Upla lukanka bara daukanka rispik munaia lâka ba: ¿Baibil naha dukiara dîa smalkisa?
“Upla lukanka bara daukanka rispik munaia lâka marikisa taim kupia kumi lâka briaia sip sa” (Declaración de Principios sobre la Tolerancia de la Unesco, 1995).
Upla lukanka bara daukanka rispik munaia lâka marikras sa taim, misbara lâka bukisa bara wan walka ra rispik lâka tikisa. Naha sât daukanka nani ba las kat rau munaia lâka, bara upla mawan bâk sakaia lâka ba, upla nani kupia ra bukisa.
Kuna, upla lukanka bara daukanka rispik munaia lâka ba dukiara, manis ba lukanka sât sât brisa. Kum kum lukisa naha daukanka mariki uplika ba ai walka dîa dauki ba sut yamni kaikaia sa. Upla wala nani ba Baibil bapanka kum baku yus muni wisa, ai walka lukanka bara daukanka rispik munaia ba tânka sa, upla nani ai iwanka tnatka, bara diaura kasak lukaia wahbi sakaia raitka bri ba rispik munaia sa, witin nani baha sât dukia nani yamni kaikras kabia kra sin.
¿Naiwa piua nani ra upla nani ai walka lukanka bara daukanka rispik munaia lâka marikbia dukiara Baibil ba hilp munaia sip sa ki?
Baibil ba wan walka lukanka bara daukanka rispik lâka marikaia wan kupia bukisa
Pilipai 4:5 ra wisa: “Yarka upla sut mita man nani ba upla yamni baku mai kaikbia”. Baibil smalkisa wan walka ra yawan kupia yamni lâka, kasak lâka, bara rispik lâka marikaia sa. Naha smalkanka bîla wali uplika nani ba, ban kra ai walka dîa dauki ba kasak kaikras sa, apia kaka alki daukras sa. Ban sakuna, uplika dîa luki ba bara dîa dauki ba rispik munisa.
Baibil wan marikisa upla nani daukanka bara iwaia tnatka ba dukiara Gâd kupia lâka ba. Miqueas 6:8 ra wisa: “Dawan bui man ra pat mai win, dîa ba yamni daukaia tânka”. Wan rayaka kau pain briaia dukiara yawan dîa daukaia sip ba, Gâd ai bîla bâk wan smalkisa (Aiseya 48:17, 18).
Jehova upla lâka daukaia adarka wankras sa. Baibil ba wisa, “Bamna Gâd mita lâ ba yaban, bara witin sika lâ wihtka aimaki ba. [...] Bara ¿man ba ya sma ki, uplikam lâka daukisma ba?” (Jems 4:12). Gâd ba upla sut ra ai rayaka dukiara wahbi sakanka nani daukaia pri lâka yabisa. Baha mita yawan dîa wahbi sakan ba wal ningkara dîa takbia ba, pain apia kaka saura kabia sin, yawan nu kaia sa Gâd patka apia ba (Kli Smalkanka 30:19).
Rispik lâka dukiara Baibil ba dîa wisa
Baibil ra wisa “Upla sut ra kulki bas” (El libro del Pueblo de Dios, 1 Pita 2:17). Baku ba ra ya Baibil lâka nani ba kat iwaia want sa kaka, upla nani diaura kasak luki kabia bara ai iwanka tnatka ba nahki kabia kra sin, rispik lâka ba marikaia sa (Luk 6:31). Naha tânka apia sa yawan upla nani dîa kasak luki ba bara dîa dauki ba sut tâ baikisa. Swira dauki bara bahki kulkaia watlika ra, Jisas upla wala nani ra nahki munan ba baku tnata lukaia trai kaiki banhwisa.
Tânka kum baku, aima kum Jisas ba mairin kum ra kakaira takan, naha mairka ba ai rilidianka bri kan ba Jisas uya pain kaikras kan. Baku sin naha mairka ba waitna kum bri kan ba ai maritka apia kan, baha sât rayaka ba Jisas yamni kaikras kan, sakuna witin ban naha mairka ra rispik lâka wal aisan (Jan 4:9, 17-24).
Jisas baku kristian nani ba ridi banhwisa dîa kasak luki ba ya wilin nani ra aisaia, sakuna baha sut ba rispik lâka wal (1 Pita 3:15). Baku sin Baibil ba kristian nani ra naku wisa: “Dawan napakanka kum lika unsabaia apia sa. Witin lika upla sut aikuki pain kaia sa”, ai kasakka lukan lâka sât wala bri uplika nani aikuki kabia kra sin (2 Timoti 2:24).
