Ucrania war aiklabanka ra klir taki ba baku, rilidian tâ uplika nani manis ba war aiklabanka ra tâ baikisa. Kaiks, nahki rilidian tâ uplika nani ba war aiklabanka ra wâlsut tani ra tâ baikisa:

•   “Prana bara tingkika lâka yabisa, ya Ucrania tâwan war aiklabi nani ra . . . Wan kupia, wan pura sunra bara wan hilpka nani ba ban man nani wal sa” (Kiev tawanka ra tâ uplika Epifanio I ba 2022 marzo kati 16 ra baku maisa pakan, The Jerusalem Post).

•   “Rusia katolik churchka tâ uplika ba sandi ra Rusia suldiarka nani dukiara prias kum daukan. Bara Moscú tawanka ba Ucrania kuntrika ra war aiklabaia ban ridi taki ba mita, ‘Rusia uplika nani baman daukaia sip ba baku’ ai kuntrika tâwan war aiklabia makaban” (Reuters, 2022 abril kati 3).

 ¿Kristian nani ba war tilara dimaia sa ki? ¿Baibil ba dîa wisa?

 Baibil ba marikisa, rait pali Jisas Kraist nina bliki nani ba war aiklabanka nani tilara dimras.

•   “Sordkam ba kli watlika ra dingks. Kan ani uplika nani sordka ni aiklabi ba, sim sordka wal prubia” (Matiu 26:52).

   Upla kum war aiklabanka tâ baikisa taim, ¿rait pali Jisas bîla walisa ki?

•   “Naha lâ raya na, man nani ra maikisni: Pana pana walkam ra latwan kaiki kama. Yang bui man nani ra latwan mai kaikisna ba baku, pana pana walkam ra latwan kaiks. Man nani pana pana walkam ra latwan kaikisma kaka, upla sut kaikbia man nani ba yang disaipilki nani sma” (Jan 13:34, 35).

   Jisas win ai disaipilka nani ba latwan lâka marikbia. Upla kum war aiklabanka tâ baikisa taim, ¿Jisas aisan latwanka lâka ba marikisa ki?

 Kau tânka nu takaia dukiara, “El cristianismo y la guerra: ¿son compatibles?” ulbanka ba aisi kaiks.

 ¿Bîla kaikaia sip sa naiwa piua kristianka nani ba war aiklabanka nani ra dimbia apia? Âu. Baibil prapit aisanka kum wisa, wan piua ba tnata yua nani sa, bara nisan sut wina upla nani ba war aiklabaia lâka nani danh lan takbia apia, Jisas smalkan ba baku (Aiseya 2:2, 4).

•   Kau tânka nu takaia dukiara, La Atalaya wauhkataya wina “¿Qué piensa Dios de las guerras?” ulbanka nani ba aisi kaiks.

 Tisku pali, “Kupia kumi Gâdka” Jehova a ai Kingka lâka yus muni, upla nani ba “taibi, saura muni nani ba mihta wina swaki sakan kabia” (Pilipai 4:9; Lawana Nani 72:14).

•   Nahki baha daukbia lan takaia dukiara, ¿Gâd Kingka Lâka ba dîa sa ki? lilkika ba kaiks.