War aiklabaia dukiara lalah ailal tikisa.

•   “Tasba aiska ra war aiklabanka ailal ra 2,2 milian pura milian dalas nani tikisa” (The Washington Post, Febrero kati, yua13, 2024).

 Kuna naha sat war aiklabanka nani ra, lalah baman tikras sa tânka kum baku, Ucrania kuntrika ra war aiklabanka taki ba ra luki kaiks.

•   War aiklaklabra nani. Mani wâl luan bilkara war tâ krikan ba wina, Ucrania kuntrika ra war aiklaklabra nani 500,000 nani baku pruan sa, apia kaka insauhki takaskan sa.

•   Tawan uplika nani. Kuntri ailal asla takanka ba (ONU) wisa, baha war aiklabanka ra, upla 28,000 nani pruan sa, apia kaka insauhkan wal takaskan sa. Baku sin baha asla takanka, tâ brabrira kum ba naku aisan: “Naha war aiklabanka praiska ba numba nani wal kulki sakaia sip apia sa kan tawan uplika nani mapara sauhki tikanka tara pali kum sa” . a

 War aiklabanka bara blahwanka nani tâka, tasba aiska ra upla nani pat wahwanka ba uba tara pali takan sa.

•   114 milian nani. Naha numbika ba marikisa, 2023 manka ra septiembre kati wina, upla an nani ai kuntrika swih, plis wala ra plapi banhwan ba.

•   783 milian nani. Naha numbika ba marikisa, upla an nani uba sanglang ra iwi ba mita panis tara wahwisa. “Baha sut ba war aiklabanka tâka mita atia sa, kan upla 70% nani ba, naha tasba ra sanglang ra iwi banhwisa, war bara rau munan lâka tâka mita” (Tasba aiska ra plun mâ yuaia programika).

 ¿Yu kum war aiklabanka nani danh âpu kabia ki? ¿Yu kum kupia kumi lâka ra iwaia sip kabia ki? ¿Sanglang bara umpira lâka âpu daukaia dukiara yu kum tasba aiska ra lalah saki ba yus munbia ki? ¿Baibil ba dîa smalkisa?

 Yawan piuara war bara blahwanka nani sut taki ba dahra wan aisaia dukiara, Baibil ba aras kum bara aras âiulra kum wal praki marikisa.

•   “Bara aras wala kum bal takan, baha ba lika pauni kan, bara purara uli kan ba karnika bri kan, tasba aiska wina kupia kumi lâka ba sakaia, bara yaka upla nani ba aiklabi pana pana prui tiwaia; bara witin ra sord tara kum sin yan kata” (Param Marikan 6:4).

 Baha araska âiulra ninara, aras âiulra wala wâl, nina blikisa. Baha nani ba yawan naiwa piuara trabil wala nani wahwi ba tânka marikisa, bara naha trabilka nani tilara sa: Plun wahwanka, prura, siknis nani, bara diara wala nani sin (Param Marikan 6:5-8). Naha dahra aisanka nani dukiara kau nu takaia want sma kaka, bara dîa muni kasak lukaia sip sa naiwa piuara baha nani sut aimaki ba “¿Qué representan los jinetes del Apocalipsis?” ulbi sakanka ba aisi kaiks.

 Tisku pali naha tasba wina lalahka saki ba, danh war aiklabaia dukiara yus munbia apia, kuna naha ba upla nani mita daukbia apia, kan Baibil ba wisa:

•   Gâd “witin war nani âpu daukan [kabia], tasba aiska ra” (Lawana Nani 46:9).

•   War trabilka nani sut ba Gâd mita âpu daukbia. “Witin nani nakra laya ba sut dikbia, bara prura kau âpu kabia, inanka, pura mata inaia lâka, latwanka sin; kan diara almuk nani ba sut lui wan sa” (Param Marikan 21:4).

•   Gâd mita daukbia upla nani ba kupia kumi lâka ra iwbia. “Bara upliki nani ba kupia kumi pliska ra iwbia, kli pât munras watla nani ra iwbia, ris bri lilia kabia” (Aiseya 32:18).

 Baibil ra prapit dahra aisanka nani aisi ba baku war bara diara wala nani naiwa piuara taki ba marikisa kupia kumi lâka ba isti pali balbia.

 ¿Naika piuara kupia kumi lâka bara kabia dukiara Gâd ba dîa daukbia? Ai kingka lâka heven ra bri ba yus munbia. (Matiu 6:10) ¿Naha kingka lâka dîa sa? Bara ¿man dukiamra dîa daukbia ki? Naha tânka nu takaia dukiara naha lilkika ba kaiks: ¿Gâd Kingka lâka ba dîa sa ki?