Yawan nu sa, tnata yua nani ra “war nani dukiara bara war trabilka nani dukiara sin aisi kabia” (Matiu 24:6). Muihni lakri manis naha trabilka tâka pât wahwisa, kuna aima bani hilpka nit ba brisa. Mani 2022 Tâ Bri Daknika wina diara raya #3 ra, Europ lalma tani ra Ucrania muihni lakri nani ra nahki hilp muni ba dukiara wan aisan, baha walaia ba kasak wan maisa nihkan. ¿War aiklabanka tilara naha hilpka yabaia dukiara dîa daukisa? ¿Ucrania wina wan muihni lakri nani ba naha sât hilpka wina dîa yamnika brisa?

 2022 febrero kati 24-war aiklabanka tâ krikan yua-, Pura Kakaira nani Daknika ba wan muihni lakri nani ra hilp munaia dukiara lalah yus munaia adarka yaban. Ucrania Betel apiska ba, mahka dîa nit kan ba atkaia tâ krikan, bara 27 Hilp Munaia Daknika asla dauki dîa atkan ba muihni lakri nani ra brih wan.

 Baku sin, Jehova witniska nani tasba aiska ra apiska kau tara ra muihni lakri nani ba Ucrania apiska ra hilp munaia tnatka plikaia tâ krikan. Tâ Bri Daknika wina Pura Kakaira nani Daknika wihki Ulbi Sakanka Pura Kaiki Daknika wal tasba aiska ra diara atki daknika ra Ucrania bara Polonia Betel apiska wal naha trabilka dukiara asla wark takbia makaban. Naha Betel apiska nani ra Diara Atkaia, Blikaia bara Lâ Tânka Daknika muihni lakri nani sât sât ba, Ucrania Betel apiska Pura Kakaira nani, bara Tasba Aiska ra Diara Atki Apiska wina muihni lakri nani wal yu bani pana pana aisi asla wark taki banhwan.

 Tasba Aiska ra Diara Atki Apiska wina, Jay Swinney naku wisa: “Pas ba yawan muihni lakri nani dîa nit kan ba nu takaia kan. Ucrania kuntrika ra muihni lakri nani ai wîna tara klin munaia dukia nani bara plun witin nani pat kakaira kan ba plikaia want kan. Sakuna witin nani dîa nit kan ba ra lukaia baman aitani apia kan; kan Ucrania kuntrika kat witin nani dîa nit kan ba blikaia dukiara tnatka kum pain bara kau isi kum plikaia kan”.

 2022 marzo kati 9 kat, dîa blikaia nit kan ba pat nu takan. Wahbi sakan baks nani ra plun aisawras nani ba blikaia, wîna, inska, aya, rais, bins, sup bara tailit ra yus muni wauhkataya ba. Baha piua ra numba kulki saki kaikan, upla kum dukiara dîa bliki kan ba wik 4 yus munaia sip kan, bara baks bani ra 65 dalas yus muni kan. Muihni lakri tausin nani naha bakska nit kan ba kaiki, blikaia dukiara Pura Kaiki Daknika ba lalah kau ailal yus munbia adarka yaban. Kuna ¿nahki pât ra dimras kira brih waia sip kan ki?

 Marzo kati 13 ra, Polonia kuntrika wina witnis waitna wâl ba bakska nani brih waia aima kum trai munan. Witin nani Polonia Betel apiska tara wina Ucrania kuntrika Leópolis (Lviv) tawanka lama kat wan. Kau taki waras de kum kum kainara, Ucrania bara Polonia Betel apiska wina muihni lakri nani ba, naha impakanka ridi daukaia dukiara ai hilpka yaban. Upla ra hilp yabaia dukiara tauki ba klir kaikbia dukiara trukka nani ra sain nani mangkan. Bara baha tawanka muihni lakri nani wal ani yabalka kau isti Ucrania kuntrika ra brih wi kan ba wahbi sakan. 24 awar nani kau alkras ba ra, witin nani Leópolis tawanka ra diman, bara Hilp Munaia Daknika nani ra bakska nani yaban. Bara bakska brih wi witniska waitna nani ba Polonia kat kli pain tâwan. Naha sut ba pain ridi takan ba mita, bara Jehova blisinka ra tingki daukaia sip kan.

