“Wan wauhkataya aisi kaiki nani ailal ba upla blain nani ra kakaira sa”. 1912 junio 1 The Watch Tower (La Torre del Vigía) wauhkataya ba baku win. Baha revistika ra win kan, ulbi sakanka mana luha nani blain dukiara sin bâra sa. Baku sin win: “Baha ulbi sakanka nani ra, upla diara kaikras nani dukiara wauhkataya twakni ra pruhni lupia nani daukan ba ra ulbi banhwisa, witin nani sin sapi aisi kaikbia dukiara. Blain nani ailal tihu pali tânka bri banhwan sa, piua kum balbia tasba aiska ba blisinka banhki kabia”.

 Naha bîla nani ulban taim, Inglis bîla ra braille ulbaia tnatka ba âpu kan, sakuna yang nani Jehova witniska nani ba wauhkataya twakni ra “pruhni lupia nani wal” Baibil pîska ulbi saki banhwi kapri. naiwa piua ra sin blain nani dukiara ulbi sakanka nani paski banhwisna. ¡Bara bîla 50 pura nani ra ulbi saki banhwisna! ¿Nahki ridi daukisa?

 Blasi ulbanka ba, pas ba braille ulbanka tnatka ba ra lakisa. Nueva York, Patterson ra Servicios de Procesamiento de Texto Daknika ra wark taki Michael Millen ba naku wisa: “Kaina piua ra, braille ulbaia dukiara, upla wala nani mita paskan comptadora programka yuskira nani ba yus muni banhwi kapri, kuna bîla aisanka sut ra lika yus âpu kan. Nanara Watchtower Translation System programka yus muni banhwisna, bara baha wal lika tasba aiska ra braille bîla sut ra ulbaia sip banhwisna. Naha na programka kumi baman sa. Wala wal sip prakras”.

 Braille ulbi sakanka nani ra ulbanka pîska nani baman dingkras, sakuna lilka nani sin tânka marikisa. Wibia kaka, Man lilia bas bukka taya ra lilkika ba, braille bîla ra naku tânka marikan: “Waitna kum tangni, kiusi, bara il nani tilara yabal krutni bâk wapi auya sa”. Hilp mamunra bara tâura smasmalkra kum, nina Jamshed, witin ba blain sa, witin bila: “Lilka nani tânka mariki ba yang maipara uba diara tara sa”.

 Braille ulbanka tnatka ra lakan ningkara, ulbanka nani ba apiska tara nani ra blikisa prin munbia dukiara. Baha dukiara wauhkataya karna kum yus munisa, pruhnika lupia nani ulbuya taim, kalwaia apia dukiara, bara pat pat yus muni kabia sin, lapatwaia apia dukiara. Pas ba wahia nani ba ai pliska kat mangkisa, baha ningkara un kum ra spring kum mangkisa. Baha wina ulbi sakanka wala nani asla kangrigisan wala nani ra blikisa, apia kaka blain nani ra prisantka baku blikisa. Bara wan muihni lakri blain nani, apia kaka ai nakra ra trabil bri nani, kangrigisan aidrubanka nani ra yus munaia sip kabia dukiara, apiska tara nani ba isti pali blikaia trai munisa.

 Baha daukaia dukiara, taimka bara lalahka sin nit sa. Baha mita, Nueva York, Wallkill ra wan print munaia pliska ra, braille Baibilka 2 paskaia taimka ba 50.000 nakra pain bri nani Baibilka paskaia ba wal sim sât takisa. Tani wala ra, Inglis brailleka ra grado 2 Baibilka baman, 25 buk nani takisa. a Baha paskaia dukiara, wauhkataya nani ba aima 123 praiska pura nit sa, wan nakra ni aisi kaikaia Baibilka kum paskaia ba wal. Braille Baibilka 25 buk nani taya ba baman, 150 dalas praiska takisa.

 ¿Naha ulbi sakanka nani ra wark taki nani ba nahki ai dara wali banhwisa? Sudáfrica apiska tara wina Nadia ba wisa: “Wan muihni lakri blain, bara diara kaikras nani rayaka ba isi apia sa. Baha mita witin nani ra hilp munaia ba yang maipara diara tara sa. Kasak lukisna Jehova witin nani ra latwan kaikisa”.

