Tasba aiska ra gabamint ailal makabisa distancia física bri kaia bara upla manis sim piua ra plis kum ra aidrubaia apia. Jehova witniska nani ba gabamint bîla wali, tnatka wala ra asla aidrubisa. Kangrigisan bani Zoom baku aplicación nani yus muni, videoconferencia bâk asla aidrubisa.

 Tadi aidrubi kaia dukiara Tâ Bri Daknika ba aitani lukan sa, kangrigisan nani Zoom cuentika atkaia dukiara lalah prisantka nani ba yus munaia. Lalah âpu kangrigisan nani mapara baha ba hilpka tara takan sa. Kan cuentika dukiara 15-20 dalas apia kaka kau aibapaia nit sa. Baha sât kangrigisan nani ba aplicación mana luha nani yus muni kan. Sakuna baha nani wal aima kum ra upla ailal dimaia sip apia kan, bara kaina kahbanka aitani briras kan. Lalah aibapisa kaka, sip sa kaina kahbanka aitani briaia bara upla manis sim piua ra aidrubaia. Nawas kat 170 kau pura kuntri nani ra 65.000 kangrigisan nani baha yus munisa.

 Indonesia kuntrika, Célebes Septentrional, Manado tawanka, Kairagi kangrigisanka ba videoconferencia aplicaciónka mana luha kum yus muni kan, kuna nanara kangrigisan Zoom cuentika yus munisa. Kristian waitna Hadi Santoso ba naku wisa: “Celular apia kaka sâtka wala nani uya kakaira apia muihni lakri nani sin aidrubanka nani wina liliaka sakisa. Kan nanara aidrubanka bilkara kli kli dimaia nit apia sa”.

 Ecuador kuntrika, Guayaquil tawanka, Guayacanes Oeste kangrigisan almukka kum, nina Lester Jijón hijo ba naku aisisa: “Muihni lakri manis lalah trabilka brisa. Baha mita kangrigisan kum kum ba Zoom cuentika atkaia sip apia kan. Aima kumi ra upla wiria baman aidrubanka ra dimaia sip kan. Sakuna nanara kangrigisan Zoom cuentika yus muni ba mita, upla an dingkaia dukiara lukaia nit apia sa. Upla manis ra dimbia paiwaia sip sa”.

 Zambia kuntrika, Lusaka tawanka, Norte Ngwerere kangrigisan almukka kum, nina Johnson Mwanza ba naku ulbisa: “Kangrigisan muihni lakri nani manis bîla, Zoom bâk aidrubi ba mita muihni lakri wala nani wal asla sa ai dara walisa. Jehova latwan wan kaiki, yawan ra luki ba sin ai dara walisa”.

 Zoom cuentika atkaia dukiara, tasba sauhkanka nani takisa taim hilpka yabaia lalahka ba yus munisa. Bara baha lalahka ba tasba aiska ra smalkaia warkka ra prisant yaban ba wina sakisa. Baha prisantka nani ba kumi bani ai kupia wina wilinkira yabisa. Bara manis ba Internet donate.pr418.com bâk yabisa. Man nani kupiam pihni prisant yabi banhwisma ba mita yawan tingki lukisa. Bara baha prisantka nani ba tasba aiska ra tasba sauhkanka nani takisa taim, hilpka yabaia dukiara sin yus munisa (2 Korint 8:14).