Jehova witniska nani ba kuntri bara pliska 200 kau purara upla ra hilp munaia warkka tara daukisa. Sakuna dis kuntri bara pliska 35 baman baha ra iwi muihni lakri nani wina prisant nani aitani brisa baha warkka daukaia dukiara. ¿Plis wala nani ra nahki tnatka ra lalah nitka ba main kaikisa?

 Jehova witniska nani Tâ Bri Daknika ba tasba aiska ra Jehova ra mayunaia bara sturka yamni smalkaia dukiara muihni lakri nani nitka ba main kaikisa. Lalah an yus munbia pain laki kaiki, sins lâka wal prisant nani ba yus munisa. Apis tara kum lalah prisant ailal brisa kaka, lalah aitani briras apiska tara wala nani ra blikisa. Baku tnatka ra patitara piua ra kristian nani dîa dauki kan ba nina blikisa. Witin nani ba “aikuki kumi lâka” ra pana pana hilp muni kan (2 Korint 8:14). Diara ailal bri kan nani ba diara uya briras kan nani ra hilp muni kan.

 ¿Apis tara wala wina prisant nani bri muihni lakri nani ba nahki ai dara wali banhwisa? Tanzania kuntrika ra iwi upla nani bakriki baku ba de kum raya kaia dukiara 2 dalas kau wiria baman brisa. Sakuna Mafinga kangrigisanka muihni lakri nani ba ai Asla Aidrubanka Watla kli paskaia sip kan. Kangrigisanka na naku ulban: “¡Kli paskan wina upla kau ailal wan aidrubanka nani ra dimisa! Jehova asla takanka bara tasba aiska muihni lakri nani kupia pihni lâka yang nani ra ai marikan ba ra uba tingki luki banhwisna. Uba lilia banhwisna, pliska painkira ra Jehova ra mayunaia sip ba mita”.

 COVID-19 tâka mita Sri Lanka kuntrika muihni lakri nani ba plun wahwan sa. Imara Fernando bara ai luhpia waitna Enosh sin pât wahwan. Sakuna kuntri wala nani wina prisant nani blikan ba ra tingki, dîa nit ba briaia sip kan. Witin nani wauhkataya sirpi kum ai mihta ni paski, naku ulbi banhwan: “Yang nani tingki luki banhwisna naha piua karna ra muihni lakri nani latwan lâka ai marikan ba mita. Jehova pamalika tilara banhwisna ba mita uba lilia banhwisna. Bara ban puri suni banhwisna naha las tnata yua nani ra Jehova wan muihni lakri nani ra hilp muni kabia”.

 Wan muihni lakri nani ba ani ra iwi kabia kra sin, dîa bri ba pana pana sher munisa. Bisiura aisan tuktika Enosh ba, baks sirpi kum paskan lalah apahkaia dukiara. Baku witin sin muihni lakri pât wahwi nani ra hilp munaia sip sa. México kuntrika ra iwi Guadalupe Álvarez ba sin kupia pihni brisa. Ai tawanka ra upla nani ba umpira pali sa bara kati bani pede briras nani sin ailal sa, kuna asla takanka ra tâ baikaia dukiara witin dîa sip ba kat daukisa. Witin naku ulban: “Yang Jehova ra tingki lukisna ai latwanka lâka bara kupia yamni ba mita. Yang nu sna prisantki ba sin muihni lakri nani nitka dukiara yus takbia”.

 Apis tara nani lalah bliki ba wala nani ra tâ baikaia sip ba mita lilia sa. Brasil Apiska tara Pura Kaiki Daknika ra wark taki Anthony Carvalho ba naku aisisa: “Mani ailal Brasil kuntrika ba lalah hilpka nit kan. Baha hilpka ra tingki, pâwanka painkira kaikaia sip kan. Nanara, lalah lainka ra bitar ba mita pliska wala nani ra hilp munaia sip sa. Brasil kuntrika muihni lakri nani ba nanara nu sa smalkaia warkka ba tasba aiska ra daukisa bara Jisas disaipilka pain nani baku tâ baikaia tnatka nani kau plikisa”.

 ¿Muihni lakri nani hilp munaia dukiara tnatka kau pain ba ani sa? Kuntri wala apiska tara ra dairik lalah blikaia apia sa, tasba aiska smalkaia warkka ra lalah prisant yabaia lika. Kangrigisan bani prisant yabaia bakska “Tasba aiska smalkaia warkka” ulbanka bri ba ra lalah dingkaia sip sa. Apia kaka, Internet donate.pr418.com bâk prisant yabaia sip sa. Man nani dîa dîa prisant yabisma ba sut manakira pali sa, tingki pali.