Tâ Bri Daknika mapara tara pali sa prisant nani ba utla mâkaia warkka ra yus munaia, kan naha nani ba Gâd Kingka lâka sturka yamni nani smalkaia dukiara wan tâ baikisa. Tânka kum baku, 2023 smalkaia warkka manka ra, Betel apiska ra lâ dukiara wark taki daknika ba tasba aiska ra aidrubanka watla bara aidrubanka tara dauki pliska nani atkaia, mâkaia bara kli paskaia dukiara 500 milian dalas nani yus munan. a Bara naha lalahka tilara dingkras sa kangrigisan kumi bani ai asla aidrubanka watla kli paski bara main kaikaia dukiara lalah tiki ba.

 Baku sin prisant nani ba yus munisa Betel apiska nani paskaia bara main kaikaia dukiara, naha nani ba tasba aiska ra smalkaia warkka tâ briaia dukiara tânka tara brisa. Betel apiska kum kum ra mâkaia warkka ba tnatka kau isi ra daukisa, kan baku tnatka ra lalah ba kau apahkaia sip sa, bara aidrubanka watla bara asla aidrubanka kau tara pliska nani mâkaia bara kli paskaia dukiara yus munaia sip sa. Kuna raitka pali ba Betel apiska nani plis wala ra lakaia, kli paskaia bara main kaikaia dukiara lalah kau ailal plikaia nit sa. ¿Dîa muni naha warkka nani ba tara pali sa ki? ¿Bara Betel apiska nani ra dîa dauki ba, nahki smalkaia warkka ra tâ baikisa? Kaisa kaikaia.

 Betel apiska manis ba mâkan wina pat 30 apia kaka 40 mani nani luan sa. Tasba Aiska ra Diara Paski bara Mâki Daknika wina Nicholas ba naku aisan: “Plis kum pain main kaiki bri kabia kra sin, piu lui ba wal las kat aisawisa, bara trabil nani yabaia tâ krikisa. Plis kum yawan kli paskisa taim, kli raya dauki ba baku sa, bara baku sip sa baha pliska ra ban wark taki kaia”.

 Baku sin naiwa piua ra nitka raya nani taki ba mita, Betel apiska nani sin baha nitka nani wal asla kabia dukiara kli paskaia nit sa. Betel apiska manis mâkan ba wina, smalki tataukra raya kau ailal takan sa. Pâwanka ailal taki ba mita muihni lakri nani hilpka kau ailal sin nit sa, naha tânka sa. Betel apiska nani ba kau tara paskaia nit sa.

 Baku sin wan kaina kahbaia sa, yawan las tnata yua nani ra iwisa, baha mita tasba sauhkanka nani ba kau ailal takisa bara wan rayaka ra pât ra dingkaia sip sa (Luk 21:11). Betel apiska nani kli paskisa piua ra, diara nani mâkaia tnatka kau raya taki ba nina blikisa kaka, kau pain wan kaina kahbaia sip sa. Baku sin tasba sauhkanka kum takisa taim naha Betel apiska nani ba, hilp munaia warkka daukaia dukiara yus munaia sip sa.

 Smalkaia warkka manka 2023 ra, Tâ Bri Daknika ba tasba aiska ra Betel apiska 43 nani ra mâkaia warkka daukbia adar yaban. Naha warkka dauki ba nahki tânka tara bri ba kaikaia dukiara kaisa tânka kum kum laki kaikaia.

 Angola kuntrika. Naha kuntrika ra Apiska tara Pura Kaiki Daknika wina, kristian waitna kum nina Matt naku aisan: “Hageo 2:7 prapit dahra aisanka ba naiwa piua ra nahki aimaki ba tnatka pranakira kum ra kaikisa. 10 mani bilara smalki tataukra nani ba 60 % ra pâwan sa. Witin nani ra main kaikaia dukiara, Betel pamalika ba aima yumhpa prais baku kau tara takaia nit sa. Kuna, kau apis almuk bri kan ba ra wan tâ baikbia dukiara muihni lakri nani kau ailal paiwaia sip apia kan. Baha mita Betel warkka dauki muihni lakri nani ba kau karna wark takaia kan”.

 Naha trabilka bri kan ba mita Betel apiska kau tara paskaia dukiara, kristian waitna kum kum ra makaban, tnatka kum kum laki kaikbia, Betel apiska kau tara paskaia dukiara. Tâ krikanka ra luki kan, apis almuk nani bri kan ba kli paskaia kau isi sa. Kuna, ningkara tânka pain laki kaikan taim nu takan, baku tnatka ra daukbia kaka prisant nani ba pain yus munbia apia. Pain luki kaikisi wahbi sakan, Betel lamara plis kum bâra kan ba atki kli paskaia. Kristian waitna Matt ba naku sin aisan: “Muihni nani Apis tara Pura Kaiki Daknika ra Betel lamara plis kum atki kli paskaia lukanka dukiara aisan taim, yawan lukan baha pliska ba yawan dîa nit kan ba wankbia apia, kuna nanara klir pali kaikisa nahki baha wahbi sakanka ba Jehova blisin munan. Kan baha pliska ba yawan dîa nit ba sut brisa”.

 Ban kra naika piua ra Angola Betel apiska ba kau tara paskaia nit kabia. Naha kuntrika ra smalkaia warkka ba pâwanka tara brisa, kuna nitka nani takbia kra sin naha kuntrika Betel apiska latka ra paskan watla nani, apis raya, bara rent muni pliska nani ba wal baha nitka nani sut pura prakbia.

