¿Tasba aiska ra lî trabilka taki ba dukiara Baibil dîa wisa?
Upla sut pain iwaia dukiara lî klin nit sa. Kuna, Kuntri nani Asla Takanka tâ brabrira António Guterres wi ba baku, “tasba aiska ra naha briaia ba piua bani kau karna sa, bara nitka kau ailal taki ba mita trabilka na kau karna takisa”. Upla milian milian mapara lî klin pliki sakaia ba uba karna sa.
Strdel/AFP via Getty Images
¿Yu kum upla sut dukiara lî klin aitani bâra kabia ki? Apia kaka, ¿naha trabilka wal ban aiklabi kaia nit kabia ki? ¿Baibil dîa wisa?
Baibil pramis munisa Tasba ra lî klin bâra kabia
Baibil ba wisa, lî trabilka ba yu kum Tasba ra danh âpu kabia, upla sut lî klin aitani bribia.
“Upla iwras tasbaya, tasba lâwan wina lî kârma nani sin takbia. Upla iwras tasbaya ba lî madakura nani takbia, tasba lâwan pali ba sin, lî kârma nani man takbia” (Aiseya 35:6, 7).
¿Naha pramiska ra yawan dîa muni kasak lukaia sip sa? Gâd naha Tasba nahki paskan ba dukiara Baibil dîa wi ba kaisa kaikaia.
Lî nahki auhi ba tânka dukiara Baibil dîa wisa
“Kasbrika pura Papaskra ba, witin sika Gâd bara Dawan ba, tasba ba dauki bara paskan ba […] witin baha paskan ba, bilara diara âpu kaia dukiara paskras kan, sakuna upla nani bâra iwi kaia” (Aiseya 45:18).
Gâd ba upla nani iwbia dukiara naha Tasba ba paskan, baha mita lî klin ban bâra kabia dukiara tnatka sât sât ra naha Tasba wark takbia yaban.
“Lî tahwi nani ba sut witin watla kum ra mangki brisa, ningkara baha ba wina lî yan auhisa. Lî auhi ba lika kasbrika nani wina yan auhisa, bara lî ailal pali upla nani purara auhisa” (Job 36:27, 28).
Naha tikska dîa aisi ba bîla prahni ra wibia kaka, lî klin bâra kabia dukiara, Gâd ba kasbrika bara lî kârma nani paskan. Kan, lî auhisa taim, laya ba iswi, awala nani bara kabu ra wisa, ba wina kasbrika ra uli, kli auhisa. Bara baku, upla nani bara daiwan nani ba lî klin briaia sip sa (Smasmalkra 1:7; Emus 5:8).
“Lî nani ba, yang ai piua kat blikamni, bara tasba ba, dus nani unta ra ba, ai mâ maikbia” (Libait Lâka 26:4).
Israel uplika nani ba insla dadaukra nani kan, bara Gâd pramis munan, piua bani ai mâka nani saki kabia dukiara, lî auhbia yabi kabia. Gâd nu kan, plun mâ nani saki kabia dukiara lî nit pali sa.
Patitara Israel kuntrika ra dauki kan baku, Gâd tisku Tasba aiska ra sim baku daukbia (Aiseya 30:23). Kuna, naha pramiska kau aimakras ba ra, Tasba aiska ra lî trabilka ba kau tara pâwi wabia, bara lî auhras trabilka ba baha tila wina kum sa. ¿Naiwa piua ra lî trabilka taki ba dukiara Baibil ba kau dîa wisa?
Lî trabilka nahki danh takbia
Baibil ba wisa, Gâd ai Kingka lâka bâk naha Tasba ra taki trabilka nani sut âpu daukbia, baha tilara sa lî trabilka ba (Matiu 6:9, 10). Gâd Kingka lâka ba heven wina naha Tasba aiska tâ bribia (Daniel 2:44; Param Marikanka 11:15). Naha Tasba gabamintka nani sip wapnika mangkras trabilka nani ba sut, Gâd Kingka lâka mita wapnika mangkbia.
Trabilka: Plis kum kum ra lî uba auhi ba mita lisamra tara nani dingkisa, kuna plis wala nani ra piua wihka lî auhras.