 Pas impakanka ba pain takan, kuna muihni lakri nani ba diara nani 2,000 paun nani baku yuaia sip kan. Sakuna 440,000 paun nani kau yuaia bri kan. ¿Nahki sip kaia kan baha dukia nani ba kau isti upla mihta ra brih wi yabaia?

 Naha war aiklabanka ba wan muihni lakri nani ra nahki trabil muni ba jw.org ra aisi kaiki, tasba aiska ra upla manis wilin takan hilp munaia. Upla nani Ucrania wina laihura iwi nani ba Jehova witniska nani tasba aiska ra warkka dauki ba ra prisantka nani yaban, kan witin nani nu banhwisa lalahka nani ba pain yus muni banhbia. Wala nani Ucrania lamara iwi nani ba, ai taimka, karnika bara dîa bri ba yabi banhwan. Kaiks dîa dauki banhwan ba.

 Polonia kuntrika ra wilinkira nani daknika tara kum baks nani ailal ridi daukan hilp yabaia dukiara, bara tuktan nani sin ailal ai mihta wal lilka nani paskan. Polonia Betel apiska tara Diara Atkaia Daknika ra wark taki Bartosz Kościelniak ba naku aisisa: “Lawana Nani 110:3 wisa Jehova uplika nani ba wilinkira yabisa. Naha bîla nani ba aima ailal aisi kaikri kan. Muihni lakri nani ailal isti pali asla taki ai hilpka yabi ba naikra pali ni kaikri taim, tâinka briri naha bîla nani ba kasak sa”.

 Witniska waitna kum tasba aiska ra diara nani blikaia kampanika kum bri ba ai trukka tara nani lin munan, bara giaska nahki pitka kat nit kabia ba mana aibapan. Witin bila wisa: “Yang maipara sanska painkira kum sa muihki laikra nani ra bara Jehova ra nahki latwan sna ba dauki marikaia. Hilp munaia sip kapri ba mita lilia sna”. Asla sut, diara nani brih waia dukiara gias 2,034 gialan nani kau pura prisant yaban. Bara muihni lakri nani ba truk wâl ra 48,000 kilometro nani (30,000 mails) impaki banhwaia sip kan, baku ai taimka bara karnika sin yabi banhwan.

 Latwan lâka bara wilinkira nani karna wark taki banhwan ba ra tingki, marzo kati 28 kat—pas impaki kaikan ba wina dis 15 yua nani ningkara—Ucrania kat plun, sîka bara diara wala nani 200,000 paun nani brih wan. Baku sin, muihni lakri nani bara kampani ailal diara manis prisant yaban ba mita, lalah ailal apahkaia sip kan hilpka yabaia bakska nani ba ridi daukaia dukiara. Nawas kat, yawan Jehova witniska nani ba Ucrania kuntrika kat 380,000 paun nani upla hilpka blikan sa. ¿Muihni lakri nani baha brin ba ra nahki ai dara wali banhwisa ki?

 Leópolis tawanka ra bakska nani balan taim, Ucrania kuntrika aiska ra Hilp Yabaia Daknika ba ya nitka bri nani ra naha bakska nani yuan. Naha bakska nani aihkika ba Leópolis tawanka wina kau 1,300 kilometro nani (800 mails) impaki brih wan. Tnatka pain nani ra blikaia trai munan sa, kuna ban taim ailal nit kan. a

 Ucrania Betel apiska Pura Kaiki Daknika wina Markus Reinhardt naku aisisa: “Dîa taki ba wal, muihni lakri nani manis ba ai nakra pali wal Jehova latwanka lâka ba kaikan sa. Baku sin, kau trabil kum takras kainara Jehova asla takanka smalkanka nani bîla walaia yamnika sin kaikan. Tânka kum baku, yawan sut ra wan kupia bukisa utla ra wik nani kum kum dukiara lî bara plun ridi bri kaia. Baha dukiara Kiev tawanka wina kangrigisan almukka kum nina Anton ba naku aisisa: ‘Naha sât trabilka tara mapara, Jehova asla takanka nahki ridi wan muni ba dukiara yawan tingki lukisa. Plun, lî bara radio kum utla ra ridi bri kaia ba wan rayaka swaki sakan’. Diara lilia sa muihni lakri nani ba naha smalkanka nani dîa wi ba kat alki daukan ba mita. Baku Betel apiska tara ra taim yaban Hilp Yabaia Daknika ba asla daukaia dukiara”.

