2024 manka bilkara tasba aiska ra iliksan nani kau ailal nani daukan kabia. Ban sakuna upla ailal danh pulitik uplika nani ra kasak lukras.

•   Stech kuntrika ra pulitik dukiara tânka pliki kaikan taim upla aihkika win: “Pulitik uplika nani aihkika ba silp ai yamnika dukiara baman lukisa”, upla nani ra hilp munaia brinka âpu sa (tânka sât sât laki kaiki apiska Pew Research Center, septiembre kati, 19 yua 2023). a

 Wahma tiara ailal nani sin pulitik uplika nani ra danh ai kasak lukan lâka ba mangkras.

•   Wahma tiara nani ba ai brinka sa, naha tasba trabilka tara nani ba wapnika mangkaia, kuna witin nani bîla “pulitik uplika nani ba baha trabilka nani wapnika mangkaia dukiara diara kumi sin daukras sa.”(The New York Times, enero kati 29 yua, 2024).

•   “Tânka laki kaiki ba ra nu takan wahma tiara nani ba Internet ra lilka nani suni (youtubers) uplika nani ra kau kasak lukisa, pulitik uplika nani ra kasak lukaia sirka ra” (The Korea Times, enero kati, 22 yua, 2024).

 Baku sa kaka, ¿naika piua pain kum briaia dukiara yawan pulitik uplika nani ra kasak lukaia sip sa ki? ¿yawan yaura kasak lukaia sip sa?

 Upla kum ra kasak lukaia want sa taim, yawan aman kaikaia sa, Baibil ba wisa “Taniskira ba diara sut witin aisi ba ra baman kasak lukisa, tânkira watauki ba, ai mina nani taibi ba pain laki kaikisa” (Sins Lâka 14:15).

•   Diara kasak, kunin ba wal tânka briaia dukiara “Cómo protegerse de la información falsa” ulbanka ba aisi kaiks.

 Baku sin, pulitik uplika nani diara pain daukaia lukanka bri kabia sin, ai karnika aitani âpu sa, baku ba mita Baibil ba naku wan smalkisa:

•   “Upla tara nani ra kasakkam lukan ba mangkpara, witin nani sin upla sa, witin nani sip swaki mai sakras” (Lawana Nani 146:3).

 Baibil ba marikisa, Gâd bui tâ brabrira kau pain, bara wan kasakka lukan lâka mangkaia aitani ba, wahbi sakan sa, naha sika Jisas Kraist. (Luk 1:32, 33) Jisas ba Gâd kingka lâka kingka sa, bara naha kingka lâka ba heven ra sa (Matiu 6:10).

•   Tânka pliki lan taks, dîa muni Jisas ra kasak lukaia sip sa, bara naha tasba trabilka nani naiwa yawan wahwi ba, nahki wapnika mangkbia ba sin “¿Quién es el Rey del Reino de Dios?” bara “¿Qué hará el Reino de Dios?” ulbanka nani aisi kaiks.