¿Jisas sakripaiska wina man nahki yamnika briaia sip sma ki?
Tasba aiska ra mani bilara yua kum ra, Jehova witniska nani ba paiwan uplika milian milian nani aikuki Jisas Pruanka ba kupia kraukisa, witin daukaia wan blikan baku (Luk 22:19). Naha yua ra yawan kaikaia sip sa, upla nani dukiara Jisas ai rayaka yaban ba dîa muni tânka tara brisa, bara Jisas dîa daukan ba naiwa piua ra bara kaina piua ra sin nahki yamni wan muni ba lan takaia sip sa (Jan 3:16).
Jisas Pruan Kupia Kraukanka ra waram, apia kaka waras takaskram kra sin, ¿nahki Jisas sakripaiska wina yamnika briaia sip sma? Witin smalkan yawan diara wâl daukaia sa:
1. Gâd bara Jisas dukiara lan takaia. Jisas ba pura sunra kum dauki, ai Aisa ra naku win: “Bamna raya ban kaia lâka ba lika, mai kakaira takaia, Gâd kumi baman kasakkira sma ba, bara Jisas Kraist ra sin kakaira takaia, witinka man mita blikram ba” (Jan 17:3).
2. Dîa lan taki ba alki daukaia. Jisas ba win, ai smalkanka nani ba wan rayaka alki daukaia sa. Tânka kum baku, witin il purara smalki tnata prakan taim, ya ya ai bîla wali dauki nani ra bîla yamni nani yaban (Luk 6:46-48). Bara aima wala ra sin win: “Naha diara nani na tânka brih baha kat sin daukma kaka, lilia kama” (Jan 13:17).
¿Gâd bara Jisas dukiara kau nu takaia want sma ki? ¿Dîa lan takisma ba rayakam ra nahki alki daukaia sip ba nu takaia want sma ki? Naha dukiara naha hilpka nani brisma:
Baibil klaska nani
Jehova witniska nani Baibil stadika yabi ba upla manis ra hilp munan sa, Baibil tânka briaia, bara dîa smalki ba ai rayaka ra alki daukaia.
Naha dukiara kau nu takaia want sma kaka, pas wahia ra Baibil stadika kum makas pîska ba tais.
Jehova witniska nani Baibil stadika nahki yabi ba nu takaia dukiara, Man Baibil stadi taki lilia bas lilkika ba kaiks.
Wan aidrubanka nani
Jehova witniska nani ba wik bilara aima wâl, Asla Aidrubanka Watla ra aidrubisa. Naha aidrubanka nani ra Baibil dukiara aisisa, bara ai smalkanka nani wan rayaka ra nahki alki daukaia dukiara sin.
Naha aidrubanka nani ra upla sut dimaia sip sa, Jehova witniska kum kaia nit apia sa. Iwisma pliska ra, Asla Aidrubanka Watla ra aidrubaia sip apia sa kaka, Internet bâk dimaia sip sma.
¿Wan aidrubanka nani ba nahki sa? lilkika ra kaikma, Jehova witniska nani asla aidrubisa taim dîa dauki ba.
Pas wahia ra Aidrubanka ra dims pîska ba taima kaka, iwisma pliska ra aidrubanka lama kum pliki sakaia sip sma.
Lilka bara ulbi sakanka nani
Naha Internet pliska ra, lilka bara ulbi sakanka nani ailal pliki sakaia sip sma, bara naha nani ba hilp mai munbia nu takaia, Jisas smalkanka bara ai sakripaiska ba nahki tânka tara bri ba.
Tânka kum baku, nahki waitna kum rayaka ba upla milian milian ra swaki sakaia sip sa sapa, lan takaia want sma kaka, naha ulbi sakanka nani aisi kaikaia sip sma: “¿De que manera nos salva Jesús?” bara “¿Por qué sufrio y murio Jesús?”. Baku sin naha lilkika kaikaia sip sma: ¿Dîa muni Jisas pruan?