Jehova ai uplika nani ra smalkaia laik sa, baha mita ai asla takanka ba skul manis ridi daukan sa, muihni lakri nani spirit lainka ra ai warkka nani ba pain daukbia dukiara. Naha skulka nani tilara sa, King lâka Sturka Smalki nani Skulka ba. Mani kum kum luan wina Jehova asla takanka ba naha skulka nani ra dîa smalkbia ba baman kau pain kabia laki kaikras sa. Baku sin pliska nani ba kau pain kabia dukiara kasak karna wark taki banhwisa. ¿Dîa muni baku daukisa? Kan baku smasmalkra nani, bara stadi tatakra nani ba, naha skulka nani bribia piua ra pliska ra pain ai dara walbia. ¿Naha daukaia dukiara prisant nani ba nahki yus munisa ki?

 Pat mani ailal piua wina, spirit lâka ra lan wan dauki skulka nani ba, Aidrubanka Watla nani bara Aidrubanka Kau Tara Watla nani ra dauki kan. Kuna nanara plis nani ridi daukan sa naha skulka nani briaia dukiara. ¿Dîa muni? Kaisa tânka 3 kaikaia:

 Nitka nani manis bâra ba mita. Smalkaia Warkka Pura Kaiki Daknika hilp mamunra, kristian waitna Christopher Mavor ba naku win: “Betel apiska nani ba wan maisa pakan, smalkaia warkka ra tâ baiki muihni lakri nani kau nit pali sa. Tânka kum baku, 2019 manka ra, Brasil Betel apiska ba kulki saki kaikan, smalkaia warkka tâ baikaia dukiara King lâka Sturka Smalki nani Skulka brin muihni lakri nani 7.600 nit sa”. Baku sin Stech Betel apiska ba, tâura smasmalkra lankira manis nit sa, kan baku muihni lakri nani ra tawan tara ra, ship takaski pliska ra, bara silak watla ra smasmalkra kau pain nani kabia dukiara lan daukaia sip sa. Baku sin kristian waitna nani Diara Mâkaia Daknika bara Aspital wal Asla Daukaia Daknika ra tâ baikbia nit sa, bara King lâka Sturka Smalki nani Skulka brin muihni lakri nani ba naha sât warkka nani daukaia sip sa.

 Makabanka nani ailal ulbi dingkisa. Betel apiska manis nani ra muihni lakri nani skul ra dimaia makabanka dingkisa, kuna uba ailal ba mita sut ra winaia sip apia sa. Tânka kum baku, Brasil kuntrika ra mani kum ra baman, muihni lakri nani ba Betel apiska ra, 2.500 makabanka nani ulbi dingkan. Kuna naha skulka dauki pliska nani ba uya tara apia ba mita, Betel apiska ba 950 ra baman winaia sip kan.

 Dimi takaskaia watla kau pain nani. King lâka Sturka Smalki nani Skulka ba Asla Aidrubanka Watla apia kaka Aidrubanka Kau Tara Watla nani ra daukisa taim, stadi tatakra nani ba muihni lakri nani watla ra dimi takaskaia nit sa. Naha ba aima kum kum ra baman daukisa kaka pain sa, kuna plis kum kum ra naha skulka mani bilara aima ailal ra daukisa kaka, muihni lakri nani mapara baku piua yari stadi tatakra nani ra ai watla ra briaia karna munisa. Baha mita Asla Takanka wahbi sakan, skulka nani dauki pliska lamara stadi tatakra nani dukiara, takaskaia pliska kum ridi daukaia.

 Smasmalkra nani bara stadi tatakra 30 nani baku dukiara, skul briaia pliska kum, bara dimi takaskaia watla nani paskaia, baku sin kumi bani dîa nit ba yabaia dukiara lalah milian nani nit sa.

 Skul yabi pliska nani ba tawan tara lamara mâkisa, kan baha sât pliska ra uya bin âpu sa, bara stadi taki uplika nani mapara impakaia kau isi sa. Baku sin naha pliska nani ba kangrigisan tara nani lamara mangkisa, baku pliska main kaikaia dukiara muihni lakri nani ba ai hilpka yabaia sip sa.