Nahki wapnika mangkbia: Gâd Kingka lâka ba plis sut ra ai piua kat lî auhbia yabia. Gâd naku pramis munan sa: “Kaiks, nanara yang diara nani ba sut raya daukisni” (Param Marikanka 21:5). Tasba lâwan nani ra lî kârma nani bâra kabia, bara upla iwras tasbaya nani ra kli upla iwaia sip kabia (Aiseya 41:17-20). Gâd Kingka lâka Kingka Jisas Kraist ba, naha Tasba paskanka ai karnika mununhtara bribia.
Witin naha Tasba ra kan taim, prari tara ba lamni dauki, baha karnika bri ba marikan, bara baha karnika ba Gâd mita yaban sa (Mark 4:39, 41). Gâd Kingka lâka ra Jisas king aimakbia taim, tasba sauhkanka trabilka nani ba danh âpu kabia. Upla nani ba âuyapah lâka bara kupia kumi lâka ra iwbia.
Trabilka: Upla bara kampani gridikira nani ba, awala bara tingni nani ba tâski dauki, lî trabilka ba kau tara takbia daukisa.
Nahki wapnika mangkbia: Gâd ba Tasba, tingni, lakun bara kabu klin daukbia. Naha Tasba aiska paradais kum kabia. Baha piua dukiara Baibil ba naku wisa: “Upla iwras tasbaya ba, lilia taks, tasba lâwan nani yakan swin kan ba lilia takbia, lapta tasbaya ba sin lilia bribia, tangni baku tangnika baiwbia” (Aiseya 35:1).
¿Naha Tasba sauhki upla wala nani panis wauhbia yabi nani ra dîa takbia? Gâd ba pramis munisa: “Naha tasba sauhki uplika nani ra, sauhki tikbia” (Param Marikanka 11:18, Sins Lâka 2:21, 22).
Trabilka: Naha Tasba ra lî klin bâra ba upla nani pain main kaikras, baha mita piua bani briaia kau karna sa.
Nahki wapnika mangkbia: Gâd Kingka lâka ra tingki, Tasba ra Gâd kupia lâka ba aimakbia, upla gridikira kupia lâka lika apia (Matiu 6:9, 10). Gâd Kingka lâka ba ai karnika mununhtara bribia uplika nani ra lâ pain nani smalkbia. Aiseya 11:9 wisa: “Tasba ba [Jehova] a tânka kaikaia lâka ni banhwan kabia”. Baha mita paradais ra iwbia nani ba sins lâka aihwa bribia, bara Gâd bara ai paskanka ra latwan kaikbia ba mita, naha Tasba bara dîa bâra ba pain pali main kaiki bri kabia.
Gâd Kingka lâka aimakbia taim, naha Tasba ra dîa daukbia ba dukiara nu takaia want sma kaka, “¿Qué hará el Reino de Dios?” ulbanka ba aisi kaiks.
Naha Tasba nahki paradais kum takbia ba nu takaia want sma kaka, Aiseya bukka saptika 35 ba aisi kaiks.
Naha Tasba bara upla nani dukiara Gâd kupia lâka ba lan takaia want sma kaka, ¿Dîa muni Gâd ba tasba na paskan? lilkika ba kaiks.
a Jehova sika Gâd nina sa (Lawana Nani 83:18, TNM). ¿Quién es Jehová? ulbi sakanka ba aisi kaiks.
Baha sin laik kaikma
¡BAN AIHWAKI KAIKI BAS!
Tasba aiska ra uba lapta karna taki ba | ¿Baibil dîa wisa?
¿Naha tasba aiska trabilka ba wapnika mangkaia sip sa ki? ¿Diara sut pain takbia bîla kaikaia sip sa ki?
ESSENTIAL BIBLE TEACHINGS
¿Gâd Kingka Lâka ba dîa sa ki?
Jisas smalkaia warkka ra, witin smalkan tila ba wina Gâd Kingka Lâka dukiara kau smalkan. Mani handat ailal piua ba tilara upla nani ai pura suni sa Gâd Kingka Lâka ba balbia.
WAN WARKKA
Wih mai kaikbia makas
Baibil tânka kum dukiara aisas, apia kaka Jehova witniska nani dukiara kau lan taks