 Bara, blain kum braille aisi kaikaia lan âpu sa kaka, ¿dîa daukaia sa? Mani nani luan tilara, wauhkataya tara kum ulbi sakan, lalka ba Braille aisi kaikaia lan taks. Naha wauhkataya tara na, print munan ulbanka bara braille tnatka ulbanka sin brisa. Upla blain kum, bara upla nakra pain kum wal yus munaia dukiara paskan sa. Naha wauhkataya ba, pruhni lupia nani pliska kat ulbaia dukiara hilpka kum, bara tuski pruhni lupia nani daukaika kum brisa. lan taki uplika ba naha dukia nani yus munaia sip sa braille ulbaia dukiara. Naha kli kli dauki kaia ba hilp munbia braille ulbaia tnatka ba ai sinska ra dimbia, bara ai mihta sirpika nani wal kakaira sin takbia.

 ¿Muihni lakri nani blain, apia kaka nakra ra trabil bri nani ra, braille ulbi sakanka nani ba nahki hilp munisa? Ernst ba Haití ra iwisa, witin ra dîa takan sapa kaisa kaikaia. Witin ba kangrigisan aidrubanka nani ra kaia laik kan, kuna braille ulbanka kumi sin briras kan. Witin ba diara wala daukaia âpu kan, aidrubanka ra aisanka yabaia kaka, ai sinska ra pain lan takaia kan. “Kuna nanara sât wala takan sa —win aisisa—. Nanara minit bani mihti buki aisanka yabaia sip sna. Bara kangrigisan ra asla sna daira walisna. Nanara yawan aikuki asla sim pata pi banhwisa”.

 Kangrigisan almukka kum, Jan ba Austria ra iwisa, bara nakra trabilka brisa. Baha tilara, witin ba Atalaya stadika tâ brisa, bara Kangrigisan Baibil stadika sin. Witin aisisa: “Wan ulbi sakanka nani braille ra ba kau param sa kaikisna. Wibia kaka, wahia nani ra ai numbika nani mangkan sa, isi pali sakaia sip sa, bara lilka nani ba sin man nit sma ba kat sitnika kat tânka marikisa”.

 Corea waupasa tani ra, tâura smasmalkra mairin kum, nina Seon-ok ba blain bara kiama prawan sa. Kainara aidrubanka nani ra upla kum mita, mihta ni kangbi sainka wal laki yabaia kan. Nanara lika, witin silp Baibil wina ulbi sakanka nani braille ra aisi kaikaia sip sa. Witin wisa: “Ulbi sakanka wala nani braille ra aisi kaikaia ba uba karna sa. Kan pruhni lupia kum kum âpu sa, lainka nani ba wahra nani sa, bara wauhkataya sin uba tanta sa. Kuna Jehova witniska nani ulbi sakanka nani ba, kau isi sa aisi kaikaia. Kan wauhkataya nani kau pain ba yus munisa, bara pruhni lupia nani ba kau pruhni banhwisa. Kainara Baibil ulbi sakanka nani stadi takaia sip kapri, upla kum hilp ai muni kan kaka. Kuna nanara yang yakan daukaia sip sna. Aidrubanka nani dukiara ridi takaia laik sna, dîa sip sna ba kat aisanka yabaia ba sin. Braille ulbi sakanka nani mihti ra bali ba sut aisi kaikisna. Raitka pali ba, ¡baha nani luha sip raya kamna apia!”.

 Ulbi sakanka wala nani baku, ulbi sakanka nani braille ba ra sin naku ulban sa: “Naha ulbi sakanka na upla mihta ra swisa tasba aiska ra Baibil smalkaia warkka kum baku, upla nani prisantka wal tâ baikisa. Atkaia apia”. Internet donate.pr418.com ra mariki tnatka sât sât bâk man nani prisant nani yabi banhwisma ba ra tingki, upla blain nani bara nakra trabil bri nani sin, sut ba spirit pata briaia sip sa. Kupiam pihni lâka ba mita uba tingki.