 Naha pliska ra stadi takaia dukiara buk nani bri pliska kum, bara stadi takaia rumka kum brisa. Baku sin computadora, bara print munaia masinka nani bâra sa. Naha pliska aihkika nani ba, stadi tatakra bara smasmalkra nani aikuki pibia dukiara rum kum ridi daukan sa. Baku sin muihni lakri nani ba plapaia, apia kaka pulaia dukiara pliska kum bâra sa.

 Kuna baha sut purkara, pliska kau tânka tara bri ba sika skul yabi rumka nani. Nueva York, Warwick ra, Tasba Aiska Diara Paski bara Mâki Daknika ra wark taki kristian waitna kum nina Troy naku aisisa: “Stadi tatakra nani bara smasmalkra nani skul yabi pliska nani ra kau pain ai dara walbia dukiara, Spirit Lainka ra Lan Wan Dauki Skulka nani Apiska ra makaban, plis kum kau pain mâkaia dukiara hilp wan munbia. Muihni lakri nani ba naha rumka nani nahki paskaia, bara lait nani nahki tnatka ra mangkaia dukiara lukanka kum kum wankan, baku sin bin sakaia bara lilka marikaia masinka nani rumka bilara ani pliska ra kahbi mangkaia kau pain ba wan marikan”. King lâka Sturka Smalki nani Skulka smasmalkrika kum nina Zoltán ba, naha dukiara naku aisan: “Tâ krikanka ra micrófono âpu kan ba mita, stadi tatakra nani ra makabaia kan, kau ai karma buki aisabia. Kuna nanara stadi tatakra kumi bani tibilka ra micrófono nani bâra ba mita, baha trabilka danh briras sa”.

 ¿Stadi tatakra nani bara smasmalkra nani ba naha chenska wina dîa yamnika brin? Stech kuntrika ra Florida Palm Coast tawanka ra, King lâka Sturka Smalki nani Skulka brin kristian mairin Angela naku aisan: “Plis painkira kum sa, diara sut ba pain luki kaiki paski banhwan. Skul briaia rumka nani bara yapaia rumka nani baku nahki paskan tnatka ba hilp wan munisa skulka ra wan sinska aiska mangki diara manis lan takaia”. Hungría kuntrika ra smasmalkra kum nina Csaba ra, naha skulka ra stadi taki nani wal aikuki plun piaia laik sa. Naha daukaia ba yamnika manis brisa, tânka kum baku “yawan aikuki pi ba mita, stadi tatakra nani ba kau ai kupia kwâki, ai rayaka dukiara wan aisaia wilin sa. Baku witin nani ra kau kakaira takisa, bara ai nitka nani ra luki wan klaska nani ba ridi daukaia sip sa”.

 Smasmalkra nani bara stadi taki muihni lakri nani sut mapara naha pliska nani kau pain paskan ba, wan Smasmalkra Tara Jehova wina blisin tara kum baku kaikisa (Aiseya 30:20, 21). Tânka kum baku Filipinas kuntrika ra, King lâka Sturka Smalki nani Skulka dukiara uptis watla kum ridi daukan, bara naha skulka ra diman kristian mairin kum ba naku aisan: “Skul dukiara naha pliska nahki ridi daukan ba ai marikan naha ba Jehova wina paiwanka prana kum sa, yawan stadi takaia dukiara baman balras kan ba klir sa. Witin want sa yawan ai bîla stadi taki kabia piua ra liliakira wan dara walbia”.

 Man nani prisantkam nani yabi banhwisma ba ra tingki, skul nani dauki pliska nani ba mâkaia bara main kaikaia sip sa. Naha prisantka nani aihkika ba wan Internet pliska donate.pr418.com bâk daukisa. ¡Kupia pihni lâka mariki banhwisma ba mita tingki!