Kiamka kum kiamka wala ra misbara kaikaia lâka, rau munan lâka bara war aiklabanka nani dukiara, tilivisan, radiu bara Internet ra sturi ailal walisa.

•   “Kiamka kum ra misbara kaikbia dukiara aisanka nani ba, Israel bara Gaza war aiklabanka tâ krikan ba tâka kau ailal walisa, kau pali Internet ra” (The New York Times, noviembre kati yua 15, 2023).

•   “Octubre kati yua 7 wina tasba aiska ra pana pana misbara kaikaia lâka ba, bara kiamka kum ra misbara kaikbia bara rau munbia dukiara aisanka nani ba piua luan nani ba wal kau ailal walisa” (Kuntri nani Asla Takanka tâ brabrira, Dennis Francis, noviembre kati yua 3, 2023).

 Kiamka kum ra misbara kaikbia dukiara aisanka nani, rau munan lâka bara war aiklabanka sturka nani ba diara raya kum apia sa. Baibil ba patitara piua ra war aiklabanka nani ra tâ baikan waitna saura nani dukiara aisisa, bara ai bîla nani ba trisba nani lulki baku kan wisa (Lawana Nani 64:3; 120:7; 140:1). Ban sakuna, Baibil ba tânka marikisa misbara kaikan lâka naiwa piua ra yawan kaiki ba ban wina takras kan.

 Naiwa piua ra dîa muni misbara lâka ailal bâra ba dukiara Baibil ba tânka wâl marikisa.

1.  1. Upla nani aihkika pana pana latwan lâka bri ba tiwbia piua dukiara prapit aisan (Matiu 24:12). Baha mita pana pana latwan lâka marikaia watlika ra, ai daukanka nani wal misbara lâka bukbia (2 Timoti 3:1-5).

2.  2. Baibil ba wisa “tasba aiska na lika Sitan karnika mununhtara sa (1 Jan 5:19; Param Marikan 12:9, 12). Witin mita yabisa naha tasba ra misbara lâka kau ailal taki kabia.

 Sakuna Baibil ba sin wisa tisku Gâd ba misbara lâka sut sauhki tikbia. Baku sin, baha tâka panis wahwan piua dukiara kli wan kupia kraukbia apia. Baibil ba naku pramis wan munisa:

•   Gâd ba “witin nani nakra laya ba sut dikbia, bara prura kau âpu kabia, inanka, pura mata inaia lâka, latwanka sin; kan diara almuk nani ba sut lui wan sa” (Param Marikan 21:4).