2022 mayo kati 19 ra, Kuntri nani Asla Takanka Kupia Kumi lâka dukiara Wark Taki Daknika (Consejo de Seguridad de la ONU) aidrubanka ra tâ uplika nani 75 ba win, “COVID-19 sikniska tâka mita, baku sin lî auhaia piua bara lapta takaia piua sât wala taki ba mita, pat plun wahwanka karna nani bâra kan. Kuna nanara Ucrania kuntrika ra war aiklabanka taki ba mita, tasba aiska ra plun wahwanka ba kau karna takisa”. Ba wina tisku kan, The Economist wauhkataya ba naku ulban, “Naha war aiklabanka ba, naha tasba pat trabil manis bri kan ba ra, plun wahwanka tara kum bri balisa”. Baibil prapit dahra aisan kan, wan piua ra plun wahwanka karna nani bâra kabia ba, baku sin naha trabilka mapara bapi buaia dukiara, bîla kaikanka bara smalkanka painkira nani wankisa.

•    Jisas prapit aisan: “Kuntri kumi mita wala mapara aiklabia, tasba kum mita wala mapara war aiklabia; plun tiwan sin [...] plis ailal ra kabia” (Matiu 24:7).

•    Baibil ra Param Marikan bukka ba aras âiulra nani walhwal marikanka dukiara aisisa. Tila wina kum ba tânka marikisa, war aiklabanka ba. Ba wina wala aula ba tânka marikisa, plun wahwanka ba. Baha piua ra plun sakaia uba karna kabia, bara plun mana uba ulan kabia. “Yang kaikri, bara bahara aras siksa kum kan. Baha purara uli kan ba ai mihta ra paun kum bri kan. Bara [...] bîla baikra kum naku aisi kan walri: ‘Plawar kwart kumi mana ba silin kumi [de kum wark takan mana praiska], bara barli mâ kwart yumhpa ba silin kumi’” (Param Marikan 6:5, 6).

 Plun wahwanka dukiara naha prapit aisanka nani ba nawas aimakisa. Bara naha piua dukiara Baibil nina mâkisa “tnata yua nani” (2 Timoti 3:1). “Tnata yua nani” bara aras âiulra nani walhwal marikanka dukiara kau nu takaia want sma kaka, Tasba ba mani 1914 wina sât wala takan lilkika ba kaiks, baku sin “¿Qué representan los jinetes del Apocalipsis?” ulbanka ba aisi kaiks.

•    Plun mana uli ba, bara plun wahwanka nani baku, trabil sât sât mapara bapi buaia dukiara Baibil ba smalkanka painkira nani wankisa. “Cómo vivir con menos” ulbanka ra baha hilpka kum kum kaikaia sip sma.

•    Baibil ba bîla kaikanka sin wankisa. Wan marikisa trabilka nani ba wapnika mangkbia. Pramis munisa, yu kum naha tasba ra “plawar mâ ailal bâra kabia”, bara upla kumi sin plun wahbia apia (Lawana Nani 72:16). Wan kaina piua ba nahki kabia, bara dîa muni naha bîla kaikanka ra kasak lukaia sip sa sapa, kau nu takaia want sma kaka, “La esperanza real de un mañana mejor” ulbanka ba aisi kaiks.