Truk lupia nani pat mani 10 brisa yawan aikuki smalkaia warkka ra. Tasba aiska ra naha trukka nani ba smalkaia warkka ra yus munisa taim upla sut kaikisa. Yabal ra kum mangkisa taim upla nani sut ba nu taki banhwisa yawan nani ya ba. Naha trukka lupia nani ba painkira sa bara yus munaia sin isi pali sa. Polonia kuntrika wina kristian mairin kum nina Asenata ba naku win: “Truk lupia nani ba isi sa yus munaia bara painkira banhwisa. Bara plis kum wina wala ra brihwi mangkaia ba sin isi pali sa”.

 ¿Pat makabi walram sa ki truk lupia nani ba nahki paskisa?

 2001 manka ra, Tâ Bri Daknika ba Francia tawanka ra muihni lakri nani ba yabal ra smalkaia tnatka raya nani laki kaikbia adarka yaban, naha tilara kan truk lupia nani yus munaia ba. Tnatka sât sât laki kaikan, tânka kum baku, baks nani ra wilwaika sirpi nani mangkan, ulbi sakanka nani mangkaia dukiara. Las kat Betel Apiska Tara ba muihni lakri nani dîa paskan ba wina kum wahbi sakan, bara mani ailal ra baha trukka lupia nani ba smalkaia warkka ra yus munan.

 Francia kuntrika ra trukka nani yus munaia tâ krikan bara yamnika ailal sakan. Baha mita 2011 manka ra Tâ Bri Daknika ba naha trukka lupia nani (Stech kuntrika) Nueva York tawanka ra yus munbia wahbi sakan. Tâura smasmalkra nani truk lupia nani wal wark takan nani ba, kaikan truk lupia nani ba hilp manis yabi kan ba. Naha hilpka nani tilara kaikan truk lupia nani ba plis kum wina plis wala ra lakaia sip kan ba. Baku sin kaikan diara kum kum nani ba nit kan kau pain daukaia. Baha mita naha dukiara lukanka kum kum yaban. Pas trukka nani ba tat wina paskan kan, bara teps nani wina uli bal iwaia ba karna pali kan. Baha mita trukka lupia nani ba kau ingni paskan, bara pâsa mapara dutki buaia ba dukiara sin. Bara plapaia wilwaika nani ba kau tara paskan, baku kau isi kan yabal saura nani ra brihwi impakaia. Baku sin, truk lupia nina saitka ra baks lupia kum mangkan ulbi sakanka nani mangkaia dukiara.

 Naha tnatka yus munaia ba yamni kaikan. Baha mita 2012 manka ra Tâ Bri Daknika ba wahbi sakan, muihni lakri nani ba truk lupia nani wal tasba aiska ra smalkbia. Truk nani ailal paski briaia dukiara kampani kum wal aisan, tnatka isi bara piua wihka wabia dukiara, diara pain nani wal paski sâkbia makaban.

 Mani nani kum kum bilkara, truk lupia nani ra chenska kum kum nani daukan sa. Tânka kum baku 2015 manka ra plastik lupia kum mangkan lî wina kaina kahbaia dukiara. Georgia tawanka wina kristian mairin kum nina Dina ba win, naha chenska ba lukanka painkira kum sa. Witin naku aisan: “Ulbi sakanka nani ba ban pain kaia sip sa, kan lî auhbia kra sin plastik kum wal kaina kahbi brisa”. 2017 manka ra bîla aisanka kum kum nani ra truk lupia nani mawan ra lilka nani mangkaia tâ krikan. Polonia kuntrika wina kristian waitna kum nina Tomasz ba win: “Truk lupia mawan ra lilka nani piu bani chens muni kaia ba wark tara kum kan, kan aima kum truk lupia nani mawan ra lilka ba praki kan taim sakaia karna kan, kuna nanara magnetik lilkika nani paskan ba mita isti pali saki mangkaia sip sa, painkira sa”. Truk lupia nani kau piua wihka wabia dukiara, 2019 manka ra paskaia tnatka ra chens kum kum nani daukan.

 Kampani kum baman ba truk lupia nani sut paskisa bara tasba aiska ra blikisa. Naiwa ba truk lupia kum atkaia ba 43 dalas mana sa, kuna baha tilara apia sa tawan kum ra blikaia mana ba. Naiwa piua kat, 420,000 truk lupia nani ba tasba aiska ra kangrigisan nani ra blikan sa, bara 16 milian dalas yus munan sa naha trukka lupia nani blikaia ba dukiara.

 Prisant nani pain yus munaia dukiara, truk lupia nani wans aima kum ra ailal atkisa. Baku sin kangrigisan nani sip sa truk lupia nani pîska aisawan nani ba kli atkaia.

 Muihni lakri nani ba laik sa truk lupia nani wal smalkaia. Ghana kuntrika wina kristian mairin kum nina Martina ba naku win: “Smalkaia tnatka nani ra yawan upla lamara wisa kuna truk lupia nani wal smalkisa taim upla nani ba wan lamara balisa. Naha trukka lupia nani lamara lui uplika nani ba Gâd sturka yamni dukiara nu takaia sip sa”.

 Afrika tawanka wala ra, waitna kum truk lupia lamara balan bara ai bîla aisanka ra ulbi sakanka kum brih wan. Wik kum ningkara kli tawi balan taim truk lupia lamara wih muihni lakri nani ra win: “Ulbi sakanka nani sut aisi kaikri. Baha ra dîa ulban ba tânka tara brisa. Baha mita tawanki ra waisna, bara pamaliki aisi kaikbia dukiara brih wih yabaisna”. Naha waitnika ai pamalika kaikaia dukiara 500 kilometro (311 milla) nani impakan. Kati wâl ningkara naha waitnika ba kli tawi balan, bara truk lupia wal bûi kan muihni lakri nani ra naku win: “Tawanki uplika nani ba ulbi sakanka nani sut pat aisi kaikan, bara uba laik kaiki banhwan. Witin nani Jehova witniska kum takaia want sa win. Sakuna makabi walanka nani kum kum brisa. Witin nani nu sa tahbi daukan lâka briaia dukiara liura dimi takaia sa, ban sakuna ai tawanka ra tingni kumi sin âpu sa. ¿Tahbi daukan lâka briaia dukiara witin nani na kat balaia sa ki?”. Naha waitnika ba ai bîla aisanka ba kat hilpka bribia dukiara, muihni lakri nani ba tâura smasmalkra kum blikan. Baha piua wina waitnika ba tâura smasmalkra wal ban aisisa.

 ¡Uba lilia sa kaikaia nahki truk lupia nani ba yus munisa “king lâka sturka yamni na tasba aiska ra smalkan kabia” dukiara! (Matiu 24:14). Tasba aiska ra lalah prisantka yabi bara tingki, naha trukka lupia nani ba smalkaia warkka ra yus munaia sip sa. Baha lalah prisantka nani aihkika ba Internet pliska donate.pr418.com bâk daukisa. ¡Tingki pali kupia pihni lâka marikisma ba mita!