Nisan nani Asla Takanka ba, noviembre kati yua 20 sandi 2022 manka ra, lî piua bara lapta piua naha tasba ra nahki chens taki ba aisaia dukiara, aidrubanka daukan ba tnata prakan (naha aidrubanka ba COP27 nina mâkisa). Naha asla takanka tâ bri uplika nani ba, tasba sauhkanka nani tâwan kau panis wahwi kuntrika nani dukiara, lalah lainka ra hilp yabaia wahbi sakan. Tasba aiska ra naha wahbi sakanka ba sut tara kulkisa, sakuna upla manis lukisa naha daukbia kra sin, trabilka pali lika wapnika mangkbia apia.

•   “Tasba sauhkanka nani tâwan pât wahwi nani ra, lalah lainka ra hilp munaia wahbi sakanka dukiara kasak yamni lukisna […]. Sakuna klir sa naha ba aitani apia kabia […]. Naha tasba na ban insauhkanka nani bri kabia” (António Guterres, Nisan nani Asla Takanka tâ brabrira; noviembre kati yua 19 mani 2022).

•   “Tasba ra sauhkanka tara kum takaia baila sa” (Mary Robinson, Irlanda kuntrika prisidint kan ba, bara Nisan nani Asla Takanka ra upla raitka dukiara wihta baku wark taki kan ba; noviembre kati yua 20 mani 2022).

 Kau pali wahma tiara nani ba naha tasba ra dîa takbia dukiara wari takisa. ¿Naha tasba sauhkanka nani mapara aiklabaia dukiara nisan nani asla wark takaia sip kabia ki? ¿Baibil ba dîa wisa?

 Naha tasba sauhkanka trabilka nani dukiara karna wark taki uplika nani bâra sa, sakuna dîa dîa daukbia kra sin Baibil wisa, trabilka wapnika pali lika mangkbia apia. Kaisa tânka wâl kaikaia:

•   “Diara warha ba sip wapni daukras” (Smasmalkra 1:15).

   Dîa wan smalki ba. Gabamint nani dîa warkka nani daukbia kra sin, trabil nani sut lika wapni mangkaia sip apia sa, kan upla nani ba wala nani tâ briaia dukiara paskras kan (Jirimaya 10:23). Nisan nani asla taki trai munbia kra sin, naha tasba trabilka nani wapnika mangkaia sip apia sa.

•   “Upla nani ba klauna ai dukiara baman luki kabia, lalah ra latwan kaikbia, […] kupias nani bara diara pain nani waihla kabia” (2 Timoti 3:2, 3).

   Dîa wan smalki ba. Baibil prapit aisan, naiwa piua ra upla nani ba silp ai yamnika ra baman luki kabia, bara diara yamni nani daukaia dukiara wala nani wal asla wark takaia brinka âpu kabia. ¿Naiwa piua ra baha yawan kaikisa, rait apia?

 Naha tasba ra kainara dîa takbia ba gabamint nani mihta ra apia sa. Kan Gâd naha tasba tâ briaia dukiara upla lankira kum ra mangkan sa: Baha ba Jisas Kraist. Witin dukiara Baibil ba naku aisisa:

•   “witin ra king kaia karnika yaban sa. Ai nina ba mâkan kabia: Aihka pranakira, Lâ Smasmalkra, Gâd karnakira, ban kaia Aisika, kupia kumi lâka Kingka” (Aiseya 9:6).

 Jisas ba Gâd Kingka lâka Kingka sa, bara ai gabamintka ba heven ra sa (Matiu 6:10). Witin ba tasba ra bara upla nani ra main kaikaia brinka, sinska lâka, bara karnika brisa (Lawana Nani 72:12, 16). Jisas karnika mununhtara naha Kingka lâka ba “Naha tasba sauhki uplika nani ra” sauhki tikbia, bara naha tasba kli paradais kum daukbia (Param Marikan 11:18; Aiseya 35:1, 7).

 Naha tasba sauhkanka nani trabilka nahki wapni takbia dukiara kau nu takaia want sma kaka “¿Qué dice la Biblia sobre el cambio climático y nuestro futuro?” ulbi sakanka ba aisi kaiks.