•   “Chaini kuntrika ba bitni pâtka kau tara wahwisa, bara lapta piua kau karna brisa wisa” (The Guardian, septiembre kati 7 yua, 2022).

•   “Aprika tasbaya pîska kau tara ba kat sin naha manka ra kau lâwi wabia lukisa” (Noticias ONU, agosto kati 26 yua, 2022).

•   “Eurup kuntrika nani aihkika ba lapta karna takbia maisa paki brisa. Ban kra lukisa 500 mani luan ba wina naha mani ra lapta kau karna takbia” (BBC News, agosto kati 23 yua, 2022).

 Tânka kakaira nani manis lukisa naha lapta karna ba, ban tâura wabia apia kaka kau karna taki wabia. ¿Diara nani ba kau pain takbia yawan bîla kaikaia sa ki? ¿Baibil ba dîa wisa?

 Naha sika Baibil dahra aisanka wan piua nani dukiara:

•   “Plun tiwan […] plis ailal ra” bâra kabia (Luk 21:11).

 Aima aihkika ra plun tiwanka ba lapta karna mita bri balisa. Bara Baibil prapit aisanka nani ba baha pali dukiara aisisa, plun tiwan bara dîa tâka wina bali ba: pât wahwanka ba bara prura ba sin (Param Marikan 6:6, 8).

 Baibil ra naha tânka kum dukiara klir munisa. Bahara wisa:

•   “Upla […] ai kanra ai rayaka ra dîa takaia ba alki takaskaia karnika âpu sa” (Jirimaya 10:23).

 Naha tânka wiaia want sa, upla nani ba yakan ai rayaka tâ briaia trai kaikisa kaka, pain apia kabia. Baha mita upla nani wahbi sakanka saura nani dauki ba tâwan, lî trabilka bâra sa bara lapta karna yaban takisa.

•   Sins tânka laki kakaira nani ba, witin nani kasak lukisa upla daukanka saura nani ba mita tasba aiska ra lapta karna nani yaban takisa. Baha mita kau piu bani ra lapta karna takan trabilka nani ba tasba aiska ra bâra sa.

•   Lî kauhla bâra pliska ba pat sauhki tikaia lamara sa. ¿Dîa muni baku takisa? Kan lalah ra latwan kaiki nani bara pulitik uplika nani ba isti ai yamnika sakaia dukiara tasba ra lukras, dus nani ba klakisa. Baku sin, kaina kir ra sauhki tiki, paskanka nani ba pain yus munras sa.

 Ban sakuna, Baibil ba bîla kaikanka wankisa.

 Baibil pramis wan munisa, Gâd lî trabilka nani ba wapni mangkbia. ¿Nahki daukbia ki?

1.  1. Gâd ba “naha tasba sauhki uplika nani ra, sauhki [tikbia]” (Param Marikan 11:18). Lî trabilka takbia dauki nani ra âpu daukbia: upla saura nani bara lalah lalihkra nani, kaina kir ra sauhki tiki nani sut (2 Timoti 3:1, 2).

2.  2. “Tasba lâwan pali ba sin, lî kârma nani man takbia” (Aiseya 35:1, 6, 7). Gâd mita lî lâwan trabilka nani sut ba wapnika mangkbia, bara tasba paradais painkira kum lî ailal bâra pliska kum daukbia.

3.  3. “Man bui tasba ba main kaiki brisma, lî bliki yaram ai mâ ailal sakisa” (Lawana Nani 65:9). Gâd blisinka wal naha tasba ra plun bara lî klin upla sut dukiara bâra kabia.