¡BAN AIHWAKI KAIKI BAS!
Tasba aiska ra aihka bitni takisa | ¿Baibil dîa wisa?
2022 julio kati bilkara, plis ailal ra kau bitni takan luan piua nani ba wal:
“Chaini gabamintka ba aima wala maisa pakan, tawan 70 nani ra uba bitni takisa, bara baha tâka upla pruaia sip sa” (2022 julio kati 25, CNN Wire Service).
“Europ aiska ra aihka bitni taki ba mita, baha pliska kuntrika nani ailal ra dus nani ami tiwisa” (2022 julio kati 17, The Guardian).
“Naha sandi ra Stechi kuntrika tawan ailal ra kau lapta takan piua luan nani ba wal. Pâsa lapta ba kuntrika lalma, waupasa bara muna tani ra iwan ba mita” (2022 julio kati 24, The New York Times).
¿Naha sut ba dîa tânka sa? ¿Naha tasba ra upla nani iwaia sip apia kabia ki? ¿Baibil ba dîa wisa?
¿Tasba aiska ra aihka bitni takbia dukiara Baibil prapit aisi kan ki?
Âu. Nawas dîa taki ba, wan piua dukiara Baibil dîa aisan ba wal asla sa. Tânka kum baku, Jisas prapit aisan, yawan “diara sibrinkira nani” apia kaka “sain aihka nani” kaikbia (Luk 21:11). Tasba aiska ra aihka bitni taki ba kaiki upla manis si brisa, kan lukisa upla nani dîa dauki ba naha tasba sauhkbia, bara upla kumi sin nâra iwaia sip apia kabia.
¿Naha tasba ra upla iwaia sip apia kabia ki?
Apia. Upla nani ban kaia ra iwbia dukiara Gâd naha tasba paskan (Lawana Nani 115:16; Smasmalkra 1:4). Gâd ba upla nani naha tasba sauhkbia swiras, kau ni witin pramis munan baku “naha tasba sauhki uplika nani ra, sauhki [tikbia]” (Param Marikan 11:18).
Nanara Gâd naha tasba dukiara dîa daukbia pramis munan ba tila wina wâl ba kaiks:
“Upla iwras tasbaya ba, lilia taks, tasba lâwan nani yakan swin kan ba lilia takbia, lapta tasbaya ba sin lilia bribia, tangni baku tangnika baiwbia” (Aiseya 35:1). Gâd naha tasba ra upla iwras kabia swiras. Sakuna baha purkara, naha tasba sauhkan ba kli pain daukbia.
“Man bui tasba ba main kaiki brisma, lî bliki yaram ai mâ ailal sakisa” (Lawana Nani 65:9). Gâd blisinka nani wal, naha tasba ba paradais kum kabia.
Tasba aiska ra piua nani aihka taki ba wal nahki Baibil prapitka nani aimakisa sapa nu takaia want sma kaka, “¿Qué dice la Biblia sobre el cambio climático y nuestro futuro?” ulbanka ba aisi kaiks.
Naha tasba sauhkan ba kli pain takbia pramiska dukiara kau nu takaia want sma kaka, “¿Quién salvará el planeta?” ulbanka ba aisi kaiks.