¿Tasba aiska ra plun tiwanka dukiara Baibil dîa wisa?
“Plun tiwanka âpu”. Tasba aiska tâ bri wihtka nani ba naha daukaia trai kaikisa: upla sut plun aitani bri kabia. a ¿Sakuna plun tiwanka yu kum danh takbia ki? ¿Baibil ba dîa wisa?
Plun wahwanka dukiara Baibil ba pat kaina manis maisa pakan
Baibil ba wan marikisa “tnata yua nani” wibia kaka wan piua nani ra plun tiwanka bâra kabia (2 Timoti 3:1). Gâd ba naha pâtka âpu sa, kuna naha ba takbia pat wan maisa pakan kan (Jems 1:13). Naha Baibil prapit aisanka wâl na laki kaiks.
“Plun tiwan sin [...] plis ailal ra kabia” (Matiu 24:7). Baibil prapit aisanka na wi ba baku, plun tiwanka plis sât sât ra kabia. Plun yuaia tâ bri asla takanka nani dîa wi ba kaiks: “Plun tiwanka, plun aitani sakras kaia, bara plun pain piras kaia trabilka nani ba, wapnika mangkaia sip apia munisa”. b Kuntri ailal ra, upla milian nani plun nit ba kat sip sakras ba mita, panis wahwi prui banhwisa.
“Yang kaikri [...] aras siksa kum kan. Baha purara uli kan ba ai mihta ra paun kum bri kan” (Param Marikanka 6:5). Naha prapit aisanka ra, aras bara aras âiulra ba, tnata yua nani ra plun tiwanka bâra kabia tânka marikisa. c Aras âiulra ba ai mihta ra paun kum brisa, bara baha wal plun nani ba paun muni wiria yabaia dukiara. Aras ra uli auya piua ra bîla baikra kum upla nani ra maisa pakisa, plun ba uba mana kabia bara baha mita yarka tiwbiara (Param Marikanka 6:6). Naha ba param marikisa naiwa piua ra tasba aiska ra plun tiwanka trabilka tara bâra ba, baha tâka mita upla milian nani plun pain atki briaia karna munisa.
Plun tiwanka danh âpu kabia
Tânka pliki kakaira nani ba wisa, tasba na upla sut dukiara plun aitani sakisa. ¿Baku sa kaka, dîa muni upla nani plun wahwisa? ¿Naha trabilka wapnika mangkaia dukiara wan Papaskra Jehova d Gâd ba dîa daukbia? ¿Baibil ba dîa wisa?
Trabilka ba: Gabamint nani ba umpira lâka bara lalah trabilka ba sip wapnika mangkras ba mita, upla ailal plun wahwanka tilara iwisa.
Nahki wapnika mangkbia: Tasba gabamintka nani kasakkira apia ba mita, ai watlika ra gabamint kasakkira kum aimakbia: Gâd Kingka lâka ba, bara Jisas Kraist ai Kingka kabia (Daniel 2:44; Matiu 6:10). Naiwa piua ra upla umpira ailal ra plun atki briaia karna munisa. Kuna Gâd Kingka lâka wal naha sut wapnika mangkbia. Baibil Jisas dukiara naku wisa: “Witin bui swaki sâkbia baha umpira nani makabi ba bara diara luha nani upla bui hilp munras nani ba. [...] Plawar mâ ailal kabia, ¡il bahna nani ba sut plun pali man kabia!” (Lawana Nani 72:12, 16).
Trabilka ba: War nani ba lalah trabilka bukisa, baha tâka mita plun sakaia isi apia sa.
Nahki wapnika mangkbia: “[Jehova] war nani âpu daukan, tasba aiska ra; witin pantamangka nani kata sut krikan, langsa nani kata ba kriki, yuya man daukan; ¡war waginka nani kata ba angki âpu daukan!” (Lawana Nani 46:9). Gâd ba war aiklabaia dukia nani ba sut sauhki tikbia, bara war tâ baiki uplika nani ra sin. Bahara tingki, upla sut trabil âpukira plun ailal bri kabia. Baibil ra pramis munisa: “Kupia kumi lâka bara wapni kaia lâka [...] piua nani ba sut ra [...] ban kabia” (Lawana Nani 72:7).