 Japan kuntrika. Naha kuntrika ra Betel apiska nani paskan ba wina pat 40 mani nani luan sa, bara aima kumi ra sin kli mâkaia warkka ba aiska pali daukras kan. Kuna karna pali trai munan sa naha pliska ba pain main kaiki bri kaia dukiara. Naha apiska nani ba yus munaia luki kan manka nani wina kau mani ailal luan sa. Baha mita, kli paskaia warkka tara kum pat tâ krikan sa.

 Naha las manka nani ra Betel apiska ra iwanka tnatka ba sât wala takan sa. 2015 manka kat, Betel apiska ra upla sut dukiara plun nani piaki kan. Baha mita, Japan Betel apiska ra rum nani bilara “kitsin” sirpi kum paskan. Kuna nanara, Betel ra wark taki muihni lakri nani kumi bani ba, silp ai rumka ra ai pata piakaia sa. Naha muihni lakri nani mapara baha daukaia kau isi kabia dukiara, kli mâkaia warkka nani tilara sa kitsin nani kau tara daukaia. Japan Betel apiska wina kristian mairin kum nina Kumiko ba naku aisan: “Naha kitsinka raya ba wal daira walisna, Betel iwanka tnatka raya ba alki daukaia kau isi sa. Raitka pali ba waitla ra sna baku daira walisna”.

 Japan Betel apiska ra dîa dauki ba, tasba aiska ra smalkaia warkka ra yamni munisa (Matiu 28:19, 20). Kan tasba aiska ra Baibil nani print muni ba, Betel apiska tara wâl baman bâra sa, bara naha nani tila wina kum ba Japan Betel apiska sa. Baha mita naha apiska kli mâkaia warkka dauki kan taim, tasba yuyaka nani bara wauhtaya pîska nani takaski kan ba wahbaia dukiara masin kum sin mangkan. Naha masinka atkaia bara mangkaia dukiara, milian dalas kum baku aibapan. Kuna naha ba print muni apiska ra wark taki muihni lakri nani ra kaina kahbisa, baku tnatka ra witin nani ba spirit pata ba ban print muni bliki kaia sip sa.

 Baibil print munaia warkka ba alki takaskaia want apia sa, baha mita naha warkka dauki kan piua ra bahara wan sinska uba mangkan. Japan Apiska tara Pura Kaiki Daknika wina kristian waitna kum nina Trey naku aisisa: “Yawan naha warkka dauki kan piua ra Baibil print munaia warkka ba sin ailal takan, kan tasba aiska ra wan asla takanka ba bîla aisanka kau ailal nani ra Baibil ba print munaia tâ krikan. Masinka mangki kan piua ra, ulbi sakanka nani paskaia bara print munaia warkka ba alki takaskaia apia dukiara, Betel apiska nani bara masinka mangki kan kampanika ba wal asla wark takaia nit kan”. Naha daukaia isi apia kan, 2023 manka ra marzo wina agosto katka kat, Baibil 220.000 baku print munan, naha ba kati bani dauki kan. Bara baha piua ra, ulbi sakanka nani print muni apiska ba kli paskaia warkka nani aihkika ba sin daukan. Baku wark nani sut daukaia sip kan, lalah kau ailal yus munraskira.

 Kli paskaia warkka nani daukisa taim lait uya yus munaia apia trai munisa. Baku bamna, paneles solares raya nani mangkbia, naha nani ba yuskira pali kabia mani bilara yawan sip kabia 120.000 dalas nani lait mana apahkaia. Baku sin windar nani ra glas kau twakni mangkbia, baku tnatka ra sip kabia mani bilara 10.000 dalas nani lait mana apahkaia. Âu naha warkka nani daukaia ba kau mana sa, kuna piu lui ba wal kaikaia sip kabia nahki lalah apahkaia dukiara hilp wan muni ba. Kan naha pliska nani yus munaia luki piua ba kulki kaikisa taim las kat sip kabia 3.5 milian dalas nani apahkaia. Bara baku tasba paskanka ra sin tâski daukbia apia bara saura munbia apia.

 Tasba aiska ra Betel apiska nani ba, kangrigisan nani ra tâ baiki kabia dukiara, ¿yawan dîa sât warkka nani daukaia sip sa ki? wel nu takaia dukiara Angola ba ra Betel apiska nani ra kli paskaia warkka dauki nani ba kaikaia sip sa. ¡Kli paskaia warkka nani kau ailal bâra sa! Tasba Aiska ra Diara Paski bara Mâki Daknika wina kristian waitna Aaron naku wisa: “Diara manis daukan sa, kuna wark ailal nani kau bâra sa...”. Naha warkka nani daukaia dukiara dîa nit ba witin tânka marikisa: “Wan muihni lakri nani yabi prisantka nani âpu sa kaka, naha warkka tara nani ba daukaia sip apia sa. Kuna baku sin, wan tâ baikaia dukiara wilin takan muihni lakri nani ra sin tingki wiaia sa. Bara naika piua ra, kli paskaia warkka tâ baikaia dukiara ridi taki muihni lakri nani ra sin tingki wisa. Raitka pali ba wan muihni lakri nani wan tâ baikaia dukiara nahki ai karnika, bara ai yuyaka yus muni ba wan marikisa yawan Jehova blisinka bri ba” (Lawana Nani 110:3).

 Prisant nani yabi uplika nani ra tingki, mâkaia bara kli paskaia warkka ba daukisa, naha prisantka nani aihkika ba donate.pr418.com bâk daukisa. ¡Kupia pihni lâka ban marikisma ba dukiara tingki pali!