Tasba aiska ba mani wala nani ba wal naha manka ra bitnika ba kau aihka taki aula sa, bara baha tâka tasba sauhkanka sin manis takisa. Kuntri kum kum ra naha dukiara dîa aisan ba kaiks:

•   “Naha Tasba ra mani bani bitnika ba ani kat taki ba yawan ulbi brisa, bara naha dauki pat 174 mani brisa, kuna mani wala nani ba wal naha junio katka ba Tasba aiska ra kau bitni kan” (Oficina Nacional de Administración Oceánica y Atmosférica, Departamento de Comercio de Estados Unidos, julio kati yua 13, 2023).

•   “Italia, España, Francia, Alemania bara Polonia kuntrika ba bitni aihka taki trabilka mapara aiklabisa, bara bîla kaikisa Sicilia bara Cerdeña kîka nani ra bitni ba 48 ºC [118 ºF] kat kau lapta kabia. Wiaia sip sa, Europ kuntrika nani ra pas trip naku aihka lapta takisa” (Agencia Espacial Europea, julio kati yua 13, 2023).

•   “Tasba aiska ra baku lapta karna pruki ba mita bîla kaikisa, piua bani lî kau karna auhi kabia, bara baha tâka lisamra tara nani kau dingki kabia” (Stefan Uhlenbrook, director de la Sección de Hidrología, Recursos Hídricos y Criosfera de la Organización Meteorológica Mundial, julio kati yua 17, 2023).

 ¿Tasba aiska ra dîa taki ba sturka nani walisma ba mita uba wari takisma ki? Naha trabilka tara dukiara Baibil dîa wi ba kaiks.

 Âu. Wan piua ra bitni aihka bara tasba sauhkanka ailal taki ba dukiara, Baibil ba prapit aisan kan. Tila wina kum dukiara aisabia kaka, Jisas win “diara sibrinkira nani” apia kaka “sain aihka nani” yawan kaikbia (Luk 21:11). Upla manis naha Tasba ra nahki bitni aihka kau ailal taki ba kaiki sirang iwisa, bara las kat upla nani naha Tasba sauhki tikbia luki ba mita, uba wari takisa.

 Apia. Gâd ba naha Tasba yawan ban kaia ra iwbia dukiara paskan. Baha mita, upla nani naha Tasba sauhki tikbia swibia apia (Lawana Nani 115:16; Smasmalkra 1:4). Bara baha baman apia. Gâd pramis munan sa, “naha tasba sauhki uplika nani ra, sauhki [tikbia]” (Param Marikan 11:18).

 Baibil ba marikisa Gâd ba sauhkanka aihka saura nani wina naha Tasba kaina kahbaia sip sa, bara yawan kasak lukaia sip sa witin ba daukbia.

•   “Pâsa saura karna krawi ba [Gâd] mita lamni daukan, bara rip nani lamni takan” (Lawana Nani 107:29). Gâd ba yu lapta, pâsa bara Tasba paskanka aiska ba ai karnika mununhtara briaia sip sa. Tasba sauhkanka nani tâwan upla manis panis wahwisa, kuna Gâd ba baha nani sut wapnika mangkaia karnika brisa.

•   “Man bui tasba ba main kaiki brisma, lî bliki yaram ai mâ ailal sakisa” (Lawana Nani 65:9). Tisku Gâd naha Tasba paradais kum daukbia.

 Tasba sauhkanka trabilka nani wapni takbia pramiska dukiara kau nu takaia want sma kaka, “¿Quién salvará el planeta?” ulbanka ba aisi kaiks.