Trabilka ba: Tasba sauhkanka, taim chens takanka ailal bâra ba mita, plun mâ nani ba sip mangki sakras bara daiwan nani sin prui tiwisa.
Nahki wapnika mangkbia: Gâd bui paskanka karnika nani ba ai mihta ra bribia, bara plun mangki sakaia ba kau isi kabia. Baibil ba wisa: “Pâsa saura karna krawi ba [Jehová] mita lamni daukan, bara rip nani lamni takan. [...] Upla iwras tasbaya ba, lakun nani daukisa tasba lâwan ba wina lî kârma nani sakisa; bara plun wahwi nani ra yabisa bahara iwaia. [...] Witin nani bahara wain nasla nani daukisa, bara mâ mani sakisa” (Lawana Nani 107:29, 35-37).
Trabilka ba: Upla gridikira bara kupias nani ba, plun tâski yuisa bara ya nitka bri nani ra yabras.
Nahki wapnika mangkbia: Gâd Kingka lâka ba gridikira bara kupias uplika nani sut ra sauhki tikbia (Lawana Nani 37:10, 11; Aiseya 61:8). Baibil ba wisa Jehova “taiban uplika nani ra kasak kat yabisa; bara sin plun dauki nani ra dakakisa” (Lawana Nani 146:7).
Trabilka ba: Mani bani tasba aiska ra plun mâ mangki saki ba wina, pîska kum saura yus munisa apia kaka lulkisa.
Nahki wapnika mangkbia: Gâd Kingka lâka mununhtara plun sâtka bani bâra kabia, bara tnatka pain ra upla nani ra yui kabia. Jisas naha tasba ra kan piua ra, aman pali kaikan plun ba bahki ra yus munaia apia dukiara. Tânka kum aisabia kaka, aima kum ra sain tara kum dauki, upla 5.000 pura plun dakakan. Baha ningkara ai disaipilka nani ra win: “Yuya nani kau takaskan ba wahbi bris, wiria sin tiwan kaia apia ba mata” (Jan 6:5-13).
Gâd Kingka lâka ba mita plun wahwanka trabilka nani âpu daukbia, bara upla sut plun ailal bribia bara lilia kabia (Aiseya 25:6). ¿Baha ba ahkia aimakbia? Nu takaia dukiara, naha ulbanka ba kaiks: “¿Cuándo gobernará la Tierra el Reino de Dios?”.
a Agenda 2030 sobre el Desarrollo Sostenible, mani 2015 ra Naciones Unidas asla takanka kuntrika nani tâ baikanka yaban.
b Naciones Unidas asla takanka ba: Alimentación y la Agricultura, el Fondo Internacional de Desarrollo Agrícola, el Fondo de las Naciones Unidas para la Infancia, el Programa Mundial de Alimentos de las Naciones Unidas bara la Organización Mundial de la Salud dukiara maisa pakanka yaban ba.
c Param Marikanka bukka aras âiulra nani 4 marikanka dukiara kau nu takaia want sma kaka, naha ulbanka ba kaiks: “¿Qué representan los jinetes del Apocalipsis?”.
d Jehova sika Gâd nina sa (Lawana Nani 83:18, TNM). “¿Quién es Jehová?” ulbi sakanka ba aisi kaiks.
Baha sin laik kaikma
ESSENTIAL BIBLE TEACHINGS
¿Gâd Kingka Lâka ba dîa sa ki?
Jisas smalkaia warkka ra, witin smalkan tila ba wina Gâd Kingka Lâka dukiara kau smalkan. Mani handat ailal piua ba tilara upla nani ai pura suni sa Gâd Kingka Lâka ba balbia.