 ¿Hilpka brin taim wan muihni lakri nani ba nahki ai dara wali banhwan ki? Járkov tawanka ra iwi Míkola bara Zinaida naku aisisa: “Muihni lakri nani yawan ra luki ba mita, wan kupia nikbisa. Tingki pali plun bara pils nani blikram ba mita. Jehova naha warkka tâ bri ba latan kaikisa”. Sim tawanka ra iwi Valentina naku aisisa: “War aiklabanka tâ krikan taim, plun atkaia dukiara awar ailal bûi bîla kaikaia nit kan, bara dîa nit kan ba sut lika atkaia sip apia kan. Kuna Jehova wan trabilka ba pat kaiki kan. Baha mita yawan dîa nit kan ba bribia dukiara, Jehova lakri nani ra yus munan bakska nani utla kat bri balbia dukiara. Trabil tara tilara sma taim, bara dîa daukaia nu âpu sma taim, baha piua ra kaikisma nahki Jehova bara ai asla takanka ba latwan lâka ni main mai kaiki ba. Nit sma piua ra hilpka bara tâ baikanka brisma taim, âmyapah damra walisma”.

 Evguen bara Irina ba Mariúpol tawanka wina plapaia kan, bara naku aisisa: “Wan pamalika ra latwan lâka ni main wan kaikram ba mita, wan kupia aiska wal tingki lukisa. Raitka pali ba, baha hilpka ba piua kat balan. ¿Nu sma dîa? Bakska nani balan taim, yawan luki kan plun bara pils nani baman bri kan. Sakuna bakska nani kwâkan taim kaikan, latwan lâka ni banhki balan”.

 “War nani dukiara bara war trabilka nani dukiara sin aisi kabia” piua ra latwan lâka wal hilpka yabi ba klir marikisa, Jehova smalkanka bara ai spiritka mita wan tâ bri ba. Sakuna Internet pliska donate.pr418.com bâk prisantkam nani yabisma ba sin hilpka tara sa. ¡Kupia pihni lâka mariki banhwisma ba mita tingki mai wisa!

Tnatka kau isti bara pain wal hilpka yabisa

1. Mani 2022 febrero kati 24 yua: Pura Kakaira nani Daknika ba Ucrania kuntrika muihni lakri nani ra hilpka yabaia dukiara lalah yus munaia âu takan.

2. Mani 2022 febrero kati 24 yua wina marzo kati 8 yua kat: Ucrania Betel apiska tara ba dîa nit ba atkan, bara Hilp Yabaia Daknika bâk yuaia tâ krikan. Baku sin Polonia kuntrika wina diara nani balbia ba yuaia dukiara ridi takan.

3. Mani 2022 marzo kati 9 yua: Pura Kakaira nani Daknika ba adarka yaban Ucrania kuntrika muihni lakri nani ra dîa nit ba blîkbia.

4. Mani 2022 marzo kati 10 yua wina 12 yua kat: Polonia kuntrika wina Ucrania, Leópolis tawanka kat nahki aima pas ra hilpka nani blikaia laki kaikan.

5. Mani 2022 marzo kati 13 yua: Polonia kuntrika wina Leópolis tawanka kat pas trip diara nani brih wan.

6. Mani 2022 marzo kati 14 yua wina 16 yua kat: Polonia kuntrika Poznań tawanka lamara Aidrubanka Tara Watla kum ra, Diara nani Paskaia bara Mâkaia Daknika ra wilinkira wark taki muihni lakri nani ba dîa nit ba yuaia dukiara bakska nani ridi daukan.

7. Mani 2022 marzo kati 17 yua: Pas impakanka pain wan yua walhwal ningkara, Ucrania kuntrika piarkika kat hilpka nani 26,000 paun nani blikaia tâ krikan.

8. Mani 2022 marzo kati 21 yua wina 27 yua kat: Polonia kuntrika ra sim tnatka wal hilp yabaia bakska nani kau ridi daukan, bara Ucrania kuntrika ra blikan. Kau 24 awar nani luras ba ra, nitka bri pliska nani kat brih wan.

9. Mani 2022 marzo kati 28 yua: Hilpka nani blikaia adarka yaban ba wina 20 yua nani bilkaku, plun, sîka, bara diara wala nani 200,000 paun nani Ucrania kuntrika kat blikan sa.

 Nawas kat, Jehova witniska nani ba Ucrania kuntrika kat hilpka nani 380,000 paun nani blikan sa.