Marzo kati, 2020 ra Tasba Aiska ra Asla Takanka Wîna dukia ba [la Organización Mundial de la Salud] COVID-19 sikniska saura param sakan taim, upla nani ba tasba aiska ra naha sikniska ba mani kum sin wabia lukras kan. Sikniska ba tâka mita, upla milian nani wîna tara bara lalah lainka ra pât wahwi banhwisa, bara nahki ai dara wali ba ra sin ambuk munisa. Jehova witniska nani manis sin baha tilara sa. ¿Jehova witniska nani ba nahki asla taki banhwan sa muihni lakri nitka bri nani ra hilp munaia dukiara?

 Jehova witniska nani Tâ Bri Daknika ra Tâ Brabrira nani Daknika mununhtara, tasba aiska ra COVID-19 sikniska mapara buaia dukiara, 950 Hilp Munaia Daknika nani paskan sa. Aima kum kum ra, Hilp Munaia Daknika nani ba ai tawanka kat asla daukan sa, bara aima wala nani ra, gabamint nani hilpka yabi ba sin wilin taki bri banhwan sa. Baha purkara, Hilp Munaia Daknika nani ba hilpka lâka kau tara daukisa.

 Paraguay trabilka ba kaisa kaikaia. Periódico kum naku win, “sikniska tâka, lalah trabilka ba Paraguay uplika nani ailal ra alkan sa. Plun aitani piaia kat sin âpu”. Kuna Hilp Munaia Daknika Paraguay ra ba, wik 2 dukiara plun yabaia pat tâ krikan kan. Pakits bani ba upla 4 pamalika kum dukiara, plun, klin munaia dukia nani, mihta sikbaia dukia nani, wîna tara klin munaia dukia nani, bara utla bilara dukia nani, 30 dalas praiska auhban kan.

 ¿Hilp yabi muihni lakri nani ba COVID-19 sikniska wina witin nani silp, bara upla wala nani kaina kahbaia dukiara dîa dauki banhwisa? Mawan prakaika nani yus munisa, bara upla nani wina laihura kaia trai muni banhwisa. Bara sin trai kaiki banhwisa, plun bri bali kampanika nani ba pain ai kaina kahbaia dukiara ai pliska nani ba klin brisa, ai uplika nani ba ai kaina kahbaia dukia nani ba pain yus munisa, klin banhwisa, ai trukka nani ba sin sîka nani srikbi klin daukisa. Yuaia dukia nani ba pliska klin ra swi banhwisa, bara yui banhwisa piua ra, yui uplika nani ba muihni lakri nani wina laihura kaia trai kaiki banhwisa.

 Enero kati 2021 ra, Tâ Brabrira nani Daknika ba âu takan, COVID-19 sikniska bri nani hilp munaia dukiara 25 milian dalaska nani yus munaia. Betel apiska bara Hilp Munaia Daknika nani ba aman kaiki banhwisa prisantka nani ba pain yus munaia, bara diara nani ba kau praiska sipar ra atkaia dukiara dîa sip ba kat daukisa. Wibia kaka, Chile ra, hilp munaia tâ bri kristian waitnika nani ba 1.653 paun bins nani atki banhwai kan. Kuna binska nani praiska ba kati kum bilara aima dubil ulan kan. Witin nani ba lâ daukan, praiska raya ra bins atkaia. Sakuna, awar 2 luan ningkara, binska wauhi waitnika ba Jehova witniska nani ra win waitna wala kum bins atkan kan ba kli brisi yaban. Baku bara, kau mana atkaia watlika ra, kati luan praiska wal Jehova witniska nani ra atkaia want sa win.

 Ban sakuna, kristian waitnika nani ba bins pliki wih banhwan taim, âiatkra ba danh atkaia want apia kan. Witin lukan Jehova witniska nani ba tnatka wapni ra plun nani yuras, asla takanka wala nani dauki kan ba baku. Kristian waitna kum ba ai kupia munhta kat ai pura sunan, ningkara bins âiatkra ba ra win, ya nani ba rait pali nitka bri ba aman laki kaikan sa. Baku sin wala nani mita param aisi win, plun auhbaia pakitska nani ba pamali nani dîa nitka bri banhwi ba praiska kat auhbi kan, baku bara pakitska bani ba, pamali bani dîa kau nit ba bahara auhban kan. Bara las kat witin ra win, Jehova witniska nani prisant nani bri ba, lalah kra, mihta warkka kra, kumi bani ai kupia wina yabisa. Bins âiatkra ba aihkakira ai dara walan. Baha mita, bins sipar atkaia baman wilin takras kan, pura praki, 882 paun binska nani ai prisantka baku yaban.

 Liberia ra kristian piarka mairin almuk kum nina Lusu ba, utla bilara upla 5 banhwisa. Titan kum ra, titan pata pih, yu bani Baibil tikska ba aisi kaiki banhwi kan, bara ai mulika 7 mani bri ba nu takan utla ra plun danh takan ba. “¿Nanara yawan dîa pibia?”, tuktika makabi walan. Ai kukika bila win, “Jehova ra pat puri sunri, bara hilpka sin makabri”. Witin kasak pali luki kan ai nitka ba Jehova mita yabai kan ba. Baha sim yua tutni ra, kangrigisan almukka nani ba Lusu ra winan bara win, “Plun nâra sa, ¡bal brih was!”. Lus aisisa: “Yang muli bila wisa, nanara kasak lukisa Jehova pura sunra nani walisa, kan yang ra sin ai walan”.

 República Democrática del Congo ra mairin kum, Jehova witniska nani pamalika kum lamara iwisa. Witnis nani wala mita plun bliki kan kaiki, naku win: “Sikniska saura lubia taim, Jehova witniska yang nani takamna, kan witin nani ba naha taim karna nani ra kasak ai muihni lakri nani ra luki banhwisa”. Ai maya waitna witin ra makabi walan: “¿Rais pakitska mana, man Jehova witniska kaisma ki?”. Mairka pana win: “Apia, baha dukiara apia. Kuna baha raiska pakitska ba wal dauki marikisa, pana pana latwan kaiki banhwi ba”.

 Tingki, man nani prisant yabisma ba mita, naha sikniska saura piua ra Jehova witniska nani ba muihni lakri nani ra isti hilp munaia sip kan. Tingki pali, donate.pr418.com ra mariki tnatka sât sât wal man nani prisant yabi banhwisma ba mita.