Munaia Daknika nani ba muihni lakri nani ra tâ baikan, plun, lî, sîka nani bara diara wala dîa nit ba bribia dukiara. Baku sin kangrigisan almukka nani wal asla wark taki, gabamint hilp yabi ba muihni lakri nani bribia hilp munan.

 Jehova witnis apia uplika nani sin yawan dîa dauki ba kaikisa. Zambia kuntrika Nakonde tawanka polis baska, nina Field Simwinga ba muihni lakri nani dukiara naku aisan: “Ya ya pât wahwi nani ra dîa nit ba man nani brih balram. Uba tingki luki banhwisna”.

 Plun wahwanka Angola kuntrika ra. Angola kuntrika ba COVID-19 pandemika tâwan plun wahwan bara plun praiska ba mana pali ulan. Muihni lakri nani manis sin plun aitani briaia sip apia kan.

 Baha mita Brasil apiska tara ra makaban Angola kuntrika muihni lakri nani ra plun blikaia. Hilp munaia lalahka pain yus munaia dukiara, plun nahki atki blikaia pain laki kaikan. Bara las kat aima kumi ra plun ailal atkan. Baha mita plun atki blikaia dukiara pakits kumi bani dis 22 dalas ra ridi daukaia sip kan. Pakits kumi bani ba rais, bins bara lat baku, plun 20 kilos (44 libras) bri kan. Nawas kat, pakits nani 33.544, wibia sa kaka 654 toneladas (721 toneladas americanas) pat blikan sa. Plun Angola apiska tara ra blikan ba wihki kuntri bilara dîa atkan ba wal asla dauki, ¡upla 50.000 kau purara plun blikaia sip kan!

 ¿Hilpka brin muihni lakri nani ba nahki ai dara walisa? Angola kuntrika tawan sirpi ra iwi Alexandre ba naku aisisa: “Yang kler kaikri Jehova latwan ai kaikisa bara yang yakan apia sna. ¡Jehova asla takanka sin yang ra lukisa!”. Mariza, yapti kum mayas ba naku aisisa: “Jehova puri sunra walan. ¡Jehova bara ai asla takanka ra tingki wisna!”.

 Zimbabue kuntrika ra lî auhras ba. Mani 2020 smalkaia warkka bilkara, Zimbabue kuntrika ra lî auhras kan, upla milian milian plun wahwan. Muihni lakri tausin tausin sin plun wahwan.

 Wan muihni lakri nani ra plun blikaia dukiara Hilp Munaia Daknika nani 5 mangkan. Plun wahbi ridi munaia, apia kaka truk wal brih waia dukiara muihni lakri nani manis tâ baikan. b Mani 2020 smalkaia warkka bilkara, upla 22.700 kau purara plun blikaia dukiara lalah 691.561 dalas yus munan sa.

 Muihni lakri kum kum ba, plun ai watla ra bri kata ba danh takan piua pali ra hilpka ba brin. Plun brin taim, muihni lakri nani ba Jehova ra mayuni, kum kum ba King lâka lawana nani aiwanaia tâ krikan.

 Pliska kum ra, dakni kum organización no gubernamental (ONG) ba plun blîkbia win, bara baha dukiara tawan uplika nani wal aidrubanka kum daukan. Kristian piarka mairin wâl sin baha ra wan. Sakuna aidrubanka ba pulitik dukiara aisaia tâ krikan, baha mita witin nani ba lukan baha daknika wina hilpka briaia aitani apia sa. Witin nani mahka taki wan, bara upla nani ba lawaska kiki win, “¡Ningkara plun wahwi yang nani ra plikpara! ¿Wali?” Sakuna wik wâl ningkara Jehova witniska nani ba baha tawanka ra plun brih wan, bara muihni lakri nani ra yuan. ¡Kristian piarka mairin wâl ba ONG plun blikras kainara pat hilpka briaia sip kan!

 Zimbabue kuntrika ra muihni lakri nani ra hilp munan ba witnis pain takan. Tawan sirpi kum ra iwi kristian mairin kum, nina Prisca sturka kaikaia. Lî auhras kan piua ra sin witin ba winsdi bara praidi bani tadi smalki tauki kan. Bara insla daukaia piua ra sin ban sim sât tauki kan. Tawan uplika nani ba witin ra lawaska kiki wi kan: “¿Man smalki tauki si pamalikam ra plun bla ikma ki?”. Prisca pana wi kan: “Jehovah aima kumi ra sin lulki swiras sa witin ra latwan kaiki nani ra”. Tisku kan, witin ba wan asla takanka wina hilpka brin. Lama iwi uplika nani ba tâ iwan bara Prisca ra win: “Gâd ba lulki mai swiras kan, Jehova dukiara kau nu takaia want banhwisna”. Nanara tila wina upla 7 ba radiu ku kangrigisan aidrubanka nani ba walisa.

 Tasba tnata pat baila na ra, tasba sauhkanka kau taki kabia (Matiu 24:3, 7). Tasba sauhkanka nani tâwan pât wahwi muihni lakri nani ra hilp munaia dukiara, man nani wilinkira lalah prisant yabi banhwisma ba mita tingki mai wisa. Prisant yabaia tnatka nani dukiara Internet donate.pr418.com ra tânka marikisa. Lalah prisant yaban ba pât wahwi nani ra hilpka yabaia dukiara pain laki kaiki yus munisa.