Misbara lâka dukiara Baibil ba dîa wisa
Baibil ba naku wisa: “Man nani upla sut wal kupia kumi lâka bri kaia trai kaiki bas” (Hibru Nani 12:14). Upla kum kupia kumi lâka pliki ba misbara lâka wina sait ra sa, bara sut wal pain kaia trai munisa. Ban sakuna baku daukaia dukiara witin dîa kasak luki ba swiaia nit apia sa (Matiu 5:9). Bara sin Baibil ba kristian nani ra wisa ai waihla nani ra latwan kaikbia, rau sauhki nani ra kupia yamni lâka mariki kabia (Matiu 5:44).
Baibil Sins Lâka 6:16-19 ra wisa: Gâd ba upla ra saura munaia dukia nani ba “misbara kaikisa”. Naha ra Baibil misbara lâka dukiara aisisa taim wiaia want sa daukanka saura nani sut Gâd yamni kaikras ba. Baibil ba wisa, ani uplika ai rayaka chens munaia bara Gâd lâka kat iwaia want nani ra Jehova padin munaia wilin sa (Aiseya 55:7).
Upla lukanka bara daukanka nani rispik munaia dukiara Baibil tikska nani ba
Taitus 3:2: “Kupia kumi lâka bri nani kabia bara upla wal asla uplika nani kabia, bara ai kupia swapnika ba upla sut ra latan mariki nani kabia”.
Kupia kumi lâka bri uplika ba, upla wala dîa sât lukanka bri kabia sin, rispik lâka bara kupia swapni lâka wal aisisa.
Matiu 7:12: “Baku bamna, upla wala nani man nani ra dîa mai daukaia brin mai dauki ba baku, man nani sin dauks”.
Yawan sut ba upla wala mita rispik wan munbia want sa, bara yawan dîa luki ba upla wala nani mita kulkbia brin wan daukisa. Naha Jisas smalkanka nani nahki rayakam ra alki daukaia sip sma ba lan takaia want sma kaka, “¿Qué es la Regla de Oro?” ulbi sakanka ba aisi kaiks.
Jasua 24:15: “Pliki sâks naiwa man nani ya dukia daukaisma ba”.
Upla kumi bani dîa daukaia silp wahbi sakaia raitka bri ba, yawan rispik munisa taim, kupia kumi lâka ra iwaia want ba marikisa.
Apastil Nani Sturka 10:34: “Gâd mapa ra upla sâtka kumi upla sât wala ba wal aihka apia sa”.
Upla kumi ra sin Gâd mita bahki kulkras sa, iwanka tnatka, mairin waitna kabia, ani kuntrika wina kabia, dîa kiamka kabia, piua luan ra dîa sât iwanka bri kan kabia kra sin. Ya Gâd ra tnata lukaia want sa kaka, yawan upla sut ra rispik munaia sa.
Abakuk 1:12, 13: Man [Gâd] saura lâka ba aitani kulkaia sip apia sma.
Gâd ba ai kupia alki takaskaia lâka ba ban kaia ra briras, baha mita witin upla daukanka saura nani ba ban kaia ra swibia apia. Naha dukiara kau nu takaia want sma kaka, naha lilka na kaiks ¿Dîa muni Gâd swin pât wahwanka ba naiwa piua kat takisa?
Roman 12:19: “Saura mai munan ba tâwan upla ra pana saura munpara, sakuna swis Gâd mita uplika ba ra klala yabia, kan Ulbanka ba wisa: ‘Yang mita lika klala yaia sna; bahamna Dawan bîla: Swis yang baha ba kasakka lâka ra aibapamna’”. a
Jehova upla kumi ra sin pana saura munaia adarka yabras. Witin pat piua mangkan sa ahkia kat kasakka lâka kat pana munaia ba. Kau nu takaia want sma kaka, “¿Alguna vez se hará justicia en el mundo?” ulbi sakanka ba aisi kaiks.
a Jehova sika Gâd nina sa (Lawana Nani 83:18, TNM). “¿Quién es Jehová?” ulbi sakanka ba aisi kaiks.
Baha sin laik kaikma
WAN WARKKA
Wih mai kaikbia makas
Baibil tânka kum dukiara aisas, apia kaka Jehova witniska nani dukiara kau lan taks
